A Audiencia Nacional condena o PP e ao seu ex-tesoureiro, Luis Bárcenas, pola reforma da súa sede central da rúa Génova de Madrid (na imaxe) con máis dun millón de euros en diñeiro negro e volve dar por acreditada a existencia dunha 'caixa B' na formación. Por esta peza separada do caso Gürtel, o tribunal impón a Bárcenas dous anos de cárcere, a quen concede a atenuante de confesión, e considera ao partido responsable civil subsidiario do seu delito.
Ana Pontón confirma que opta á reelección como portavoz nacional do BNG na Asemblea que a formación celebra o 7 de novembro na Coruña.
EPA | A poboación ocupada aumentou en 35.800 persoas en Galicia durante o terceiro trimestre do ano e chega aos 1,11 millóns, 29.900 máis que hai un ano, segundo os resultados da enquisa de poboación activa que veñen de ser publicados. No mesmo trimestre, a poboación en situación de desemprego diminuíu en 25.700, ata as 126.700 persoas, o que supón 18.100 menos que no mesmo trimestre de 2020.
📺VÍDEO | A pasada noite desenvolveuse o debate das primarias á secretaría xeral do PSdeG entre Gonzalo Caballero e Valentín González Formoso. O actual secretario xeral e candidato á reelección puxo o foco en que cómpre tempo para desenvolver un proxecto "galeguista, feminista, ecoloxista e, por suposto, de esquerdas" tras un mandato no que, sinalou, o partido "avanzou" en todos os procesos electorais. Formoso afirmou que a súa candidatura pode ser quen de impulsar a formación cara ao Goberno galego e censurou que, con Caballero á fronte, os socialistas volvesen ficar en terceira posición nas eleccións galegas. A votación celébrase o sábado, día 30.
O Parlamento tomba o orzamento en Portugal cos votos en contra da dereita, mais tamén do BE e o PCP, e os únicos a favor do PS. O adianto electoral queda agora en mans do presidente da República, Marcelo Rebelo de Sousa.
'Nación', de Margarita Ledo, preseleccionada para optar ao mellor documental nos Premios Goya.
Está previsto que na noite deste venres reabra o aeroporto de Khartún, en Sudán, onde permanecen os cinco galegos da banda Baiuca desde o domingo polo golpe de estado militar. Atópanse ben xa que a toma do poder colleunos na embaixada española, onde contan con protección. O mánager do grupo, Alan Queipo, de Raso Estudio, confirma a Praza.gal que traballan co obxectivo de que os galegos poidan subir a un avión de volta en canto se recupere a circulación aérea desde a capital do país. "Estamos intentando que volvan o venres pola noite", asegura Queipo. [Na imaxe © Raso Estudio o percusionista Xosé Lois Romero e o artífice de Baiuca, Alejandro Guillán]
A Assembleia da República de Portugal vota hoxe os Orzamentos Xerais para 2022 e serán previsiblemente rexeitados tras non chegar o gobernante PS a un acordo co PCP ou o Bloco de Esquerda. Se as contas non saen adiante, todo apunta a que o presidente da República, Marcelo Rebelo de Sousa (do conservador PSD) optará por disolver a Asemblea e precipitar un adianto electoral no que o primeiro ministro, o socialista António Costa, xa avanzou que recuncaría como candidato. (Foto: © Assembleia da República)
A Comisión de Saúde Pública do Consello Interterritorial de Saúde, conformado polo Ministerio de Sanidade e as comunidades autónomas, aproba administrar "unha dose de recordo" de vacina contra a COVID de Pfizer/BioNTech ou Moderna (de ARNm) á poboación que recibiu a vacina monodose de Janssen. Comezará a ser administrada a partir do 15 de novembro, seguindo a prioridade do plan de vacinación e cando pasasen "cando menos tres meses" tras a primeira inxección. Galicia leva recibidas 122.700 doses da vacina de Janssen. Na imaxe (CC BY-SA Xunta), primeiras vacinas de Janssen chegadas a Galicia, o pasado abril.
O PSdeG convoca para mañá, 26 de outubro, ás 23h o debate entre Gonzalo Caballero e Valentín González formoso, candidatos ás primarias pola secretaría xeral que se celebran o vindeiro sábado. Segundo confirma o comité organizador do proceso electoral interno, o encontro desenvolverase na sede nacional do partido e será retransmitido a través de internet a través das súas redes sociais.
