Fálase

A Xunta responde ao BNG que o programa de Jiménez Losantos en EsRadio que patrocinou en Ourense o pasado 14 de marzo "corrixiu de inmediato" o "erro" de promocionalo referíndose a Orense. O Bloque preguntou no Parlamento "por que o goberno galego apoia eventos nos que non se respecta a toponimia oficial galega" e que medidas tomara neste caso concreto. A Secretaría Xeral de Medios responde que nas cuñas radiofónicas que promocionaron o evento "se utilizou o topónimo oficial" e que "os promotores tamén publicaron un báner no que inicialmente se utilizou a forma incorrecta do topónimo pero, "unha vez detectado, o erro foi corrixido de inmediato, como pode comprobarse" nunha captura de Libertad Digital que anexan. Polo momento non foi publicado o contrato no que conste o importe do patrocinio. Na imaxe, promoción do programa co topónimo Orense e abaixo, as capturas remitidas pola Xunta ao Parlamento.

A Virxe do Carme xa non dá nome ao colexio dos Castros de Burela. O DOG publica a autorización para o cambio oficial do nome do centro a CEIP Os Castros, impulsado pola comunidade educativa baseándose no lugar onde se atopa o colexio, na denominación que en boa medida ten popularmente na contorna e, ademais, en suprimir o matiz relixioso. Procuran evitar, asemade, confusións co colexio Virxe do Carme de Sober. [Imaxe: CC BY-SA Fernando Losada Rodríguez]

O BNG de Vigo denuncia na Fiscalía e no Consello de Contas catro presuntos delitos no caso Guns N’ Roses, un "escándalo sen precedentes" na cidade, en palabras do seu portavoz municipal, Xabier P. Igrexas. A formación refírese a posibles delitos de prevaricación administrativa, malversación, fraude nos procedementos contratuais e falsidade documental, que en total podería supoñer penas máximas de 50 anos de prisión e 18 de inhabilitación para cargo público. "Estas penas dan conta da gravidade dos feitos que estamos a denunciar", apunta Igrexas. O BNG busca depurar responsabilidades ante as "graves irregularidades" polo intento de uso ilegal de dous millóns de euros de cartos públicos e ante o "silencio" do Goberno local, dirixido polo socialista Abel Caballero. [Na imaxe, a deputada do BNG Carmela González e os concelleiros vigueses Xabier P. Igrexas, Ana Martínez e Filipe Abalde na Cidade da Xustiza de Vigo este xoves]

Un paciente agride unha auxiliar de enfermaría no CHUAC coincidindo cunha nova xornada de protestas contra as agresións, segundo conta El Ideal Gallego. O persoal exixe protocolos "efectivos" nunha nova mobilización. Foto: CC-BY-NC-SA CIG-Saúde. 

• A Xunta sancionará e denunciará de oficio as agresións a persoal sanitario

A empresa galega Atunlo, a maior comercializadora de atún de España, entra en liquidación. A firma viguesa fracasou no intento de que polo menos o 65% dos seus acredores dese o visto e prace á súa proposta de convenio. 

O Son do Camiño suma a The Prodigy, Amaia e Paul Thin ao seu cartel de 2025 e detalla a programación por días da nova edición. O festival celébrase no Monte do Gozo, en Santiago, do 12 ao 14 de xuño e abre a venda das entradas diarias o 1 de abril.

• 📸HEMEROTECA - EN VINTE | Vinte imaxes do Son do Camiño

Donald Trump anuncia agora aranceis do 25% para todos os automóbiles fabricados fóra dos Estados Unidos. [Imaxe: CC-BY-SA Gage Skidmore]

• HEMEROTECA | Os aranceis do 25% anunciados por Trump custarían 200 millóns ás empresas galegas, segundo a Xunta
• HEMEROTECA | "As fracturas na UE veranse agravadas con Trump, dando pulo ao populismo ultraconservador"
• EDITORIAL | O segundo mandato de Donald Trump e Galicia

María Tato, máxima responsable da candidatura para organizar o Mundial de fútbol de 2030, cesada este mércores do seu posto na Federación Española tras a polémica pola elección de sedes que afecta a candidatura de Vigo. 

• A exclusión de Balaídos a última hora engade polémica á elección de sedes do Mundial

Veterinarios maniféstanse ante a delegación e subdelegacións do Goberno de España en Galicia contra a norma que regula a prescrición de antibióticos e insisten en que limita o seu criterio e "pon en risco" a saúde dos animais. Foto: CV A Marosa. 

• A revolta dos veterinarios pola norma sobre antibióticos: risco ou necesidade?

O presidente de Portugal, Rebelo de Sousa, promulga un decreto-lei que reforza a conservación do lobo ibérico no país veciño tras as novas medidas aprobadas polo Goberno luso o pasado 10 de marzo. A nova lexislación chega poucos días despois de que o Congreso aprobase en España a retirada do lobo da listaxe de especies en "réxime de protección especial". Foto. CC-BY rjime31.