Repsol anuncia un ERTE para o 31% do seu persoal na refinería da Coruña, 212 persoas, e cunha duración máxima de medio ano. A empresa xustifica a decisión na "contración inédita do consumo de petróleo" e na "incerteza xerada pola transición enerxética". Máis información, decontado en Praza.gal.
AMPLIAMOS 👉 A refinería de Repsol na Coruña anuncia un ERTE para 212 persoas que rexeitan os sindicatos
A Consellería de Sanidade confirma a suspensión da vacinación con AstraZeneca á poboación menor de 60 anos e a súa "reprogramación" en toda Galicia. Faino tras a decisión do Consello Interterritorial de Saúde neste sentido, tomada despois do ditame no que a Axencia Europea do Medicamento conclúe que esta vacina ten máis beneficios ca riscos e os trombos son un "efecto secundario moi raro"
O Consello Interterritorial de Saúde acorda administrar a vacina de AstraZeneca contra a COVID-19 só a poboación maior de 60 anos. Faino tras o ditame da Axencia Europea do Medicamento que describe os trombos como un efecto secundario "moi raro". O Sergas ía administrala tamén esta semana a persoas de 55 a 60 anos. As súas citas, segundo avanzou esta noite a ministra de Sanidade, Carolina Darias, en referencia a todo o Estado, quedarían suspendidas. Máis información, este xoves en Praza.gal
A Axencia Europea do Medicamento conclúe que os "coágulos de sangue pouco comúns con plaquetas baixas deberían figurar como efectos secundarios moi raros" da vacina de AstraZeneca contra a COVID-19 e que "os beneficios globais da vacina na prevención" da doenza "superan os riscos de efectos secundarios". Este serán, os ministros de Sanidade da Unión Europea están citados nun cumio informal para fixar posición común ao respecto deste ditame.
A Xunta confirma que dende a noite do 9 ao 10 de abril -ás 00:00 do sábado- volverán estar permitidas as reunións de persoas non conviventes en espazos privados e domicilios, co límite de 4 persoas. Ao aire libre, o límite seguirá sendo de 6. Esta medida estaba incluída nas restricións pactadas entre as comunidades autónomas e o Goberno de España para San Xosé e Semana Santa. Mentres, os novos niveis de restricións por concellos estarán finalmente en vigor dende a vindeira medianoite, isto é, dende as 00:00 do xoves, día 8.
A Pobra do Caramiñal e O Grove estarán no nivel máximo de restricións a partir deste xoves -inicialmente, anunciárao para o venres-, segundo vén de acordar o Comité Clínico que asesora á Xunta na loita contra a pandemia de Covid-19, e polo tanto terán un peche perimetral. A Pobra do Brollón, Rábade, O Irixo, Monterrei, A Illa de Arousa e Carral situaranse no nivel alto e Beade, Cortegada, Padrenda, O Carballiño, Boimorto, Sanxenxo, Meis, Cangas, Gondomar, Moaña e Baiona ficarán no nivel medio. O resto de Galicia quedará no nivel baixo de restricións
Pedro Sánchez mantén a estimación de que o 70% da poboación poida estar vacinada contra a COVID-19 "a finais de agosto". En rolda de prensa tras o Consello de Ministros, que celebrou a súa primeira reunión coa súa nova composición, o presidente do Goberno de España afirmou que o seu Executivo traballa coa previsión de que en torno ao 19 de xullo haxa "25 millóns de persoas vacinadas" e no remate de agosto, 33 millóns. (Foto: Borja Puig de la Bellacasa / Pool Moncloa)
As inscricións nas oficinas de emprego de Galicia descenderon en 4.509 durante o mes de marzo e o paro rexistrado queda en 180.719 persoas, 6.238 máis que un ano antes. No mesmo mes, as afiliacións medias á Seguridade Social aumentaron en 4.704 persoas e o total chegou a 998.773, 3.890 menos que doce meses antes.
O lucense Diego Anido (Diego AS) gaña as Graffiti Battles organizadas pola Liga Nacional de Graffiti. Foi o vencedor xunto ao artista vasco NexGraff
Centos de persoas manifestáronse este domingo en San Cibrao en protesta pola sentenza que considerou que non había delito nas gravacións realizadas a decenas de mulleres nas festas da Maruxaina mentres ouriñaban na rúa, vídeos que posteriormente foron publicados en webs porno. A protesta contou co apoio de numerosas entidades feministas de distintas zonas de Galicia.
