Fálase

O BOE recolle este venres a contratación dun “servizo de asistencia técnica” na investigación do accidente marítimo do buque Villa de Pitanxo (con base en Marín) que está levando a cabo a Comisión Permanente de Investigación de Accidentes e Incidentes Marítimos. Os traballos encargados consistirán na construción dunha maqueta do naufraxio do barco en augas de Terranova o pasado febreiro, con 21 falecidos e tres sobreviventes. A voceira das familias do Villa de Pitanxo, María José de Pazo, considera “decepcionante” que o Goberno tome esta medida en lugar de ter baixado a inspeccionar a embarcación afundida.

Lucía C. Pan recibirá o Premio Chano Piñeiro do Ourense Film Festival (OUFF) ao talento e o emprendemento audiovisual por “representar dende a fotografía, o talento que aniña no audiovisual galego actual, na súa diversidade de formatos e a súa mestizaxe formal”. “É un premio tamén colaborativo, non só para os equipos de fotografia cos que traballo habitualmente. É un recoñecemento para o resto de departamentos fan forza con nós para construír novas narrativas e poder facer o que facemos”, salientou a premiada.

A directora de fotografía Lucía C. Pan (Cambre, 1984) é a primeira muller na historia en recibir tres premios Mestre Mateo á Mellor Dirección de Fotografía da Academia Galega do Audiovisual. En 2018 foi galardoada polo seu traballo no filme de ficción Dhogs, de Andrés Goteira; o seu segundo Mestre Mateo chegou pola primeira longametraxe de Xacio Baño, Trote; e nesta pasada edición dos premios acadou o terceiro polo filme ¿Qué hicimos mal?, de Liliana Torres.

Adriana Lastra chama “machista, retorcido e mala persoa” a Feijóo despois de que este acusara aos socialistas de aproveitar o seu embarazo para cesala do seu cargo. “Hai que ser machista, retorcido e mala persoa para empregar a decisión persoal dunha muller e intentar facerlle dano ao Presidente. A miña decisión é miña, de ninguén máis, respéctaa, machista”, manifestou a ex vicesecretaria xeral do PSOE Adriana Lastra nas súas redes sociais. 

O paro sobe en 2.062 persoas en agosto en Galicia e sitúase nas 141.912 persoas inscritas nos servizos de demanda de emprego. No conxunto do Estado o desemprego aumentou en 40.428 persoas. O número de traballadores e traballadoras afiliadas á Seguridade Social descendeu en 2.862 persoas. Toda a información, esta mañá en Praza.gal

O incendio declarado na tarde do xoves na parroquia de Parada, en Lobeira, e que afecta ao Parque Natural Baixa Limia-Serra do Xurés, quedou "estabilizado", despois de queimar 40 hectáreas. Outro incendio, en Ribadavia, está a afectar a 30 hectáreas de terreo e aínda permanece activo. En Cenlle, permanece "controlado" o incendio iniciado hai dous días e que arrasou 62 hectáreas.

Cristina Fernández de Kirchner sofre un intento de asasinato ante a súa vivenda. Un home, confundido entre a multitude que se manifestaba en apoio da vicepresidenta arxentina, apuntou un arma cargada contra a súa cabeza e chegou a apertar o gatillo, pero a pistola non se disparou. O agresor, de nacionalidade brasileira, foi detido e o presidente Alberto Fernández decretou que este venres, no que están previstas manifestacións de repulsa, será festivo nacional.

Un incendio declarado na tarde deste xoves na parroquia de Parada, en Lobelle, afecta o Parque Natural Baixa Limia-Serra do Xurés. Segundo as últimas estimacións de Medio Rural, van 35 hectáreas ardidas e o lume “evoluciona favorablemente cara á súa estabilización”. [Imaxe do incendio en Lobelle, de ATBRIF]

• DATOS | O peor verán dos últimos quince anos: os incendios queiman máis de 43.000 hectáreas en mes e medio 

Un furacán formado no Atlántico ameaza Galicia e alerta os meteorólogos. O Centro Nacional de Furacáns dos EUA vén de confirmar a formación deste anómalo ciclón tropical que, segundo a súa traxectoria, podería afectar a Galicia a mediados de setembro ou virar máis cara ao norte. Estao contando GCiencia. 

Os incendios que nos últimos días afectaron a Oímbra e Melón quedaron extinguidos esta noite, despois de queimar 96 e 76 hectáreas, respectivamente. Tamén quedou controlado o incendio que arrasou unhas 62 hectáreas en Cenlle

• O peor verán dos últimos quince anos: os incendios queiman máis de 43.000 hectáreas en mes e medio

A Secretaría Xeral de Política Lingüística confirma que a nova serie baseada nas novelas de Tolkien, ‘O Señor dos Aneis: os aneis do poder’, poderá verse dobrada ao galego e subtitulada na nosa lingua. A serie estréase este venres, 2 de setembro, na plataforma Amazon Prime.