Fálase

A Xunta incorpora Carballeda de Valdeorras aos concellos no máximo nivel de restricións pola COVID-19 dende as 00:00 do luns, día 12. Continúan neste nivel, que implica peche perimetral, os concellos da Pobra do Caramiñal e do Grove. Ademais, oito concellos estarán en nivel alto, coa incorporación de Boiro e Barreiros ao mesmo xunto á Pobra do Brollón, Monterrei, A Illa de Arousa, Boimorto, O Irixo e Carral. No nivel medio quedan 14 concellos: Rábade, Ribadumia, Soutomaior, Vilaboa, Vilanova, As Neves, Noia, Sanxenxo, Meis, Baiona, Gondomar, Carballiño, Cortegada e Padrenda e no baixo, o resto de Galicia. Podes consultar aquí o novo mapa de restricións

• INTERACTIVO | Restricións da Xunta pola COVID-19 dende as 00:00 do 12 de abril

A piragüista Teresa Portela consegue a clasificación para os seus sextos Xogos Olímpicos, en Toquio, e xa é a deportista española con máis participacións. 

O Festival de Ortigueira tampouco se celebrará este verán pola COVID e a organización anuncia que o de 2022 será "o máis longo da historia" ao durar unha semana. 

O Consello da Xunta aproba a oferta de emprego público da Administración Xeral para 2021 con 1.491 prazas, das que 1.006 serán de acceso libre. Podes consultar nesta ligazón a distribución de prazas de cada especialidade. Na imaxe, exames de oposicións da Xunta no recinto feiral de Lugo, o pasado 27 de marzo.

• TÁBOA INTERACTIVA | Prazas aprobadas na OPE da Xunta para 2021

Repsol anuncia un ERTE para o 31% do seu persoal na refinería da Coruña, 212 persoas, e cunha duración máxima de medio ano. A empresa xustifica a decisión na "contración inédita do consumo de petróleo" e na "incerteza xerada pola transición enerxética". Máis información, decontado en Praza.gal. 

AMPLIAMOS 👉 A refinería de Repsol na Coruña anuncia un ERTE para 212 persoas que rexeitan os sindicatos

A Consellería de Sanidade confirma a suspensión da vacinación con AstraZeneca á poboación menor de 60 anos e a súa "reprogramación" en toda Galicia. Faino tras a decisión do Consello Interterritorial de Saúde neste sentido, tomada despois do ditame no que a Axencia Europea do Medicamento conclúe que esta vacina ten máis beneficios ca riscos e os trombos son un "efecto secundario moi raro"

• +INFO 👉 A EMA conclúe que a vacina de AstraZeneca ten máis beneficios ca riscos e os trombos son un "efecto secundario moi raro"

O Consello Interterritorial de Saúde acorda administrar a vacina de AstraZeneca contra a COVID-19 só a poboación maior de 60 anos. Faino tras o ditame da Axencia Europea do Medicamento que describe os trombos como un efecto secundario "moi raro". O Sergas ía administrala tamén esta semana a persoas de 55 a 60 anos. As súas citas, segundo avanzou esta noite a ministra de Sanidade, Carolina Darias, en referencia a todo o Estado, quedarían suspendidas. Máis información, este xoves en Praza.gal

• A EMA conclúe que a vacina de AstraZeneca ten máis beneficios ca riscos e os trombos son un "efecto secundario moi raro"

A Axencia Europea do Medicamento conclúe que os "coágulos de sangue pouco comúns con plaquetas baixas deberían figurar como efectos secundarios moi raros" da vacina de AstraZeneca contra a COVID-19 e que "os beneficios globais da vacina na prevención" da doenza "superan os riscos de efectos secundarios". Este serán, os ministros de Sanidade da Unión Europea están citados nun cumio informal para fixar posición común ao respecto deste ditame. 

• AMPLIAMOS 👉 A EMA conclúe que a vacina de AstraZeneca ten máis beneficios ca riscos e os trombos son un "efecto secundario moi raro"

A Xunta confirma que dende a noite do 9 ao 10 de abril -ás 00:00 do sábado- volverán estar permitidas as reunións de persoas non conviventes en espazos privados e domicilios, co límite de 4 persoas. Ao aire libre, o límite seguirá sendo de 6. Esta medida estaba incluída nas restricións pactadas entre as comunidades autónomas e o Goberno de España para San Xosé e Semana Santa. Mentres, os novos niveis de restricións por concellos estarán finalmente en vigor dende a vindeira medianoite, isto é, dende as 00:00 do xoves, día 8. 

• AMPLIAMOS 👉 Fin do veto ás reunións de non conviventes nas casas mentres a incidencia da COVID segue estable en Galicia
• MAPA INTERACTIVO | Restricións da Xunta pola COVID-19 en vigor dende as 00:00 do 8 de abril

A Pobra do Caramiñal e O Grove estarán no nivel máximo de restricións a partir deste xoves -inicialmente, anunciárao para o venres-, segundo vén de acordar o Comité Clínico que asesora á Xunta na loita contra a pandemia de Covid-19, e polo tanto terán un peche perimetral. A Pobra do Brollón, Rábade, O Irixo, Monterrei, A Illa de Arousa e Carral situaranse no nivel alto e Beade, Cortegada, Padrenda, O Carballiño, Boimorto, Sanxenxo, Meis, Cangas, Gondomar, Moaña e Baiona ficarán no nivel medio. O resto de Galicia quedará no nivel baixo de restricións

• MAPA INTERACTIVO | Podes consultar aquí o nivel no que se atopa cada concello e as restricións aplicada a partir deste venres