A ex-dirixente da CUP Anna Gabriel regresa a España e entrégase ao Supremo logo de máis de catro anos en Suíza. O xuíz Llarena déixaa en liberdade e vólvea citar para interrogala nas vindeiras semanas.
Fálase
-
Álvaro García Ortiz, ex-fiscal delegado de Medio Ambiente en Galicia, será o novo fiscal xeral do Estado en substitución de Dolores Delgado, que renuncia por motivos de saúde. O fiscal asumira a acusación pública no caso Prestige.
A vaga de calor deixou máis de 500 mortes en España entre o 10 e o 16 de xullo. O Instituto de Saúde Carlos III sitúa o sábado como o pico máximo, con 150 persoas falecidas.
O Celta, "obrigado a asumir a presenza" de Santi Mina nos adestramentos logo de que o xogador esixise a súa incorporación inmediata ao traballo do primeiro equipo. O futbolista foi condenado a catro anos de cadea por abuso sexual pero reclama incorporarse ao equipo mentres a sentenza non sexa firme. O club, nun comunicado, amosa a súa "sorpresa" por un "movemento encamiñado a danar" a entidade.
Acordo para desconvocar a folga na concesionaria do servizo de limpeza do Concello de Santiago, que ía comezar hoxe. O persoal de Urbaser ratifica cun apoio do 92% un pacto que inclúe incrementos salariais, melloras nas xubilacións e a reincorporación de dúas persoas despedidas, segundo informa CC.OO.
Vilamartín de Valdeorras supera os 43º de temperatura. A estación de Meteogalicia na parroquia da Portela desde concello ourensán rexistrou pasadas as 17.30 horas da tarde 43,1º. A 43º exactos chegaron os termómetros en Ribas de Sil (Lugo), mentres que por enriba dos 40º seguen en Sober (Lugo), Larouco (Ourense) e Monforte de Lemos (Lugo) neste domingo que se considera o último día da vaga de calor no país.
Meteogalicia mantén a alerta laranxa por altas temperaturas ata as 21.00 horas no sur das provincias de Lugo e Ourense, na comarca de Valdeorras e na zona do Miño ourensán. Para o luns as temperaturas sufrirán un notable descenso ao achegarse unha masa de aire frío desde o Atlántico [como se aprecia nos mapas], que deixará brétemas costeiras no litoral e nubes e claros con chuvascos treboentos pola tarde en toda Galicia.
A Casa de Rosalía de Castro pecha este domingo a celebración do seu 50 aniversario co festival Abride a fiestra, unha xornada de portas abertas na Casa da Matanza (Padrón) con feira de produtos rosalianos, a exposición ‘O herbario de Rosalía’, zona de xogos para crianzas da man de Brazolinda, a presentación do proxecto 'Es ti que cantas' de audiolibros de Rosalía, as regueifas de Luís O Caruncho vs Lupe Blanco, uns contos de Quico Cadaval, un obradoiro de astronomía da man da Agrupación Ío e as actuacións de Laura LaMontagne & PicoAmperio, Leilía e Rompente. O programa completo pódese consultar aquí.
O presidente da Xunta, Alfonso Rueda, acompañou o rei Felipe VI no acto de xura de bandeira e entrega dos reais despachos que tivo lugar esta mañá na Escola Naval Militar de Marín. [Fotografía © David Cabezón/Xunta]
A Axencia de Doazón de Órganos e Sangue (ADOS) fai un chamado á participación da poboación na doazón de sangue e, de maneira especial, aos doantes A positivo, A negativo e 0 positivo. O conselleiro de Sanidade, Julio García Comesaña, doou sangue este sábado no Hospital Nicolás Peña de Vigo, onde pediu un "esforzo especial" para incrementar as reservas de sangue durante os meses de verán. Comesaña lembrou que os centros sanitarios de Galicia necesitan "entre 400 e 500 doazóns diarias" para desenvolver de maneira eficaz as súas tarefas.
O luns haberá unidades móbiles para doar sangue en Narón, Celas de Peiro (Culleredo), Culleredo, Zona Gaiteira-Os Castros (A Coruña), Praza Roja (Santiago), Área Central-Fontiñas (Santiago), Catoira, Barrio de Teis (Vigo), Rúa Príncipe (Vigo), Foz e A Rúa. Para o martes seguirán en Narón, O Burgo (Culleredo), Barrio Peruleiro (A Coruña), A Picota (Mazaricos), O Incio e na Ronda das Fontiñas (Lugo). A listaxe completa dos lugares onde se poderá doar sangue ata fin de mes pode consultarse aquí.
O PP de Baiona quéixase ao Concello por un monólogo de Quico Cadaval "en galego e non en castelán" por "falta de respecto" cos turistas. Os conservadores din "entender" que "noutra época do ano si se poida optar polo noso dialecto". Na imaxe, parte da queixa divulgada polo PP baionés nas súas redes sociais.
