A ACB certifica a incorporación oficial do Breogán tras o seu ascenso do pasado abril. Ratifícase así que na temporada 2018-19 os lucenses competirán na máxima categoría do baloncesto, na que xa milita o Obradoiro, o que implica o regreso dos derbis galegos a esta competición. (Imaxe: ACB)
De Cospedal escenifica o seu apoio a Pablo Casado cara á elección da nova presidencia do PP. Casado celebrou a pasada semana actos en Galicia para recadar apoios entre os compromisarios do PPdeG. Este luns faino Soraya Sáenz de Santamaría, que estará con Feijóo en Pontevedra e con Tellado en Santiago.
O BNG lanza un vídeo musical para animar á participación na campaña da formación polo Día da Patria baixo o lema Sumar por Galiza, que culmina na habitual manifestación do 25 de xullo en Santiago.
Feijóo elixe os tres galegos que presidiron o Tribunal Constitucional como receptores este ano da Medalla de Ouro de Galicia. A Xunta comunica os nomes de Álvaro Rodríguez Bereijo (1995-98), María Emilia Casas (2004-2011) e Juan José González Rivas (desde 2017) como galardoados tras un ano de especial protagonismo do tribunal a raíz da crise de Catalunya, que vén sendo aproveitada por Feijóo para reiterar a súa lealdade e a de Galicia coa Constitución. O anuncio foi realizado a través dunha nota de prensa emitida este domingo na que se avanza que a condecoración será aprobada no Consello da Xunta do próximo xoves e entregada novamente o 24 de xullo e non o 25, como era tradicional.
A TVG estrea na noite deste domingo (23.30 horas) o documental Santoalla, que conta en clave de thriller o homicidio de Martin Venfondern.
Este domingo día 15 de xullo fanse 133 anos da morte de Rosalía de Castro e para conmemoralo a súa Casa da Matanza en Padrón celebra unha xornada de portas abertas co Festival Abride a Fiestra, no que participa Praza Pública. Este sábado os actos comezaron cunha singradura de embarcacións tradicionais polo Ulla entre Valga e Padrón.
O portavoz nacional de Anova, Antón Sánchez, apoia a proposta de Compostela Aberta de renovación en En Marea. Tras a reunión da Coordinadora Nacional de Anova, Beiras tamén pediu centrar os esforzos nas mareas municipalistas. Esta semana a dirección de En Marea amosouse aberta a "discutir" cambios no calendario interno, pero "nunca fóra" dos actuais órganos da formación.
O secretario xeral do PSdeG, Gonzalo Caballero, esixe a Feijóo “responsabilidades políticas” como “cómplice” da Valedora do Pobo tras mantela no posto malia a sentenza na súa contra. Na súa intervención ante o Comité Nacional do PSdeG Caballero presenta os socialistas, tras a chegada ao Goberno central de Pedro Sánchez, como a alternativa a Feijóo: “Temos a prioridade social que non ten o PP e a capacidade de xestión que non teñen outras forzas”.
A Audiencia Nacional condena a 20 persoas polo caso Forum Filatélico, “paradigma das estafas piramidais”, entre eles o ex-presidente da entidade, Francisco Briones, a 12 anos de cadea. O mesmo tempo, 12 anos, é o que fai da intervención da entidade e o estourido do caso, xunto co de Afinsa, dos que se calculou que deixaron en Galicia uns 35.000 afectados.
Arquivada a investigación xudicial a Augusto César Lendoiro por posibles delitos societarios como presidente do Deportivo entre 2007 e 2013. A xuíza dá por acreditado o "incumprimento das normas contables", se ben coida que non é posible "determinar o prexuízo ocasionado" nin acreditar que "os investigador obtivesen beneficios indebidos".
