O Concello de Mazaricos volve despedir o ano co seu "brinde leiteiro" para lembrar o sector do leite na comarca. O acto, organizado polo goberno local, foi conducido por nenas e nenas do municipio, que "reivindicaron a importancia da gandeiría en Mazaricos e o orgullo de vivir" neste concello.
Rafael Rodríguez Villarino, alcalde de Amoeiro, novo secretario provincial do PSdeG en Ourense tras gañar a segunda volta das primarias por 663 votos (64,37%) á deputada Noela Blanco, que conseguiu 352 apoios (34,17%). Villarino únese así a Valentín González Formoso, novo líder do partido na Coruña, Álvaro Santos, en Lugo, e David Regades, en Pontevedra.
A Garda Civil atopa en Rianxo o corpo de Diana Quer, a moza desaparecida na Pobra do Caramiñal en agosto de 2016. Os axentes foron conducidos ao lugar, na parroquia de Asados, polo presunto asasino, detido hai dous días tras tentar atacar outra moza en Boiro. Consulta aquí a información
Rajoy despide o ano dende "Sangenjo" -en referencia a Sanxenxo- na súa conta de Twitter tras participar na inauguración da ponte de Rande.
O derradeiro derbi galego do ano no baloncesto, entre o Breogán e o Coruña, remata con vitoria dos lucenses (84-73), que organizarán a Copa como líderes ao remate da primeira volta da LEB Ouro.
Rajoy pecha o seu primeiro ano de goberno en minoría con todas as súas leis máis polémicas en vigor. O Goberno de España botou man sistematicamente dos vetos para impedir que leis promovidas pola oposición ou as comunidades autónomas chegasen a ser debatidas e puidesen ser aprobadas. Un balance de eldiario.es
Xosé Constenla faise coa XVII edición do Premio Ramón Piñeiro de Ensaio. Foi galardoado pola súa obra O colapso territorial en Galiza. Unha lectura dende o espazo da construción social do país.
Rajoy ratifica que en 2018 entrará en servizo o treito Zamora-Sanabria do AVE. O anuncio, realizado no balance político do ano do presidente do Goberno, prodúcese despois de que Adif contradixese ao ministro e anunciase nas súas previsións oficiais a apertura xa este ano 2017. O 2018 era a data prometida no Pacto do Obradoiro entre Blanco e Feijóo para o remate de toda a liña entre Galicia e a Meseta, adiado agora á próxima década.
Lugonovo advirte de que "non apoiará ningunha moción de censura liderada ou apoiada pola dereita" para desaloxar a socialista Lara Méndez da alcaldía lucense. A formación advertiuno na xuntanza co resto de grupos da oposición tras ao fío da cuestión de confianza perdida pola alcaldesa. Un improbable pacto do PP e Ciudadanos co BNG e ACE sería, daquela, a única fórmula para unha moción de censura.
Os datos definitivos do padrón ratifican que Galicia perdeu 10.000 habitantes en 2016 e fica ao bordo de baixar da barreira dos 2,7 millóns tras encadear sete descensos anuais consecutivos.