Con telepeaxe e primando as viaxes recorrentes: así quedan as rebaixas da AP-9 a 27 anos da fin da concesión

As rebaixas na AP-9 para os vehículos lixeiros requirirán dun sistema de telepeaxe © Audasa

Hemeroteca

Segundo o ministerio, “o 19,4% dos tránsitos que realicen os vehículos lixeiros nos treitos de pago directo pasarán a ser gratuítos fronte ao 8% previo"

“Previsiblemente, esta mesma semana”, despois de que o Consello de Ministros deste martes aprobe o decreto que as regula e entre en vigor ao día seguinte da súa publicación no BOE, comezarán a ser efectivas para os usuarios as novas rebaixas de peaxes na AP-9, que chegan a 27 anos do remate da concesión da autoestrada, o 18 de agosto de 2048. Este luns a ministra de Transportes, Raquel Sánchez, concretou na Coruña os detalles das bonificacións, que no caso dos vehículos lixeiros só serán aplicables con dispositivo de telepeaxe e primarán as viaxes recorrentes. 

Segundo os datos facilitados polo ministerio, “de media uns 61.485 usuarios únicos pagan por recorrer a estrada cada día laborable” e coas novas rebaixas “o 19,4% dos tránsitos que realicen os vehículos lixeiros nos treitos de pago directo pasarán a ser gratuítos de forma inmediata fronte ao 8% previo”.

Cargos socialistas e, ao fondo, o vicepresidente primeiro da Xunta, na presentación na Coruña das rebaixas na AP-9 por parte da ministra de Transportes, no centro vestida de marrón © Ministerio de Transportes

O camiño para chegar a estes descontos iniciouse en xaneiro de 2020, co acordo de investidura polo que o BNG apoiou a Pedro Sánchez

O camiño para chegar a estes descontos iniciouse hai ano e medio, en xaneiro de 2020, co acordo de investidura polo que o BNG apoiou a Pedro Sánchez como presidente do Goberno de España a cambio, entre outras cuestións, da transferencia da AP-9 a Galicia, aínda non concretada e pendente da súa tramitación no Congreso dos Deputados, e dunha rebaixa das peaxes para os usuarios “recorrentes”. Posteriormente, a finais do pasado ano o Ministerio de Transportes incluíu nos seus orzamentos para este ano partidas por 55 millóns de euros para rebaixar as peaxes pero matizando ao tempo que a medida requiriría dunha tramitación administrativa para consolidala no tempo en anos sucesivos.

Foi o pasado abril cando o daquela ministro José Luis Ábalos avanzou a data en que esa tramitación podería estar lista e amosou a súa esperanza en que as rebaixas estivesen implantadas “en xullo”. E o pasado 13 de xullo o Consello de Ministros autorizou de xeito excepcional o compromiso de gasto plurianual nos orzamentos do Estado para facer fronte ás rebaixas ata o remate da concesión da autoestrada, en 2048, que o Ministerio de Transportes cuantifica en 2.300 millóns de euros.

Agora, tras avanzar este domingo o presidente Pedro Sánchez que este martes o Consello de Ministros aprobará definitivamente as rebaixas, este luns a nova ministra de Transportes, Raquel Sánchez, concretounas. Son estas:

Vehículos lixeiros

As bonificacións para vehículos lixeiros requirirán dispoñer de sistema de telepeaxe

Todas as bonificacións para vehículos lixeiros requirirán dispoñer de sistema de telepeaxe:

  • Gratuidade de todas as viaxes de volta con telepeaxe: Será gratis o 100% das viaxes de volta todos os días do ano para os vehículos lixeiros sen que teñan que facer un mínimo de viaxes ao mes. Considerarase viaxe de volta cando se realice en sentido inverso no mesmo traxecto dentro das 24 horas seguintes á viaxe de ida, sen necesidade de que se produza no mesmo día natural. Ata agora a concesionaria tiña un desconto do 25% para a viaxe de volta dentro do mesmo día laborable en calquera treito e, por outra banda, o Estado asumía a gratuidade da viaxe de volta entre Vigo e Pontevedra tamén en días laborables.
  • Bonificación a maiores do 20% para quen faga máis de 20 viaxes ao mes: Tamén aplicable só con sistema de telepeaxe, ademais do desconto anterior nas viaxes de volta, os vehículos que fagan máis de 20 viaxes mensuais en calquera treito, que se poden contabilizar como 10 viaxes de ida e volta ao mes, terán un desconto adicional do 20% nas viaxes de ida. Para o cómputo só se terán en conta dúas viaxes ao día, unha en cada sentido da circulación, e aínda que inicialmente se cobren integramente, "a final de mes Audasa realizará un abono polo importe correspondente", segundo indica o ministerio. 
Cabinas de peaxe da AP-9 © Audasa
  • Rebaixa a maiores do 50% da ida en viaxes de ida e volta entre Vigo e Tui como alternativa á A-55: De xeito adicional aos descontos anteriores, nos treitos da AP-9 entre Puxeiros, en Vigo, e Tui rebaixarase a peaxe nun 50% tamén nas viaxes de ida que formen parte de idas e voltas con menos de 24 horas de diferencia. Isto é, se entre Vigo e Tui a peaxe son 2,80 euros, e a ida e volta actual polo tanto 5,60 euros, coas novas rebaixas pagarase por toda a ida e volta só 1,40 euros. A medida pretende incentivar que o tráfico empregue a autoestrada como alternativa á autovía A-55, especialmente perigosa entre Vigo e O Porriño.
  • Gratuidade do treito Redondela-Vigo para as viaxes de ida e volta: O treito Redondela-Vigo, que aínda ten peaxe (un euro para os vehículos lixeiros) malia ter inferior recorrido que O Morrazo-Vigo xa liberado del, deixará de tela para as viaxes de ida e volta que se fagan nun prazo de 24 horas. Pola contra, seguirase a cobrar peaxe se só se fai unha viaxe de ida pero sen volta. O ministerio responde así á reclamación da veciñanza da zona cuxa alternativa para entrar en Vigo é unha estrada nacional convertida na práctica nunha travesía urbana moi lenta e sobrecargada de tráfico. No seu momento o PP prometera quitar a peaxe nese treito a cambio de subilas no resto da autoestrada.

Vehículos pesados

As bonificacións para os vehículos pesados non precisarán de sistema de telepeaxe.

As rebaixas para os vehículos pesados non precisarán de dispositivo de telepeaxe, como si será necesario para outros descontos:

  • 20% de desconto en todos os recorridos da autoestrada e calquera día da semana
  • Gratuidade do treito Redondela-Vigo: Neste treito, que dá acceso a unha boa parte do porto de Vigo, tamén os vehículos pesados terán unha bonificación do 100% da peaxe, co que se pretende desviar o tráfico da estrada convencional á autoestrada.

Estas rebaixas tanto para vehículos lixeiros como para pesados súmanse ás xa existentes, tamén sufragadas con cargo aos orzamentos do Estado, que supoñen a gratuidade entre O Morrazo e Vigo e entre A Coruña e A Barcala. Os outros dous grandes treitos sen peaxe da autoestrada, entre Fene e Ferrol e na circunvalación de Vigo, son froito da ampliación da concesión da autoestrada ata o máximo legal, ata o 18 de agosto de 2048, decidida hai dúas décadas polo Goberno de José María Aznar antes de privatizar o que daquela era unha empresa pública.

Importes oficiais das peaxes da AP-9 sobre os que agora se aplicarán as rebaixas © Audasa

Despece

  • O BNG observa nos descontos da AP-9 «un paso adiante moi importante» e a Xunta di que os ve insuficientes

    Néstor Rego, deputado do BNG no Congreso, tras a presentación dos descontos da AP-9, no exterior da Delegación do Goberno de España en Galicia (A Coruña) CC-BY-NC-SA BNG

    D.L.

    O Goberno de España optou por presentar os detalles dos descontos na Autoestrada do Atlántico nun acto oficial con convite a outras Administracións e a representantes das forzas políticas, no canto de facelo cun formato de rolda de prensa da ministra ou do delegado do Executivo en Galicia. Entre os asistentes á presentación, celebrada na Delegación do Goberno de España en Galicia, figuraban alcaldesas e alcaldes de localidades polas que pasa a AP-9, o vicepresidente da Xunta, Alfonso Rueda, ou o deputado do BNG no Congreso, Néstor Rego.

    Rego (BNG): "É a primeira vez en corenta anos que se produce unha baixada significativa das peaxes desta autoestrada, congratulámonos de que o esforzo dea resultados"

    Ao termo do acto, Rego saudou o anuncio como un "paso adiante moi importante" en tanto que, subliña, supón "aplicar as medidas previstas no acordo de investidura" rubricado polo Bloque co PSOE e "vai beneficiar a todos os galego se galegas". "É a primeira vez en corenta anos que se produce unha baixada significativa nas peaxes desta autoestrada" e "congratulámonos de que o esforzo dea resultados", sinala o deputado nacionalista. "En todo caso -agrega- o BNG seguirá traballando por máis e mellores descontos e mesmo para conseguir, máis cedo que tarde, unha AP-9 galega e e sen peaxes".

    Alfonso Rueda, durante a presentación dos descontos da AP-9, flanqueado pola alcaldesa da Coruña, Inés Rey, e pola secretaria de Estado de Transportes, Isabel Pardo de Vera CC-BY-SA Xunta

    Rueda di esperar que os descontos "se apliquen de maneira inmediata". A ministra prevé que estean en vigor xa a vindeira fin de semana

    O vicepresidente Rueda, pola súa banda, di observar como "completamente insuficientes" os descontos, concretamente no que atinxe ao tráfico de vehículos pesados, xa que di xulgar que deberan ser do 60% e non do 20%. Tamén di esperar que os descontos se "apliquen de maneira inmediata" -a ministra de Transportes, Raquel Sánchez, di prever que estean en vigor xa na vindeira fin e semana, unha vez aprobados definitivamente este martes en Consello de Ministros- porque "os compromisos, ademais de anuncialos, hai que cumprilos" e estas bonificacións "xa estaban anunciadas" en xaneiro. 

    En calquera caso, Rueda asegura "celebrar" que "o Goberno comprendese a postura da Xunta". O popular mantén que foi o Executivo do PP o que advertiu que "nos últimos anos" a "evolución das peaxes" da Autoestrada do Atlántico estaba a "convertese nun problema para as familias, os traballadores e as empresas".

    Caballero: "Cumprimos con Galicia"

    Tamén o secretario xeral do PSdeG, Gonzalo Caballero, participou no acto organizado por Transportes na Coruña. Para Caballero, a "rebaixa histórica" das peaxes é unha "excelente noticia" que, resalta, "leva o selo do Partido Socialista". É a demostración, coida, de que "cumprimos con Galicia".

    "Era unha demanda histórica e tivo que ser un Goberno do PSOE quen a leve adiante", resalta o secretario xeral do PSdeG

    Diminuír o custo de circular pola Autoestrada do Atlántico "era unha demanda histórica e tivo que ser un Goberno do PSOE, presidido por Pedro Sánchez, o que a leve adiante", defende o dirixente socialista, que di agardar que tanto o PP como o BNG "recoñezan que o Goberno de España cumpre nesta rebaixa". Neste sentido, Caballero coida que cómpre lembrar que estas descontos están incluídos nos Orzamentos Xerais do Estado para 2021 e que tanto o Bloque como o PP votaron en contra, polo que se trata, defende, dunha "boa nova que leva o selo do PSOE".

    Gonzalo Caballero, en rolda de prensa este 26 de xullo CC-BY-NC-SA PSdeG
  • David Reinero

    David Reinero

    Xornalista de datos máis que de anécdotas, forma parte da redacción de Praza Pública desde 2016 tras facer de todo en El País, Xornal de Galicia e Atlántico Diario

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza