A directora de Turismo de Galicia durante a última década, na que cedeu ao clúster de empresas do sector o deseño e execución de políticas públicas, será a candidata na súa vila dun PP co 22% dos votos nos últimos comicios, que consolidaron a alcaldía do BNG
Xa foi alcaldesa de Ponteareas entre 2000 e 2003, cando o seu pai, no cargo desde 1968, llo cedeu ao ser condenado por falsidade en documento público. E agora, tras unha década á fronte de Turismo de Galicia na que foi entregando progresivamente ao clúster de empresas do sector o deseño e execución das políticas turísticas, Nava Castro volve á política local para tentar remontar nas elección municipais do próximo 28 de maio o escaso 22% dos votos que obtivo o PP nos comicios de 2019, que consolidaron a alcaldía do BNG.
O PPdeG decide agora presentar a Nava Castro como candidata en Ponteareas xusto dúas décadas despois de que o seu desencontro cos populares dese en 2003 a alcaldía da vila á esquerda por primeira vez.
A marcha de Castro da Xunta chega despois dun dobre ano Xacobeo no que a área de Turismo foi especialmente agraciada nos orzamentos e pasou a depender directamente do presidente, Alfonso Rueda, que con este paso, unido ao traslado de Jesús Vázquez Almuiña da presidencia do Porto de Vigo á candidatura popular en Baiona, parece querer remontar os malos resultados do PP de Pontevedra que el presidiu ata hai uns meses.
En 2003, logo de suceder o seu pai tras ser condenado, Nava Castro presentouse co seu propio partido e a falta de acordo co PP deu a alcaldía por primeira vez á esquerda, unha de cuxas primeiras decisións foi retirar o busto de Franco que os Castro mantiveran na Praza Maior
Nava Castro entrou en política da man do seu pai, José Castro, alcalde de Puenteareas, como el se refería á súa vila, entre 1968 e 2000. Ese ano o pai cedeu á filla a alcaldía ao non obter a totalidade do indulto que pedira ao Goberno de Aznar tras a súa condena por falsidade en documento público. Aznar librouno de entrar na cadea, pero Pepe Castro tivo que deixar a alcaldía, que ocupaba coa súa propia formación, Unión Condado-Paradanta (UCPA), creada tras deixar o PP ao ver medrar as súas causas xudiciais.
Pepe Castro deixou a alcaldía, pero os Castro seguiron gobernando Ponteareas. Nava Castro encabezou en 2003 o partido independente do seu pai e foi a candidata máis votada, pero a falta de acordo co PP facilitou que por primeira vez a esquerda gobernase Ponteareas. A alcaldía, malia que o BNG obtivo 5 edís, foi para o PSdeG con só 2 porque así o quixo o PP. E unha das primeiras decisións daquel novo goberno foi retirar o busto de Franco que os Castro mantiveron na Praza Maior da vila durante os seus mandatos.
Un ano máis tarde, en 2004, o PP e os Castro se reconciliaban e impulsaban unha moción de censura que daba a alcaldía ao popular Salvador González Solla. Nos anos seguintes a UCPA integrouse no PP, Nava Castro obtivo un escano no Congreso, e coa chegada de Feijóo á Xunta en 2009 foi nomeada primeiro directora xeral de Comercio e en 2013 de Turismo.
Nese último posto estivo ata agora, durante unha década na que a Xunta foi deixando as súas políticas turísticas progresivamente en mans privadas, da denominada Asociación Clúster Empresarial de Turismo de Galicia. Creada a finais de 2013, coincidindo coa chegada de Castro ao cargo, a asociación non só está a executar ela con cartos públicos actividades de promoción de Galicia que antes realizaba a Xunta senón que foi encargada de elaborar, mesmo a través de subcontratacións, a planificación estratéxica de Turismo de Galicia, isto é, o deseño das políticas públicas do sector. Un sector ao que a Xunta regou con importantes cantidades de cartos públicos nos últimos anos tanto pola coincidencia de dous anos xacobeos consecutivos como polas diversas liñas de subvencións relacionadas coa pandemia da COVID.
O PP parecer ver agora unha posibilidade de remontar en Ponteareas tras a morte en maio de 2021 do alcalde do BNG Xosé Represas
Tras esta década pasada á fronte de Turismo de Galicia, e cando a Xunta prepara agora toda unha nova “década xacobea” por diante, Castro volve a unha Ponteareas na que o traballo de fondo do BNG contra o seu pai acabouno levando á alcaldía en 2015. En 2019 os nacionalistas, encabezados por Xosé Represas e co apoio do histórico Roberto Mera, consolidaron a súa posición co 34% dos votos, fronte ao 22% do PP. Pero Represas morreu en maio de 2021 e o PP parece ver agora unha posibilidade de remontar.
