Rueda anunciou a suspensión das clases e do transporte escolar malia a activación do nivel 3 de Emerxencia posterior e as indicacións estatais de abrir para facilitar a conciliación. Moitos colexios e institutos, e a maioría das escolas infantís, permaneceron pechadas entre as queixas de familias e profesorado pola "desinformación". 

A situación nas factorías de alúmina e aluminio de San Cibrao chegou a ser "máis que preocupante", pois de esgotarse a enerxía dos xeradores a situación de cubas e precipitadores podería ter chegado a ser "case irreversible". A enerxía regresou a última hora da tarde, momento en que se comprobou o estado de todos os sistemas e instalacións. O comité de empresa destaca o bo facer de todos os traballadores.

RENFE decretou a suspensión dos servizos de media distancia, alta velocidade e o FEVE, que de momento continúan sen actividade. A xornada do apagamento viviuse cunha estraña normalidade no transporte por estrada  e tamén nos aeroportos, aínda que varios voos foron cancelados

Tan só en Vigo os bombeiros tiveron que rescatar máis de 60 persoas atrapadas en ascensores. O 112 recibiu milleiros de chamadas, con situacións de todo tipo, entre elas un gran número de asolagamentos en sotos, debido á inactividade das bombas que achican a auga. Non se rexistraron grandes problemas de tráfico