Fálase

Leiro (Ourense) foi o concello coa temperatura máis alta de Galicia este luns ao acadar os 42,7º. A provincia de Ourense concentra as temperaturas máximas neste inicio de agosto, pois en Arnoia chegaron aos 42,3º, en Castrelo de Miño aos 41,1º e en Vilamartín de Valdeorras e na cidade de Ourense os termómetros marcaron ata 40,6º. 

A situación de risco importante polas altas temperaturas mantense este martes a partir das 15.00 horas coa alerta laranxa na zona do Miño de Pontevedra e Ourense, así como na comarca de Valdeorras. Meteogalicia tamén mantén a alerta amarela no interior das provincias da Coruña e Pontevedra, no sur e na montaña de Lugo e Ourense. A partir do mércores haberá unha baixada das temperaturas con treboadas no interior do país.

A Xunta terá un límite de gasto de 12.599 millóns de euros para elaborar os Orzamentos de 2023. Son 1.028 millóns máis que o teito de gasto aprobado o pasado ano e 972 por riba do total dos orzamentos iniciais (excluíndo a débeda) deste 2022. O incremento da marxe de gasto vén dado en boa medida pola suba das achegas estatais, ligadas á súa vez á maior recadación vía impostos. Unha vez aprobado o teito de gasto esta mañá no Consello da Xunta -na imaxe-, o seguinte trámite é recibir o visto e prace do Parlamento.

• A recadación coa que Feijóo acusou a Sánchez de "forrarse" implica un 24% máis de fondos para a Xunta en 2023
• HEMEROTECA | Vivenda e enerxía encabezan as subas no orzamento da Xunta para 2022 polo impulso dos fondos estatais e da UE

Feijóo descualifica a débeda pública como "pufo" e reclama exencións de ata o 99% no imposto ás eléctricas que ultima o Goberno de España en resposta a unha entrevista con El Mundo. Diversos dirixentes do PSOE evidencian que o endebedamento serve para financiar servizos públicos e retrucan que durante a súa presidencia a débeda da Xunta pasou duns 4.000 millóns de euros a máis de 11.000 [datos completos de débeda da Xunta dende 1995, nesta ligazón]

• A recadación coa que Feijóo acusou a Sánchez de "forrarse" implica un 24% máis de fondos para a Xunta en 2023
• Feijóo executa contra PSOE e Podemos o manual de asedio que estreou fronte á coalición de esquerda na Xunta

A alerta de nivel 2 por calor manterase tamén mañá luns na provincia de Pontevedra e ata o martes na de Ourense, con previsións de temperaturas por riba dos 39 graos. 

José Manuel Rey Varela volverá ser o candidato do PP á alcaldía de Ferrol. O actual presidente dos populares na cidade, voceiro municipal do grupo e deputado autonómico presentou este sábado no comité executivo a súa proposta de candidatura que será ratificada nunhas semanas. 

Un incendio en Arbo obriga a activar a alerta pola proximidade a un núcleo de casas. O lume iniciouse na parroquia de Mourentán e afectou xa 50 hectáreas. Foto: Brif Laza. 

Elena Candia será a candidata do PP á alcaldía de Lugo tras ser proposta pola xunta directiva local este venres nunha cita á que acudiu Alfonso Rueda. A ex-alcaldesa de Mondoñedo e presidenta da Deputación de Lugo durante tres meses en 2005 será ratificada polo comité autonómico dos populares na vindeira semana. 

Viveiro acolle este sábado a quinta edición do festival ETHER de música electrónica, que retorna despois da pandemia. Será a partir das 13.00 horas nos xardíns Noriega Varela, con entrada gratuíta, e ademais da música haberá actividades para nenos e formativas.

Abanca gaña 104,3 millóns no segundo trimestre do ano, cun incremento do beneficio recorrente do 14,3%, e supera os 110.000 millóns de euros en volume de negocio. A entidade bancaria que incrementou en máis dun 60% as altas de clientes de fóra de Galicia con respecto ao ano pasado.

O dato adiantado do IPC para o mes de xullo sitúase no 10,8% de incremento interanual para o conxunto do Estado, segundo o INE. O detalle da suba de prezos para Galicia coñecerase cando o índice de prezos ao consumo sexa definitivo. O pasado xuño en Galicia superou o 11%, un punto por riba da media. [Imaxe: CC-BY-SA Victoriano Izquierdo / Unsplash]

• Os alimentos encareceron un 10% no que vai de ano encabezados polo aceite, ovos, leite, cereais e a froita
• XUÑO | Os prezos seguen a subir en Galicia cun aumento interanual do 11,1%, un punto por riba da media española