Fálase

A Xunta centra no Xacobeo e no Camiño de Santiago as Medallas de Galicia do 2022. Concédeas ao arcebispo de Santiago, Julián Barrio; ao presidente do comité de expertos sobre o Camiño, Paolo Caucci von Saucken; a Begoña Valdomar, hospitaleira do albergue de peregrinos de Fisterra; á Asociación Discamino de Santiago e ao antropólogo e primeiro comisario do Xacobeo José Carro Otero, esta última a título póstumo. A Xunta concede estas medallas co gallo do Día Nacional de Galicia e dende o ano pasado volven ser entregadas o propio 25 de xullo tras seren trasladadas ao 24 dende o accidente de Angrois.

• HEMEROTECA | Turismo volve á Presidencia da Xunta nun ano de gasto récord do Goberno galego no sector
• HEMEROTECA | Día estatal en Galicia

A Audiencia Nacional abre xuízo contra Iberdrola por manipular as súas centrais no Sil e outros ríos en 2013 co obxectivo de inchar inflar os prezos da electricidade. A eléctrica "ideou e puxo en funcionamento un sistema para incrementar o prezo da enerxía que vendía", segundo o xuíz. Na imaxe, o presidente de Iberdrola, Ignacio Sánchez Galán, co ex-presidente Feijóo e o conselleiro Conde, nunha das centrais do Sil.

• A Audiencia Nacional procesa a Iberdrola por manipular as súas centrais no Sil para inflar os prezos da electricidade

O Concello de Frades prohibe usar auga da traída "para o enchido de piscinas ou a rega do cultivo de xardíns" para "garantir o mantemento do subministro no uso domiciliario e nas explotacións gandeiras" -Frades ten rexistradas case 10.000 vacas-. Nun comunicado, o consistorio sinala que "decidiu adoptar esta medida debido a que, coa chegada do verán e destas vagas de calor, comeza a haber problemas co subministro de auga debido ao considerable aumento do seu consumo e á súa escaseza". Na imaxe, piscina municipal desta vila.

• Os encoros galegos chegan ao verán coas reservas máis baixas da última década

Formoso insta a Xunta a imitar o Goberno de España e aplicar a gratuidade nos abonos dos autobuses metropolitanos. O secretario xeral do PSdeG reclama que o Executivo galego "complemente" así a medida anunciada por Pedro Sánchez para o abonos da Renfe en media distancia e lamenta que "non escoitase a nosa petición de destinar a axudas ao sectores estratéxicos" unha parte do recadado polo imposto de hidrocarburos.

• Sánchez anuncia impostos extra a enerxéticas e bancos, trens de balde e máis bolsas para combater a crise de prezos

“O Nadal faise todo o ano”: Abel Caballero anuncia o inicio dos preparativos para as festas de fin de ano en Vigo. O alcalde avanzou que este xoves o goberno local aprobará a contratación da iluminación e a programación do Nadal. [Foto: Concello de Vigo]

A inflación escalou en Galicia o pasado xuño ata o 11,1% interanual, case un punto máis que na media estatal, onde o incremento dos prezos foi do 10,2%. 

• AMPLIAMOS 👉 Os prezos seguen a subir en Galicia cun aumento interanual do 11,1%, un punto por riba da media española
• HEMEROTECA | Dispáranse os fogares galegos que tentan aforrar na compra mentres os que prevén ir de vacacións marcan máximos

A cidade de Ourense acada os 43,1 graos de temperatura, segundo o rexistro de Meteogalicia ás 17:50 deste martes. Inicialmente medira 43,5, pero a propia Meteogalicia desbotou o dato porque as condicións de medición "non son idóneas". Así e todo, eses 43,1 si supoñen un récord, agrega. A maior parte de Galicia está hoxe baixo aviso laranxa ou amarelo pola vaga de calor e, en termos sanitarios, a Xunta ten activado o nivel máximo de alerta no conxunto do país.

• As chuvias concentradas e as temperaturas deste inverno aceleran a necesidade de mudar a xestión da auga
• O cambio climático está detrás de 1 de cada 3 mortes por calor no mundo: "O incremento da temperatura ten consecuencias"

Pedro Sánchez anuncia bonificacións do 100% nos abonos dos trens de media distancia de Renfe -tamén nos de proximidade, inexistentes en Galicia alén da antiga Feve- e outras medidas como impostos extraordinarios para grandes compañías enerxéticas e a banca e unha bolsa mensual de 100 euros adicionais ao mes para estudantes que xa sexan bolseiros. O máis destacado das medidas expostas polo presidente do Goberno de España no debate de política xeral do Congreso, nesta ligazón

• AMPLIAMOS 👉 Pedro Sánchez anuncia impostos extra a enerxéticas e bancos, trens de balde e máis bolsas para combater a crise de prezos
• 📺 AO VIVO | Retransmisión en directo do debate de política xeral no Congreso

O Congreso acolle dende este martes o debate de política xeral, o primeiro con Pedro Sánchez na presidencia do Goberno de España. A sesión comeza cun discurso de Sánchez dende as 12h deste martes e continúa, a partir das 16h, coas intervencións dos grupos parlamentarios. Máis información sobre o desenvolvemento do debate e a historia deste tipo de sesións, no sitio web do Congreso. Na imaxe, Sánchez durante un pleno no que compareceu o pasado xuño [© Pool Congreso]

• 📺 AO VIVO | Retransmisión en directo do debate de política xeral no Congreso

O Parlamento aproba os nomeamentos para cubrir as dúas vacantes do PP no consello de administración da CRTVG cos votos a prol de PP e PSdeG. O BNG non os apoiou, ao advertir que non facilitaría estas remudas se os populares non acceden a cumprir íntegra a lei dos medios públicos, a comezar por substituír o director xeral conforme a esa norma. Na imaxe, os dous novos representantes do PPdeG neste órgano, Álvaro Alonso e Margarita López. O pleno tamén aprobou os nomeamentos de dous membros do Consello de Contas.

• HEMEROTECA | O PP volve sentar perfís de partido no consello da CRTVG mentres sostén con mandato indefinido o director xeral