Fálase

A Real Academia Galega e PuntoGal dan a coñecer os nove gañadores e gañadoras da sexta edición do seu Concurso de microrrelatos. Na modalidade de persoas adultas o gañador do primeiro premio, foi Nel Vidal, mestre no IES Rego de Trabe de Culleredo, o mesmo que a gañadora do terceiro, Mónica Fraga; a costureira e contacontos Nanda Costas fíxose co segundo premio.

Na categoría xuvenil as gañadoras son Andrea Bravo López, alumna do IES do Milladoiro; Mencía Jorge Cabaleiro, estudante do IES Castelao de Vigo; e Beatriz Martínez García, do IES de Cacheiras. Na categoría infantil as premiadas son Ainhoa Valverde Silva, do CPI de Cova Terreña; Arwen Fernández García, do CEIP Humberto Juanes; e Mai Lemmen, do CEIP Castrelo de Miño

Pontón, partidaria de que as eleccións galegas se celebren decontado: "Canto antes poidamos celebrar eleccións, antes poderemos cambiar o rumbo deste país", afirma a portavoz nacional do BNG en entrevista con Radio Galicia da Cadena SER.

A dirección do PSdeG é partidaria de non formar parte do goberno local de Santiago, que encabezará o BNG. Esa é a "opción principal" dos socialistas galegos que, no entanto, aseguran que a decisión será consensuada co grupo municipal. 

O PSdeG celebrará en setembro as primarias para elixir a persoa candidata á Xunta. Así o vén de anunciar o secretario xeral da formación, Valentín González Formoso, na apertura do comité nacional dos socialistas galegos. Máis información, hoxe en Praza.gal. 

• CRÓNICA | A volta de Besteiro electriza o PSdeG

Detido un dos homes atrincheirado nunha casa en Boiro logo de agredir presuntamente a súa parella. As dúas persoas permaneceron varias horas pechados na vivenda logo dun altercado de madrugada. 

Cargos do PP lograron praza fixa na Deputación de Ourense un mes antes do 28M. Dirixentes do PP ourensán designados a dedo por Baltar formaron parte dos tribunais que valoraron os aspirantes, segundo informa El País. Entre os beneficiados, dous alcaldes e unha concelleira populares. 

• "Primeiro son os proxectos e despois as persoas", di a 'número 2' do PPdeG sobre quen presidirá a Deputación de Ourense

Galicia vence 2-0 a Irlanda na primeira xornada da Copa das Rexións da UEFA, con máis de 1.400 persoas nas bancadas do campo de Burgáns, en Cambados. Os goles de Iñaki Martínez e Jony deron a primeira vitoria á selección galega amateur, que volve xogar o domingo.

• Galicia busca facer historia na Copa das Rexións mentres negocia o regreso da selección profesional sete anos despois

23X | Sumar e Podemos asinan o acordo para concorreren en coalición ás eleccións xerais con Yolanda Díaz como principal cabeza de cartel. Na plataforma intégranse tamén outras formacións como IU, Catalunya en Comú, Compromís, Más Madrid, a Chunta Aragonesista ou Drago, entre outras. Ambas formacións aínda teñen dez días para seguiren negociando a composición das listas nas circunscricións en que se presenten. A marca da formación en Galicia será Sumar Galicia, con Marta Lois como referente. 

Podemos dá por feito que concorrerá con Sumar ás eleccións xerais. "A decisión está tomada", afirma a secretaria xeral do partido, Ione Belarra, despois de que a consulta interna para avalar a dirección na negociación se saldase con 49.089 votos a prol fronte a 3.568 en contra. Non obstante, Belarra reclama que nese "acordo electoral de coalición" non implique a "exclusión" de Irene Montero nas candidaturas, e tamén reclama ao "equipo de Yolanda Díaz" un "acordo xusto" que non implique "inscribir a coalición no último minuto".

• ACTUALIZACIÓN 👉 Sumar e Podemos asinan o acordo para concorreren en coalición ás eleccións xerais

23X | O prazo para remitir o voto por correo nas eleccións xerais queda ampliado ao 20 de xullo, segundo o fixado pola Xunta Electoral Central, que tamén publica este venres no BOE a esixencia de amosar o DNI ou outro documento identificativo oficial (pasaporte, permiso de conducir, tarxeta de residencia ou "calquera outro válido que permita identificar o elector") nesa entrega. Ata agora, só era preciso amosar o carné ao tramitar a solicitude do voto por correo.

• Outro calendario electoral en marcha: voto por correo e sen inauguracións ata despois do 23X