O Defensor do Pobo Europeo admite a trámite a reclamación da plataforma de vítimas de Angrois para que a Comisión Europea lles facilite información sobre o procedemento sancionador que abriu contra España. Os afectados tamén lle pediron amparo por non ter realizado aínda España a investigación técnica independente do sinistro que vén reclamando a Comisión Europa.
Fomento adxudica a redacción do estudo co que se dá dous anos máis para decidir se evita que o tren A Coruña Ferrol dea un rodeo por Betanzos. Adiántao La Opinión, que ratifica que a empresa terá 24 meses para analizar posibles alternativas que se engadirán aos cando menos 6 informes oficiais xa elaborados sobre ese problema desde 2003.
O Deportivo gaña 2-0 (goles de Fede e Quique) ao Mallorca na ida da eliminatoria definitiva para o ascenso a Primeira División. O partido de volta é o domingo ás 21.00 horas en Mallorca.
Falece o deputado do PSdeG por Ourense Raúl Fernández. Así o vén de confirmar o Grupo Parlamentario Socialista, que amosa "o máis sincero agarimo para acompañar a súa familia e amigos no momento máis difícil". "Raúl foi un exemplo de honestidade, bo facer, traballo e dedicación ao longo de toda a súa traxectoria profesional e política, ademais de un compañeiro insubstituíble neste Grupo Parlamentario", agregan. O Parlamento vén de declarar loito oficial polo seu pasamento.
Villares anuncia a ruptura do grupo parlamentario de En Marea no Parlamento galego: o ata agora voceiro e outros tres deputados marchan ao Grupo Mixto, segundo vén de revelar en rolda de prensa. Villares coida que o grupo xa "só representa" a Podemos. Consulta toda a información nesta ligazón
O xornal Gciencia e o proxecto 21 Días co Galego, gañadores dos Premios Rosalía de Castro de promoción da lingua galega. Os galardóns concédeos a Deputación da Coruña. Na imaxe, o xurado do galardón.
Iván Ferreiro, Rozalén, Banda Xangai, Furious Monkey House ou Xosé Lois Romero e Aliboria, entre as principais citas musicais das Festas da Peregrina de Pontevedra, que se celebran o vindeiro agosto co pregón do xornalista Manuel Jabois. O Concello pontevedrés vén de divulgar o programa das súas citas festivas do verán, podes consultalo íntegro nesta ligazón.
Facebook anuncia o lanzamento da súa propia 'moeda' para pagar a través das súas aplicacións. Esta divisa privada recibe o nome de Libra e, de inicio, terá un valor baseado no dólar. Depende formalmente dun consorcio empresarial con sede en Suíza.
A ex-voceira do goberno de Baltar será a primeira deputada de Ciudadanos na Deputación de Ourense. Montse Lama dimitiu do seu posto no goberno de Baltar e abandonou o PP o pasado maio; dende o pasado 26M é concelleira por C's en Xinzo de Limia, onde antes o fora polos populares.
A Liga de Fútbol Profesional (LFP) impide ao Concello da Coruña colocar o vindeiro domingo pantallas xigantes para seguir o segundo partido da final na que o Dépor xoga o ascenso á Primeira. Así o vén de confirmar a alcaldesa da cidade, Inés Rey, na presentación do dispositivo de seguridade do San Xoán, celebración que desta volta cadra co crucial partido do conxunto coruñés fronte ao Mallorca. Recólleo Radio Coruña (Imaxe: Concello da Coruña)
