Tras sucesivas críticas ao TSXG por parar cautelarmente proxectos mentres analiza a súa legalidade, a conselleira de Industria, María Jesús Lorenzana, advirte agora do "risco que supón instrumentalizar o dereito para bloquear proxectos industriais"
A Xunta leva meses criticando abertamente ao Tribunal Superior de Xustiza de Galicia (TSXG) por suspender cautelarmente ducias de parques eólicos mentres analiza a súa legalidade ante o risco de que o dano que provoque a súa construción sexa irreversible. Faino malia que o Tribunal Supremo xa avalou algunha desas paralizacións e mesmo ratificou sentenzas que condenaron en firme a ilegalidade de varios proxectos.
Neste contexto, este xoves o Goberno galego volveu elevar o ton. A conselleira de Economía e Industria, María Jesús Lorenzana, advertiu nun acto con mulleres do mundo do dereito sobre "o risco que supón instrumentalizar o dereito para bloquear proxectos industriais". "Estamos nun momento en que está en risco a separación de poderes consagrada na Constitución", asegurou a conselleira.
Segundo a conselleira, "a seguridade xurídica, política, e tamén social son factores clave para que un proxecto industrial saia adiante", mentres que en Galicia, dixo, "estamos percibindo como moitos son boicoteados".
Lorenzana defende a planificación e "un exercicio moi avanzado do dereito administrativo" mentres a Xunta ten pendente un novo Plan Eólico e recorre ás leis de acompañamento
Lorenzana, malia diversas condenas en firme da Xunta por tramitar proxectos de todo tipo ilegalmente, mesmo chegou a salientar que "as políticas públicas teñen que nacer da seguridade xurídica, dunha boa planificación, da transparencia e dun profundo respecto pola legalidade e polos dereitos das persoas". Unha apelación á planificación que chega cando a Xunta aínda non foi quen de formalizar o contrato para elaborar un novo Plan Eólico, anunciado polo presidente Rueda hai case 14 meses e comprometido por lei por Feijóo en 2009.
Por outra banda, mentres a Xunta ten en tramitación no Parlamento a lei de acompañamento dos orzamentos a través da que muda de xeito acelerado e con menos debate moitas outras leis, entre elas as dos sectores ambiental e eólico, este xoves Lorenzana gabouse de que a política industrial e económica da súa consellería "sería absolutamente imposible de levar a cabo sen un exercicio moi avanzado do dereito administrativo".
Estas declaracións da conselleira chegan dúas semanas despois de que o presidente Rueda, preguntado sobre posibles accións contra maxistrados implicados na suspensión cautelar de proxectos industriais, respondese deixando abertas posibilidades: "Non sei o que pode pasar no futuro". Uns días antes era o portavoz parlamentario do PPdeG, Alberto Pazos, quen criticaba o TSXG polas súas decisións contrarias aos seus intereses: "Son ganas de enredar", dicía.
