Unha ducia de novas máis lidas nos primeiros 6 anos de Praza
Este 1 de febreiro de 2018 en Praza Pública celebramos o noso sexto aniversario. Sería imposible chegar aquí sen o voso apoio, que tamén é esencial para podermos contar máis e mellor o que sucede en Galicia e no mundo dende o noso, dende o voso xornal. Foron milleiros de novas en todo este tempo e temos varios criterios para ordenalas, un deles é o de máis lidas. Velaquí a ducia de informacións que máis lestes en Praza.gal. Grazas por estardes, lerdes, axudardes e espallardes. Comeza o sétimo ano.
-
012014: "Ou xestionamos todas as festas, ou quedas sen a Panorama"
Espectáculos Lito (promotor de Panorama, Combo, París de Noia e doutras 80 orquestras) cancelou un concerto en Monforte porque o Concello concedéralle a outra empresa, nun concurso público, o resto de eventos das súas festas. Aquí falabamos co alcalde, Severino Rodríguez, na que é a nova máis lida na historia de Praza.gal.
-
022013: A coser diante de Inditex: "A vosa fortuna é a nosa miseria"
En xaneiro de 2013 presentábase na Coruña a Plataforma #BoikotInditex cunha acción de rúa para denunciar "o trato ao cadro de persoal" da multinacional téxtil, a " súa política de contratas" e o seu "modelo de consumo". Aínda é a segunda nova máis lida en Praza Pública.
-
032014: Prolingua revela o nome do hotel que desprezou o galego nun curriculum
En abril de 2014, a plataforma a prol da normalización do galego publicaba na súa web unha carta aberta dirixida ao establecemento hoteleiro de Llanes (Asturias), que desdeñara un currículo que advertía do dominio da lingua galega, e na que cualificaba de "intolerables" as palabras dos seus responsables e manifesta a "indignación" de todos os membros do colectivo.
-
042016: O concello asturiano da Veiga declara oficial o galego no seu municipio
O municipio limítrofe con Ribadeo aprobaba hai agora dous anos unha ordenanza na que equipara a lingua eonaviega ao castelán e convertíase no primeiro do Occidente asturiano en darlle oficialidade ao idioma propio. O galego-asturiano pasaba a ser empregado e impulsado pola administración local. Oura nova sobre lingua entre as máis lidas en Praza.gal.
-
052014: O galego deixa de ser a lingua habitual da maioría da poboación
Outra nova sobre lingua. O IGE revelaba nun informe de 2014 que as persoas que utilizan o idioma do país na súa vida diaria descenderon 13 puntos en dez anos pero a Xunta celebraba o incremento da poboación bilingüe. Compostela situábase como a cidade con máis veciñanza que "sempre" fala galego e Ferrol, como na que máis xente admite que non o fala "nunca".
-
062017: Imputado o máximo responsable forestal da Xunta pola adxudicación de helicópteros contra incendios
Tomás Fernández-Couto, que leva 17 anos á fronte da dirección xeral de Ordenación Forestal, era investigado no marco dunha instrución iniciada en 2012 por presunta prevaricación na contratación da empresa Inaer, hoxe integrada en Babcock. Unha nova de hai poucos meses e só uns días despois da última grave vaga de incendios. O caso foi finalmente arquivado malia que o xuíz recoñecía a ilegalidade da xestión dos helicópteros.
-
072015: Ciudadanos pide que o galego deixe de ser a lingua oficial no Concello de Ferrol
O partido laranxa rexistraba unha moción na que pedía a derrogación de seis artigos da Ordenanza de Normalización Lingüística aprobada polo goberno local ferrolán do PP en 1997. Reclamaba que se "garanta a igualdade de dereitos lingüísticos de todos os cidadáns nas súas relacións coa administación local", nunha das primeiras iniciativas tras conseguir representación
-
082012: A Policía carga con dureza durante o mitin final do PP en Ourense
Os axentes cargaron contra estudantes e afectados polas preferentes no peche de campaña do Partido Popular en outubro de 2012. "Foi brutal, desproporcionada e arbitraria", denunciaba nun comunicado o colectivo Estudantes sen Futuro.
-
092013: “Os homosexuais carecen de hombría e non poden educar”
ALEAS-EU denunciaba en novembro de 2013 que un profesor da Facultade de Maxisterio da USC impartía dende había anos contidos homófobos, tanto oralmente coma nos seus manuais, equiparando a homosexualidade coa pederastia ou a zoofilia e sinalando que era "contaxiosa".
-
10
2014: “Até agora respectei as regras, pero a partir de hoxe xa non. Non quero pagar”
O pasado 21 de marzo de 2014, Alberto Rendo, de Narón, protestou contra os elevados e crecentes prezos da AP9. Chegou á peaxe e comunicou que non tiña intención de pagar, polo que foi multado con 280 euros. Recolleu a súa acción en tres vídeos que publicou posteriormente e advirte de que continuará coa súa loita.
-
112015: Martiño Noriega será o novo alcalde de Santiago
Na histórica noite electoral de maio de 2015, un dos triunfadores foi o agora rexedor compostelán, Martiño Noriega, logo de que Compostela Aberta superase en votos e concelleiros ao PP ao obter 10 edís polos 9 dos populares, que perdían así a maioría absoluta e catro representantes. O ex-alcalde de Teo sería novo rexedor da capital galega.
-
122013: "Se neste país non te chaman facha, non es ninguén"
Unha polémica entrevista a Manuel Manquiña, que viña naquel 2013 de estrear co Centro Dramático Galego Días sen gloria, obra de Roberto Vidal Bolaño. Falabamos co actor nunha longa conversa na que daba as súas opinións sobre teatro e cine, mais tamén de crise, política, nacionalismo e lingua.