A orde fixada polo presidente da Xunta para a súa primeira xira polas sete principais cidades, por poboación en sentido decrecente, deu lugar a que os encontros nas urbes que levan máis tempo sen goberno do PP, Lugo e Pontevedra, cadrasen unha a continuación da outra. En ambas o bastón de mando está na banda da esquerda dende 1999, co PSdeG na alcaldía en todos os mandatos no caso lucense e o BNG, no caso pontevedrés, e nas dúas Alfonso Rueda vén de anunciar que accede -cando menos, verbalmente- a proxectos reclamados dende cadanseus gobernos locais e que foran adiados ou, cando menos, evitados por Feijóo.
Vinte e catro horas despois do seu paso por Lugo, onde accedeu a cofinanciar o Museo da Romanización que desbotou en 2019 tras procurar o Concello 12 millóns da UE, Rueda viaxou a Pontevedra para atoparse co seu rexedor, o nacionalista Miguel Anxo Fernández Lores. Entre outros asuntos, o xefe do Executivo galego dixo estar disposto a que a Xunta "participe" na reforma do convento de Santa Clara, o histórico recinto do centro da cidade mercado polo consistorio en 2021 e que a institución municipal, xunto coa Deputación, xa están a recuperar.
Di Rueda que o seu Goberno non quere "quedar fóra" de Santa Clara e por iso, di, está disposto a achegar fondos. A súa "cantidade e intensidade", matiza, definiraos cando coñeza "en detalle" o plan para a rehabilitación. Lores coida que, con esta resposta, Rueda dá a entender que "entende a importancia para a cidade deste edificio" como un novo espazo para o complexo do Museo de Pontevedra.
"Santa Clara -di Lores- ten que contar coa colaboración da Xunta, tal e como de xeito histórico se fixo co Edificio Castelao" do Museo". "Hai ese compromiso" e por iso, "unha vez que se saiba que se pode avanzar", concretarase, confía.
Ao remate do encontro, Rueda bosquexou tamén outra das "actuacións fundamentais" que expuxo ao alcalde, un "proxecto ambicioso para recuperar o espazo emblemático do Pazo de Lourizán". O histórico recinto está en proceso de ser cedido pola Deputación pontevedresa á Xunta tras acordáreno o pasado verán despois de que, en febreiro deste ano, o Goberno galego fose condenado a rehabilitalo nunha sentenza que adquiriu firmeza en maio. En anos previos, a Xunta negárase a facelo se a Deputación, gobernada por PSdeG e BNG, non accedía a ceder o pazo a Ence.
O alcalde destaca o ton "cordial e construtivo" da xuntanza co presidente, pero lamenta que o Goberno galego siga sen ter "oco dentro dos seus plans" para a variante de Alba malia ser "unha necesidade imperiosa para as infraestruturas de Pontevedra"
Fora o propio Rueda, en calidade de vicepresidente, un dos representantes da Xunta que pulara por esa cesión do pazo á pasteira. No entanto, este martes non mencionou á compañía no seu anuncio, que consistiu en avanzar qu een 2023 "se convocará un concurso de ideas en colaboración con Fundación RIA, ligada ao arquitecto David Chipperfield" para a recuperación do espazo, que terá "orientación pública e relacionada co forestal, compoñente que sempre tivo", pero agora combinada co "uso turístico".
Estes acordos e anuncios nunha xuntanza que Lores define como de "ton cordial e construtivo" contrastan con puntos de diverxencia como o relativo á construción da variante de Alba. O que para o goberno local de Pontevedra é "un tema estrela", lamenta Lores, non ten "oco de seu dentro dos plans da Xunta para Pontevedra". "Non compartimos este posicionamento, e cremos que é unha responsabilidade súa e que algún día a terán que facer, pois é unha necesidade imperiosa para as infraestruturas de Pontevedra rematar esa circunvalación de Pontevedra interior, conectando todas as parroquias", sinala o rexedor nacionalista.
