O Goberno galego contratou hai un ano a elaboración dun “centro de datos único e fiable” sobre residentes que mellorase as “solucións de continxencia” previas e agora tramita o decreto co que imporá o seu uso 

A Consellería de Política Social está a tramitar un proxecto de decreto co que regulará un novo sistema de rexistro dixital “permanentemente actualizado” sobre as persoas usuarias de residencias de maiores e discapacidade. O Goberno galego contratou hai un ano a elaboración dun “centro de datos único e fiable” sobre as persoas residentes que mellorase as “solucións de continxencia”, algunhas mesmo manuais, implantadas coa chegada da pandemia da COVID-19 hai tres anos para supervisar a esas persoas e os centros nos que residen. 

Agora tramítase o decreto que dará amparo legal a ese novo sistema informático e imporá o seu uso a todos os centros públicos ou privados. O texto está a exposición pública ata o 1 de marzo e que despois aínda debe ser aprobado polo Consello da Xunta.

Tras a chegada da COVID a Galicia hai agora tres anos a Xunta tardou ano e medio en dotarse dun sistema estable de rastrexo da enfermidade. E non encargou o que denomina “centro de datos único e fiable” sobre as persoas residentes en centros de maiores ata hai agora dous anos. Fíxoo de forma “urxente”, pero o contrato non foi asinado ata decembro de 2021.

A Xunta admitiu que a pandemia evidenciou "debilidades importantes" do seu anterior sistema de rexistro e agora busca "unha resposta inmediata"

Ese novo sistema informático, segundo admitiu a propia Xunta, está chamado a poñer solución ás “debilidades importantes, especialmente en relación coa coordinación co sistema sanitario” dos múltiples sistemas anteriores, que segundo Política Social obrigaron desde o comezo da pandemia a solucións “de continxencia” ou revisións manuais de listados nun proceso “non exento de erros”.

Porque a normativa existente anteriormente só fixaba a obriga a centros e programas de servizos sociais de contar cun rexistro de altas e baixas de persoas usuarias e cun expediente individual de cada unha delas, pero non se establecían os requisitos do mesmo máis alá de que debía ser un “libro de rexistro de persoas usuarias, en soporte físico ou dixigal, permanentemente actualizado” cos datos identificativos das persoas usuarias, a data de nacemento, as datas de alta e baixa e os motivos desta. Eses datos eran custodiados nos propios centros “en rexistros físicos ou dixitais” aos que podían acceder os inspectores da Xunta nas súas visitas presenciais ou mediante requirimentos de envío. 

Pero segundo admite agora a Xunta na exposición de motivos do novo decreto “estas vías de comprobación se ben resultan eficaces, na maioría das situacións presentan o inconveniente de non ofrecer unha resposta inmediata para as actuacións de control, principalmente nas situacións de urxencia ou excepcionalidade”. E iso foi o que pasou coa COVID, cando se fixo “necesario coñecer e rexistrar diariamente as infeccións das persoas que efectivamente residían nestes centros”.

O sistema electrónico que se creou coa COVID, di a Xunta, estivo lexitimado "en virtude da situación de emerxencia sanitaria", que o Goberno galego levantou en outubro de 2021, e agora tramítase o decreto para regular o novo sistema contratado hai un ano

“O sistema de comunicacións electrónicas e telefónicas cos que se iniciou o control da incidencia da COVID-19 en marzo de 2020 pronto demostrou a necesidade de contar cun procedemento que puidese manter a información continuamente actualizada”, di a Xunta, polo que se creou un sistema de información electrónico, denominado Censo de Residentes ou CENRES, “como un rexistro de persoas usuarias que duplicaba o existente en cada centro, estando lexitimada a súa existencia e o tratamento de datos en virtude da situación de emerxencia sanitaria”. 

Esa emerxencia sanitaria foi levantada pola propia Xunta hai máis dun ano, o 21 de outubro de 2021. Pero é agora cando se tramita o decreto co que se regulará o novo censo único en tempo real. 

Segundo o proxecto de decreto agora exposto ao público co que se modificará o anterior decreto de 2011 “todos os centros e programas de servizos sociais” deben “contar cun rexistro de altas e baixas de persoas usuarias e cun expediente individual de cada unha delas”. O rexistros “no caso dos centros residenciais de persoas maiores e de persoas con discapacidade realizarase en soporte dixital mediante o sistema facilitado pola administración autonómica”. 

O texto permite á Xunta impoñer tamén ás residencias privadas o sistema informático cuxo deseño e implantación contratou hai un ano

Isto é, o texto permite á Xunta impoñer tamén ás residencias privadas o sistema informático cuxo deseño e implantación contratou hai un ano. O resto de centros e programas de servizos sociais que non sexan residenciais “poderán empregalo de forma voluntaria sempre que este se adapte ás súas necesidades de rexistro”.

O novo rexistro electrónico de residentes actualizado, sinala a Xunta agora, “resulta un instrumento esencial para a coordinación sociosanitaria”, isto é, entre as residencias e o sistema sanitario. “Supón unha maior garantía na veracidade da identidade das persoas residentes que facilita o intercambio de información” entre os dous ámbitos “cumprindo as condicións de confidencialidade esixibles nestes casos”.