Fálase

A portavoz nacional do BNG, Ana Pontón, manterá este martes unha reunión institucional co lehendakari Iñigo Urkullu na sede do Goberno vasco en Vitoria. A formación nacionalista traslada que o encontro versará sobre o concerto económico de Euskadi en medio do debate aberto sobre o financiamento autonómico, o papel das forzas nacionalistas no contexto do Estado e o papel da Administración pública para impulsar a ciencia e o coñecemento. Na mesma visita, Pontón reunirase coa dirección do organismo para o desenvolvemento da investigación científica en Euskadi, o Ikerbasque.

O Consello da Cultura Galega entrega as Medallas de Honra da institución ao poeta e director do Instituto Cervantes, Luis García Montero, e á profesora da Universitat de Barcelona Helena González Fernández polo seu "labor a prol do diálogo entre a cultura galega e outras culturas irmás, fraternalmente, por enriba de muros e valados que non están nos nosos corazóns". 

No acto participan o presidente do Parlamento, Miguel Ángel Santalices; o secretario xeral de Política Lingüística, Valentín García; e o presidente da Real Academia Galega, Víctor Freixanes, entre outros. [Fotografía © Xoán Crespo/Xunta]

Michael Woods gaña a segunda tirada da Volta a Galicia, con final no Alto do Ézaro. O canadiano do equipo Israel superou a Alejandro Valverde por 16 segundos e sitúase como o novo líder da proba. O moañés Delio Fernández, sétimo na etapa, é o mellor galego na xeral. Este sábado correrase a terceira tirada, entre Maceda e Luíntra, considerada a etapa raíña da Volta.

O TSXG autoriza prorrogar ata marzo a esixencia do certificado COVID-19 en hospitais e residencias. O Tribunal Superior destaca que o virus “continúa tendo unha elevada circulación” e explica que a medida ten como obxectivo protexer a persoas especialmente vulnerables. As persoas que queiran acceder a un centro hospitalario ou residencial poden presentar un certificado de vacinación, de proba diagnóstica negativa ou de ter pasado a enfermidade; os hospitais ofrecen a posibilidade de someterse voluntariamente a unha proba diagnóstica.

• O Sergas flexibiliza as limitacións para acompañar pacientes coa COVID tras reiteradas protestas das familias

Polònia, o programa de sátira política de TV3, incorpora o personaxe de Feijóo, que comeza propoñendo o seu primeiro gag: “Casado está na ducha, como en Psicose, Ayuso quéreo apuñalar, aparezo eu como salvador e pégolle tres puñaladas”

O dinamarqués Magnus Cort (EF), primeiro líder da volta ciclista a Galicia O Gran Camiño, ao impoñerse nun sprint en Vigo a Giovanni Leonardi (Eolo) e Alejandro Valverde (Movistar). O moañés Delio Fernández (Atum General/Tavira) é o mellor galego, décimo na etapa. Mañá venres, a segunda etapa unirá Bertamiráns e o Alto do Ézaro.

• 512 quilómetros, 8 portos de montaña, 45 concellos: o percorrido d'O Gran Camiño, a volta ciclista galega

Morre o empresario Ángel Martínez, Lito, alcumado como 'o rei das orquestras', tras precipitarse dende a ponte da Barca (Poio) sobre a AP-9. Está a contalo Pontevedra Viva. Martínez, cuxo estado de saúde empeorara moito nos últimos anos, tivo que afrontar multitude de procesos xudiciais polos seus negocios. [Imaxe: © TVG]

Principia no Porriño O gran camiño, a proba coa que Galicia recupera unha carreira ciclista profesional. Esta primeira tirada, de 165 quilómetros, finaliza en Vigo. A competición, que pasará por 45 concellos, ten catro etapas que suman 512 quilómetros e inclúen 8 portos de montaña. [Imaxe: Deputación de Pontevedra]

• 512 quilómetros, 8 portos de montaña, 45 concellos: o percorrido d'O Gran Camiño, a volta ciclista galega
• A 'Volta a Galicia' regresa no 2022 buscando "recuperar o pulo do ciclismo profesional galego"

Antonio López, reelixido como reitor da Universidade de Santiago nas eleccións celebradas este mércores, ás que concorreu como candidato único. López, catedrático de Dereito Financeiro e Tributario, obtivo 1.636 votos: 706 do profesorado doutor, 394 do alumnado, 271 do persoal de administración e servizos e 265 do resto do persoal. 2.211 dos 3.847 votos emitidos foron en branco, informa a USC. [Foto: © Santi Alvite]

Guerra en Europa. Rusia inicia bombardeos contra diversos puntos de Ucraína tras anunciar Putin unha operación militar no país. O presidente ruso xustificou o ataque nunha mensaxe televisada na que o sinalou como "única opción". Diversos medios están a dar conta dos bombardeos, que a ONU reclama cesar decontado para retomar a vía diplomática. A Unión Europea aborda a situación esta mañá nun Consello Europeo extraordinario. Máis contexto do que está a acontecer, durante este xoves en Praza.gal

• Guerra en Europa: Rusia xa bombardea na Ucraína