Acordo para desconvocar a folga na concesionaria do servizo de limpeza do Concello de Santiago, que ía comezar hoxe. O persoal de Urbaser ratifica cun apoio do 92% un pacto que inclúe incrementos salariais, melloras nas xubilacións e a reincorporación de dúas persoas despedidas, segundo informa CC.OO.
Vilamartín de Valdeorras supera os 43º de temperatura. A estación de Meteogalicia na parroquia da Portela desde concello ourensán rexistrou pasadas as 17.30 horas da tarde 43,1º. A 43º exactos chegaron os termómetros en Ribas de Sil (Lugo), mentres que por enriba dos 40º seguen en Sober (Lugo), Larouco (Ourense) e Monforte de Lemos (Lugo) neste domingo que se considera o último día da vaga de calor no país.
Meteogalicia mantén a alerta laranxa por altas temperaturas ata as 21.00 horas no sur das provincias de Lugo e Ourense, na comarca de Valdeorras e na zona do Miño ourensán. Para o luns as temperaturas sufrirán un notable descenso ao achegarse unha masa de aire frío desde o Atlántico [como se aprecia nos mapas], que deixará brétemas costeiras no litoral e nubes e claros con chuvascos treboentos pola tarde en toda Galicia.
A Casa de Rosalía de Castro pecha este domingo a celebración do seu 50 aniversario co festival Abride a fiestra, unha xornada de portas abertas na Casa da Matanza (Padrón) con feira de produtos rosalianos, a exposición ‘O herbario de Rosalía’, zona de xogos para crianzas da man de Brazolinda, a presentación do proxecto 'Es ti que cantas' de audiolibros de Rosalía, as regueifas de Luís O Caruncho vs Lupe Blanco, uns contos de Quico Cadaval, un obradoiro de astronomía da man da Agrupación Ío e as actuacións de Laura LaMontagne & PicoAmperio, Leilía e Rompente. O programa completo pódese consultar aquí.
O presidente da Xunta, Alfonso Rueda, acompañou o rei Felipe VI no acto de xura de bandeira e entrega dos reais despachos que tivo lugar esta mañá na Escola Naval Militar de Marín. [Fotografía © David Cabezón/Xunta]
A Axencia de Doazón de Órganos e Sangue (ADOS) fai un chamado á participación da poboación na doazón de sangue e, de maneira especial, aos doantes A positivo, A negativo e 0 positivo. O conselleiro de Sanidade, Julio García Comesaña, doou sangue este sábado no Hospital Nicolás Peña de Vigo, onde pediu un "esforzo especial" para incrementar as reservas de sangue durante os meses de verán. Comesaña lembrou que os centros sanitarios de Galicia necesitan "entre 400 e 500 doazóns diarias" para desenvolver de maneira eficaz as súas tarefas.
O luns haberá unidades móbiles para doar sangue en Narón, Celas de Peiro (Culleredo), Culleredo, Zona Gaiteira-Os Castros (A Coruña), Praza Roja (Santiago), Área Central-Fontiñas (Santiago), Catoira, Barrio de Teis (Vigo), Rúa Príncipe (Vigo), Foz e A Rúa. Para o martes seguirán en Narón, O Burgo (Culleredo), Barrio Peruleiro (A Coruña), A Picota (Mazaricos), O Incio e na Ronda das Fontiñas (Lugo). A listaxe completa dos lugares onde se poderá doar sangue ata fin de mes pode consultarse aquí.
O PP de Baiona quéixase ao Concello por un monólogo de Quico Cadaval "en galego e non en castelán" por "falta de respecto" cos turistas. Os conservadores din "entender" que "noutra época do ano si se poida optar polo noso dialecto". Na imaxe, parte da queixa divulgada polo PP baionés nas súas redes sociais.
Ourense acada un novo récord de temperatura ao chegar este xoves aos 44º, segundo as medicións da estación de Meteogalicia. O servizo de meteoroloxía galego tamén avanza que se aproximan nubes desde o Atlántico e o norte de Portugal que nas próximas horas poderán deixar treboadas no sur da provincia de Lugo e na de Ourense.
As temperaturas non baixaron dos 20º na maioría dos municipios galegos a pasada noite –nalgúns sitios as mínimas foron de 25º– e esta tarde superaron os 42º en Verín, Vilamartín de Valdeorras, Leiro e Ribas de Sil.
O PP confirma que se opón ao novo imposto ás enerxéticas anunciado por Pedro Sánchez e absterase na convalidación do segundo decreto fronte á crise de prezos
O tenente da Alcaldía de Lugo, Rubén Arroxo (BNG), denuncia ante a Policía "distintas ameazas de morte escritas no perfil dun cargo público nas redes sociais" o pasado mércores. "Non imos consentir que por unha cuestión ideolóxica se nos ameace", sinala, ademais de advertir de que "isto é reiterado e nos últimos meses están a medrar". A alcaldesa da cidade, Lara Méndez (PSdeG), subliña que "non son tolerables os ataques, os insultos e as ameazas que recibimos por persoas que poden discrepar coa forma de facer política, coa xestión ou a ideoloxía". O PP local expresou tamén a súa condena.
A Xunta centra no Xacobeo e no Camiño de Santiago as Medallas de Galicia do 2022. Concédeas ao arcebispo de Santiago, Julián Barrio; ao presidente do comité de expertos sobre o Camiño, Paolo Caucci von Saucken; a Begoña Valdomar, hospitaleira do albergue de peregrinos de Fisterra; á Asociación Discamino de Santiago e ao antropólogo e primeiro comisario do Xacobeo José Carro Otero, esta última a título póstumo. A Xunta concede estas medallas co gallo do Día Nacional de Galicia e dende o ano pasado volven ser entregadas o propio 25 de xullo tras seren trasladadas ao 24 dende o accidente de Angrois.
