Fálase

Decenas de persoas maniféstanse en Santiago con motivo do Día Internacional da Visibilidade Trans, convocadas pola asociación de familias de menores e mocidade trans de Galicia, Arelas, xunto a outros colectivos LGTBIQA+ do país. Unha mobilización contra a transfobia social co lema "Sempre estivemos aquí, seguiremos hoxe, mañá e sempre!" que rematou na Praza do Obradoiro e contou co apoio dos principais partidos da oposición, BNG e PSdeG. [📸 Goretti Sanmartín, Marcha Mundial das Mulleres, Podemos Galicia e Galiza Nova]

• HEMEROTECA | A "avalancha" de fraudes coa lei trans que non chegou

Derrúbase parte do teito do hospital materno infantil de Ourense. Sucedeu na madrugada deste sábado e só causou danos materiais, a pesar de que o persoal estaba traballando nesa zona no momento da caída. Sanidade asegura que se trata dun “pequeno derrubamento” e dende o BNG solicitan a comparecencia do conselleiro para dar explicacións no Parlamento ante un incidente que consideran “gravísimo” e que “puido ocasionar danos persoais irreparables”. [📸 O hospital de Ourense CHUO, nunha imaxe de arquivo CC-BY-SA Xunta]

• HEMEROTECA | O hospital de Ourense acumula a maior lista de espera de Galicia para consultas e cirurxías
• HEMEROTECA | Axitación na sanidade ourensá: "Traballamos ao 200%"

A Fundación Florencio Delgado Gurriarán presenta unha plataforma colaborativa para recoller o léxico propio de Valdeorras. Unha ferramenta en liña que facilita as aportacións da veciñanza. Neste momento, no dicionario hai dez termos, todos eles recollidos na poesía de Florencio Delgado Gurriarán –honrado nas Letras Galegas de 2022– e con comentarios da comisión de lingua da Fundación, que se encarga de comprobar que sexan realmente palabras propias do valdeorrés.

• HEMEROTECA | A "Galicia infinda" homenaxea as letras e o "compromiso democrático e galeguista" de Florencio Delgado Gurriarán
• HEMEROTECA | Ricardo Gurriarán: "Florencio Delgado chegaba cargado de literatura galega feita en México, publicacións moi importantes para os resistentes"

A xunta militar de Birmania informa de 1.644 persoas falecidas no terremoto que este venres atravesou o país cunha magnitude 7,7. As autoridades confirman que hai un total de 3.408 feridos e 139 desaparecidos. [📸 Na imaxe © Unicef, edificios afectados na cidade de Mandalay, en Myanmar]

A eclipse parcial de Sol puido verse en Galicia, onde ata o 40% do Sol ficou oculto esta mañá de sábado. Na imaxe, a eclipse dende Brión [📸 cedida]. O vindeiro verán poderá verse a primeira eclipse total de Sol na Península Ibérica dende o 17 de abril do ano 1912.

• Galicia, ás portas da histórica eclipse total de Sol de 2026: "Será un momento único na vida"

📺EN VINTE | O Vinte Almorzando viaxa a Belesar para almorzar coa actriz María Vázquez no seu sitio favorito. A intérprete conversa con VINTE do clamor nos Premios Mestre Mateo contra Altri e da vinculación natural entre cultura e política. Tamén sobre o necesario coidado da lingua galega ou de democratizar a cultura. "Necesitamos voces da clase obreira que conten o mundo como está porque cada vez estamos a facer máis cultura de ricos para ricos", explica.

• Vinte almorzando con María Vázquez

Falece en Ciudad de México aos 89 años o empresario Olegario Vázquez Raña, símbolo da emigración galega en México e distinguido en novembro de 2024 co Premio Ourensanía da Deputación de Ourense [na imaxe], en recoñecemento ao seu vínculo con Avión. É o fundador do Grupo Empresarial Ángeles, un conglomerado con empresas relacionadas co eido sanitario, os medios de comunicación, o turismo ou as infraestruturas.

A Xunta responde ao BNG que o programa de Jiménez Losantos en EsRadio que patrocinou en Ourense o pasado 14 de marzo "corrixiu de inmediato" o "erro" de promocionalo referíndose a Orense. O Bloque preguntou no Parlamento "por que o goberno galego apoia eventos nos que non se respecta a toponimia oficial galega" e que medidas tomara neste caso concreto. A Secretaría Xeral de Medios responde que nas cuñas radiofónicas que promocionaron o evento "se utilizou o topónimo oficial" e que "os promotores tamén publicaron un báner no que inicialmente se utilizou a forma incorrecta do topónimo pero, "unha vez detectado, o erro foi corrixido de inmediato, como pode comprobarse" nunha captura de Libertad Digital que anexan. Polo momento non foi publicado o contrato no que conste o importe do patrocinio. Na imaxe, promoción do programa co topónimo Orense e abaixo, as capturas remitidas pola Xunta ao Parlamento.

A Virxe do Carme xa non dá nome ao colexio dos Castros de Burela. O DOG publica a autorización para o cambio oficial do nome do centro a CEIP Os Castros, impulsado pola comunidade educativa baseándose no lugar onde se atopa o colexio, na denominación que en boa medida ten popularmente na contorna e, ademais, en suprimir o matiz relixioso. Procuran evitar, asemade, confusións co colexio Virxe do Carme de Sober. [Imaxe: CC BY-SA Fernando Losada Rodríguez]

O BNG de Vigo denuncia na Fiscalía e no Consello de Contas catro presuntos delitos no caso Guns N’ Roses, un "escándalo sen precedentes" na cidade, en palabras do seu portavoz municipal, Xabier P. Igrexas. A formación refírese a posibles delitos de prevaricación administrativa, malversación, fraude nos procedementos contratuais e falsidade documental, que en total podería supoñer penas máximas de 50 anos de prisión e 18 de inhabilitación para cargo público. "Estas penas dan conta da gravidade dos feitos que estamos a denunciar", apunta Igrexas. O BNG busca depurar responsabilidades ante as "graves irregularidades" polo intento de uso ilegal de dous millóns de euros de cartos públicos e ante o "silencio" do Goberno local, dirixido polo socialista Abel Caballero. [Na imaxe, a deputada do BNG Carmela González e os concelleiros vigueses Xabier P. Igrexas, Ana Martínez e Filipe Abalde na Cidade da Xustiza de Vigo este xoves]