O dato adiantado do IPC para o mes de xullo sitúase no 10,8% de incremento interanual para o conxunto do Estado, segundo o INE. O detalle da suba de prezos para Galicia coñecerase cando o índice de prezos ao consumo sexa definitivo. O pasado xuño en Galicia superou o 11%, un punto por riba da media. [Imaxe: CC-BY-SA Victoriano Izquierdo / Unsplash]
O DOG publica as convocatorias de diversas axudas para paliar os efectos dos incendios dos últimos días, entre elas as destinadas a vivendas. Nese caso, as axudas da Xunta serán complementarias dos seguros e cubrirán un gasto máximo de 122.000 euros para as vivendas habituais e de 61.000 euros para as segundas residencias. [Na imaxe, casas ardendo na Veiga de Cascallá -CC BY-SA Praza.gal / Cedida]
Xa se pode escoitar enteiro o novo disco das Tanxugueiras, Diluvio, nas principais plataformas, ademais de mercalo no seu web. Cadrando co lanzamento, as cantareiras publicaron tamén o videoclip do seu novo sinxelo, Fame de odio.
EPA | A poboación ocupada aumentou en Galicia nunhas 13.800 persoas no segundo trimestre do ano e chega aos 1,11 millóns, un 2,65% máis que no mesmo trimestre do 2021, mentres que a media estatal ascendeu ao 4,05%. No mesmo trimestre, a poboación en desemprego diminuíu nunhas 1.600 persoas, ata as 139.400, o que supón un descenso interanual do -8,49% (-17,62% na media do Estado).
A Xunta anuncia que os socios do Celta terán prioridade para mercar as entradas do concerto de Muse que patrocina o Xacobeo no estadio municipal de Balaídos. O Goberno galego di que este xoves haberá unha “prevenda” para os socios da sociedade anónima deportiva “con motivo do centenario do club” e que o venres poderán ser adquiridas polo resto de persoas. O concerto é o 8 de setembro, o aforo será de 14.000 persoas e o prezo de 65 euros. [Imaxe: Xunta de Galicia].
Ana Cabaleiro, gañadora do I Premio Exeria de creación literaria con Shukran, no que "non só aborda unha viaxe ao Sáhara realizada pola súa autora, senón que reflexiona sobre o sentido da viaxe, o choque entre as expectativas e a realidade atopada e a evolución social e política dos nosos xeitos de viaxar". O Certame está coorganizado polo Concello de Santiago.
A Xunta prevé que a vacina da Meninxite B para bebés sexa gratuíta “a partir de novembro”. Alfonso Rueda prometeu en maio no seu debate de investidura que o Sergas sumaría tres novas vacinas gratuítas ao calendario infantil (meninxite B, virus do papiloma humano para nenos e non só para nenas e antigripal tetravalente) e este xoves o Consello da Xunta autorizou a contratación das primeiras. [Na imaxe, vacinación infantil contra a COVID - CC BY-SA Xunta]
O Parlamento fai pública a declaracións de bens de Feijóo tras o seu cesamento como deputado despois de pasar pola comisión correspondente. O seu contido coincide coa que entregou ao Senado, que reflicte que é accionista de Inditex e investidor con Abanca, así como un notable incremento patrimonial polo que o BNG pediu a súa comparecencia, freada polo PP. Na imaxe, Feijóo o pasado 25 de xullo en Santiago, flanqueado polos presidentes da Xunta e do Parlamento e mais coa vicepresidenta Yolanda Díaz e co alcalde de Santiago.
Jácome cesa os concelleiros do PP e acúsaos de xogar con Ourense “polos tempos electorais do seu novo candidato".
Rafael Louzán, actual presidente da Federación Galega de Fútbol, será o novo responsable da Segunda Federación, cuarta categoría do fútbol profesional español. A Audiencia Provincial ratificou o pasado maio a súa condena por prevaricación e a súa inhabilitación para emprego ou cargo público.
