O corpo achado no fondo do mar en Tenerife é o dunha das dúas nenas secuestradas polo seu pai. Segundo informa Canarias Ahora, na zona continúan os labores de busca. Anna e Olivia foron secuestradas hai un mes e a Garda CIvil abordou a investigación como desaparición "de alto risco". Na actualidade, en Galicia está en trámite unha reforma legal para que a lei contra a violencia machista recoñeza como vítimas ás mulleres cuxos fillos son asasinados, isto é, a violencia vicaria. Na imaxe, da TV Canaria, pescudas nunha lancha propiedade do pai. Colectivos feministas están a convocar concentracións de repulsa en vilas e cidades para este serán baixo o lema Inundemos as rúas fronte á barbarie machista.
Fálase
A dirección central do PP lanza un vídeo de Feijóo para pedir sinaturas contra os posibles indultos do Goberno de España aos líderes independentistas cataláns condenados na causa do procès. Na gravación, o presidente da Xunta e do PP en Galicia acusa o Executivo de Pedro Sánchez de "desafiar o poder xudicial".
O Consello da Xunta propón os festivos de ámbito galego do calendario laboral de 2022. Entres os habituais non figura o 1 de maio e o 25 de Nadal por cadrar en domingo.
A Xunta outorga as Medallas Castelao a Santiago Pemán, Xoán Luís Saco Cid, Esther Eirós, Manuel Vila López e o Centro Superior de Hostalería. O Goberno galego recoñece cos galardóns ao histórico home do tempo da TVG, o catedrático ex-presidente da Fundación Otero Pedrayo, a xornalista especializada en turismo, o mestre lucense que traballa pola integración dos xitanos e o centro fomativo.
A mañá deste xoves trae un eclipse parcial de sol no que Galicia será o lugar da península no que mellor se apreciará, co seu punto máximo contra as 11.43 horas. [Imaxe: IGN]
Os xardíns do Pazo de Meirás abrirán ao público a última fin de semana de xuño. Así se acordou na reunión entre as administracións sobre os futuros usos do inmoble.
A Xunta suprime dende o sábado 12 o veto ás reunións entre non conviventes de 1 a 6 da madrugada e os límites máximos no número de persoas que se poden xuntar, agás na hostalería. Toda a hostalería poderá abrir ata a 1 da madrugada se conta con medidores de CO2. Feijóo avanza ademais que o Goberno galego vén de iniciar unha "revisión integral de toda a regulación" que ten vixente en materia de restricións para ámbitos como a hostalería, cultura ou deporte co obxectivo de "actualizar as limitacións" ao novo contexto. Máis información, hoxe en Praza.gal.
Jácome anuncia que somete a súa continuidade na alcaldía de Ourense a unha cuestión de confianza que se votaría o vindeiro día 14. Así o vén de anunciar no pleno municipal extraordinario, que rexeitou unha modificación de créditos para investimentos por importe de 62 millóns de euros, á que PSdeG e BNG se opuxeron e na que o PP se abstivo. Nesa votación serán clave os votos do PP. A lei fixa que os orzamentos municipais son un dos asuntos que poden vincularse a unha cuestión de confianza. Na imaxe, Jácome e Feijóo en xullo de 2019.
O Pleno do Parlamento comezou este mércores con lembranzas de todos os grupos á deputada socialista Isaura Abelairas, falecida de cancro a pasada semana. Os socialistas deixaron rosas vermellas no seu escano baleiro.
O BOE publica a modificación das normas para o control da COVID nas fronteiras e agora si exime as persoas que cheguen dende Portugal de ter que presentar certificado de vacinación ou un test do virus con resultado negativo. O Goberno de España pasa a aplicar este requisito por vía terrestre unicamente a quen chegue de zonas de risco de Francia.