Fálase

A Xunta aproba financiar con 2,88 millóns de euros o plan para pagar a bancos que poñan caixeiros onde xa non hai oficinas e axuden a operar neles dúas horas á semana. O financiamento "para o período 2021-2025" foi aprobado no Consello da Xunta deste xoves. O proxecto desenvolverase mediante acordos cos concellos e o Executivo galego resalta que xa se sumaron estes 34: Aranga, Vilasantar, Lousame, Cabanas, Dumbría, Santiso, Coirós, Dodro, Paderne , Toques, Vilarmaior, Ribeira de Piquín, Samos, O Páramo, Larouco, Arnoia, Petín, Lobeira, Os Blancos, Oímbra, Vilar de Santos, Carballeda de Avia, Xunqueira de Ambía, Chandrexa de Queixa, Xunqueira de Espadanedo, Piñor, Porqueira, A Teixeira, Melón, Cenlle, Rairiz de Veiga, A Peroxa, Tabodela e Pontedeva. 

• AMPLIAMOS 👉 A banca pechou 18 sucursais en concellos onde a Xunta a vai subvencionar con 2,8 millons para poñer caixeiros
• HEMEROTECA | A Xunta pagará a bancos para que poñan caixeiros onde xa non hai oficinas e axuden a operar neles dúas horas á semana

A Comisión Europea dá o seu visto e prace ao plan do Goberno de España para os 69.500 millóns de euros de fondos europeos de recuperación que chegarán como transferencias (a outra metade, como créditos, aínda non foron solicitados). Así o confirmou a presidenta da Comisión, Ursula Von der Leyen, en visita a Madrid xunto ao titular do Goberno español, Pedro Sánchez. Horas antes, Von der Leyen realizou o mesmo anuncio para o plan portugués xunto a António Costa. Agora resta o visto e prace do Consello Europeo e prevese que os cartos comecen a chegar a partir do mes vindeiro. (Imaxe: Pool Moncloa / Fernando Calvo)

• HEMEROTECA | NextGenerationEU, PERTE, Proxecto tractor: guía para non perderse nas axudas á recuperación tras a COVID que chegarán a Galicia

Competencia abre expediente aos bancos Sabadell, Santander, Caixabank e Bankia (estes dous últimos veñen de fusionarse) por posible "falseamento da competencia" mediante "actos desleais" na comercialización dos créditos do Instituto de Crédito Oficial para paliar os efectos da pandemia nas empresas. A CNMC considera que "a actuación dos bancos investigados se afastaría da boa fe esixida ás empresas nas súas relacións cos clientes".

Camariñas, Malpica de Bergantiños e Soutomaior quedan no nivel medio de restricións pola COVID-19 a partir do vindeiro sábado, 19 de xuño. Así o acaba de decidir o comité clínico que asesora á Xunta coa pandemia, que se volverá reunir a semana que vén para volver analizar os datos epidemiolóxicos dos concellos. Mentres tanto, o resto dos municipios galegos fica no nivel medio baixo de restricións. [Na imaxe, a praia de Canido en Malpica CC-BY-SA Turismo de Galicia] 

• MAPA INTERACTIVO | Restricións da Xunta pola COVID dende o 19 de xuño

O Ministerio de Sanidad aproba comezar a vacinación dos menores de 40 anos e non aborda a relaxación no uso das máscaras. Crea tres novos grupos para a inmunización (entre 30 e 39 anos, 20-29 e 12-19), que poderían empezar a ser vacinados en paralelo aos maiores de 40. 

A xornalista Isabel Bravo gaña o Premio de Xornalismo 'Somos Esenciais' 2020, organizado polo Colexio Profesional de Xornalistas de Galicia en colaboración con Gadis, pola peza Cando as preguntas aínda non tiñan resposta, emitida en Radio Coruña - Cadena Ser. Os membros do xurado destacaron a capacidade da comunicadora para "pór en valor a información local e darlle voz ás fontes expertas no primeiro día de estado de alarma".

O xurado decidiu conceder unha mención especial como finalista á reportaxe La uci del covid, desde dentro: «No somos héroes», publicada por Ángel Paniagua en La Voz de Galicia.

Só Andalucía, Euskadi e La Rioja seguen coa obriga de control polo coronavirus de viaxeiros que cheguen a Galicia. Na actualización da lista publicada este martes no DOG tampouco está boa parte de Europa.

O Burela alarga a súa xeira triunfal e logra a súa cuarta liga tras impoñerse 2-5 ao Futsi Atlético Torrejón na final do playoff polo título. É o cuarto campionato ligueiro e noveno título consecutivo das guerreiras laranxas. (Imaxe: Burela FS)

Ana Pontón e Gabriel Rufián defenden “o diálogo político e a negociación fronte á espiral da bronca das dereitas de Colón”. A portavoz nacional do BNG e o deputado de ERC mantiveron un coloquio en Santiago retransmitido na canle de Youtube da formación.

Ione Belarra, ministra de Dereitos Sociais, substitúe a Pablo Iglesias como secretaria xeral de Podemos co 85% dos votos da IV Asemblea Cidadá da formación.