elDiario.es revela que 272 adxudicacións directas á empresa do irmán da secretaria xeral da Presidencia para rexistrar marcas da Xunta suman máis de 782.000 euros dende 2018
A Xunta adxudicou nos últimos sete anos 272 contratos menores á empresa Gallaecia Patentes y Marcas S.L. que suman 782.666 euros. Foron para xestionar rexistros de marcas propiedade do Goberno galego, tales como as do Xacobeo 2021 e as súas derivadas. Tamén para xestionar conflitos na materia no nome da Administración autonómica, como evitar que un particular inscribise ao seu nome as marcas Xacobeo Radio e Xacobeo TV.
Ese cómputo total de adxudicacións publicouno este luns o xornal elDiario.es nunha información na que revela que o propietario de Gallaecia Patentes y Marcas S.L. é Joaquín Cuíña. Trátase do irmán de Beatriz Cuíña, secretaria xeral da Presidencia da Xunta e, dende hai década e media, alto cargo da máxima confianza de Alfonso Rueda, con quen tamén exerceu postos similares -a secretaría xeral- nos seus anos como vicepresidente e conselleiro da Presidencia.
Os contratos menores, pola súa propia natureza, son figuras que non requiren concurso público. Os gobernos poden adxudicalos directamente "a calquera empresario con capacidade de obrar" e "habilitación profesional necesaria" sempre e cando non superen os 15.000 euros, para subministros ou servizos, ou os 40.000 para as obras.
Pontón coida que este é "un novo caso de chanchullos do PP" e insta a Rueda a comparecer na investigación, xa que "o salpica directamente". Besteiro advirte de que Cuíña "non é un cargo calquera" e pedirá a súa comparecencia na comisión
Tras a publicación desta información tanto o BNG coma o PSdeG avanzaron a súa intención de pedir contas ao Goberno. E de facelo na comisión de investigación que, por iniciativa do Bloque a través do mecanismo que permite abrir unha destas pescudas por lexislatura sen apoio da maioría, foi concibida para indagar nas adxudicacións de emerxencia da Xunta na pandemia da COVID e mais no sobrecusto de 470 millóns no hospital de Vigo certificado polo Consello de Contas.
Para a portavoz nacional do BNG, Ana Pontón, este é "un novo caso de chanchullos do PP" mediante o "nepotismo" e a "corrupción". Rueda, defende, ten que "dar explicacións ante un caso gravísimo que o salpica directamente" e que, di segue "exactamente o mesmo modus operandi" ca outros sinalados pola formación soberanista. "Contratos a dedo a empresas vinculadas a cargos do PP que non teñen reparo en meter a man na carteira dos galegos e das galegas para que os seus familiares se lucren", acusa.
Pontón asegura ver neste caso "un motivo máis para que Rueda compareza na comisión de investigación", que principia os seus traballos este martes e onde, di, o BNG quere "destapar todo o que o PP quere agochar, sacar a luz 15 anos de chanchullos do goberno do Partido Popular". O alcance das pescudas estará condicionado, en calquera caso, por unha maioría absoluta do PP que xa propiciou, de entrada, que a comisión estea presidida por unha das súas deputadas, a lucense Elena Candia.
Rueda defende as adxudicacións como "normais" e "transparentes"
Para o PSdeG, esta sucesión de contratos recompilada por elDiario.es é motivo dabondo para citar a Beatriz Cuíña nesta comisión. Mais tamén, advirte o seu secretario xeral, para que o propio Rueda dea "explicacións". Cómpre, di José Ramón Gómez Besteiro, coñecer "toda a verdade" sobre "unha práctica xeneralizada no PP para beneficiar a familiares de cargos da Xunta".
Incide Besteiro en que Beatriz Cuíña "non é calquera cargo". "Ostenta unha posición de máxima confianza de Rueda". Unha vez "coñecida a verdade" na comisión, agrega o socialista, o caso "pode derivar na vía xudicial".
Rueda, pola súa banda, desbota calquera irregularidade. As adxudicacións á empresa de Cuíña foron "fiscalizadas por intervención" en procedementos "normais" e "transparentes". A súa elección respondeu ás "necesidades" dos departamentos que as adxudicaron, agregou en resposta a preguntas dos xornalistas tras o Consello da Xunta.
