Fálase

O Seminario de Estudos do Valadouro organiza este sábado, 23 de agosto, unha homenaxe en memoria do dramaturgo Manuel Lourenzo, finado o pasado día 10. Será ás 20 horas na Casa da Cultura 'Manuel Lourenzo' do Valadouro, concello natal do artista e do que foi nomeado fillo predilecto. Participará Xesús Pisón cun relatorio, haberá lecturas dramatizadas de textos de Lourenzo a cargo de Santiago Fernández, Inma Orol, Daniel Otero, Sabela Quirós, Helena Cornide e Moncho da Lomba; e as actuacións musicais de Miro Casabella, Ugia Pedreira e Mano Panforreteiro.  [📸 Manuel Lourenzo recollendo o premio de honra na gala dos Mestre Mateo en 2021 © TVG]

O Goberno de España declarará como zonas afectadas por unha emerxencia de protección civil os municipios queimados na vaga de lumes. Pedro Sánchez incide no "compromiso" do Executivo coa veciñanza afectada cara á reconstrución unha vez se extingan as lapas. O Consello de Ministros do vindeiro martes aprobará a declaración de zonas de emerxencia, mentres, o presidente español lembra que permanece activado o mecanismo de protección civil europeo, que permitiu contar con recursos doutros países de Europa na loita contra os incendios. [📸 Sánchez na visita deste domingo a Ourense CC-BY-SA Xunta] 

Luís Insua, do PP, novo alcalde de Fisterra tras triunfar unha moción de censura dos populares co apoio dun edil tránsfuga de Alternativa dos Veciños. A ex-rexedora, Áurea Domínguez, critica os "intereses particulares e espurios" dun acordo que non é público. 

• O PP apóiase en Fisterra nun edil díscolo de Alternativa dos Veciños para gañar a súa oitava alcaldía dende as eleccións

O Sergas restablece desde mañá mércores o servizo en todos os centros de saúde de Ourense tras reparar e garantir as súas comunicacións. Durante o luns e o martes nas zonas afectadas por incendios, con problemas de comunicacións, os servizos sanitarios estiveron centralizados en cabeceiras comarcais, deixando só enfermaría nos centros habituais. Agora retómase o servizo actual tras despregar 14 antenas para satélite e 80 quilómetros de fibra óptica.

Cuarto traballador da loita contra o lume ferido grave na vaga de incendios, con queimaduras de primeiro e segundo grao. O home foi trasladado este luns ao hospital da Coruña, onde xa atendían outros tres brigadistas.

• 70.000 hectáreas de lume en toda Galicia desde que hai 10 días comezou en Chandrexa, onde pulveriza marcas

Ante a multitude de iniciativas para colaborar coas persoas afectadas pola vaga de lumes, a central de emerxencias do 112 Galicia lembra que "para que a axuda sexa efectiva, é necesario facela chegar polas canles axeitadas". Así, sinalan que os puntos de recollida habilitados son os locais de Protección Civil de cada concello. Precísanse batelumes, lentes e luvas de protección e máscaras para evitar respirar as partículas en suspensión que están no aire. 

A Xunta confirma a presenza de mosquito tigre no concello de Bueu. A través da Rede Galega de Vixilancia de Vectores, da que tamén forman parte as Universidades de Vigo e Santiago de Compostela, ampliarase a vixilancia colocando trampas para ver a extensión e abundancia desta especie de mosquito. Bueu únese aos concellos de Moaña, Vigo, Cangas, Redondela, O Porriño e Vilaboa como integrante do comité técnico do mosquito tigre. [Na imaxe, a ilustración dun exemplar de aedes albopictus, o mosquito tigre, incluída no proxecto 'Mosquito alert' CC-BY J.L. Ordóñez]

• HEMEROTECA | A primeira detección do 'mosquito tigre' en Galicia activa os protocolos de prevención das doenzas que transmite

O fume dos incendios segue a repercutir na calidade do aire, sendo moi mala ou pésima en puntos do interior de Galicia, segundo informa Meteogalicia, que pide á poboación que siga as recomendacións. 

Nas fins de semana de agosto Praza.gal non actualiza as súas informacións por descanso do persoal, pero nesta e ante o extraordinario da crise de incendios divulgamos os datos oficiais. Tamén vos deixamos moitas outras pezas para lerdes e o luns estamos de volta.

👉 praza.gal/faitedepraza

A ministra de Traballo, Yolanda Díaz, critica as condicións laborais nas brigadas privatizadas. Nunha manifestación en Nigrán en favor de Palestina, e preguntada polos lumes, Díaz salientou que este persoal de extinción traballa en “condicións de precariedade” e  “insoportables”. A líder de Sumar advertiu que a causa da “emerxencia climática” a situación irá “a peor”. “Pido que a política forestal e de incencios no país sexa preventiva, non serve de nada chegar cando o lume está prendido”, aseverou, para a continuación criticar as numerosas plantacións de eucaliptos e a privatización das brigadas forestais en Galicia.

📸 Na imaxe, a protesta en solidariedade co xenocidio que Israel está a cometer en Palestina en Praia América, Nigrán. Ao paso dos manifestantes, todos vestidos de negro, os bañistas puxéronse en pé e aplaudiron CC-BY-SA Praza.gal