"O Goberno central xa non pode esconderse en palabras ambiguas nin continuar de perfil: ten que actuar para apoiar este proxecto", di Millán Mon
Francisco Millán Mon e Adrián Vázquez, deputados do PPdeG no Parlamento europeo, demandan a Pedro Sánchez "que non obstaculice o acceso aos fondos europeos e á conexión eléctrica" que Altri "necesita" para poder iniciar a actividade da súa macrocelulosa en Palas de Rei.
"O Goberno central xa non pode esconderse en palabras ambiguas nin continuar de perfil: ten que actuar para apoiar este proxecto que supón unha gran oportunidade para a modernización e o desenvolvemento económico de Galicia", afirma o eurodeputado pontevedrés Millán Mon nun comunicado remitido polo PPdeG este domingo, onde inciden en que os fondos Next Generation aos que opta o proxecto de Altri "dependen do Executivo de Sánchez".
Os representantes do PP galego en Bruxelas defenden o traballo "rigoroso" dos "técnicos" e "funcionarios independentes da Xunta" e "celebran" a aprobación da "declaración de impacto ambiental que, partindo de criterios obxectivos, foi aprobada favorablemente e se apoia en 34 informes por parte de 42 técnicos", segundo manifestan no seu comunicado.
Vázquez afirma que os partidos da oposición "sempre se van queixar", "digan o que digan os estudos de avaliación ambiental", porque "viven da confrontación e están moi cómodos no canto peor mellor"
Ambos parlamentarios reivindican que o proxecto de Altri é "un bo medio de innovación industrial e creación de emprego". "Poucos argumentos poderán atopar en Madrid para parar un proxecto que é viable e seguro e que ademais conta co aval europeo", advirte Adrián Vázquez, que sentenza: "A pelota está no tellado de Sánchez".
"Se nega os fondos a Altri quedará en evidencia algo que xa sabiamos: que ten máis interese en prexudicar ao Partido Popular que en beneficiar a Galicia, e que lle importa máis o futuro do señor Besteiro e da señora Pontón que o futuro dos galegos e galegas", agrega o eurodeputado.
"O BNG, as súas asociacións e toda a esquerda en xeral están mobilizados contra este proxecto. Pero non por verdadeiras cuestións de fondo, senón por claros intereses partidistas e prexuízos ideolóxicos", insiste Millán Mon a respecto das últimas mobilizacións contra a macrocelulosa, como a que o pasado sábado reuniu milleiros de persoas por terra e por mar na Pobra do Caramiñal.
Na mesma liña, Adrián Vázquez afirma que os partidos da oposición "sempre se van queixar", "digan o que digan os estudos de avaliación ambiental", porque "viven da confrontación e están moi cómodos no canto peor mellor".
