Fálase

A Real Academia Galega de Belas Artes prorrogará as celebracións do Día das Artes Galegas ao 2021 "para non deslucir a homenaxe de Domingo de Andrade". A decisión tomouse "ante a imposibilidade de seguir co programa de actividades e actos a causa da pandemia da Covid-19". O 12 de novembro, data que coincide co aniversario da morte do gran arquitecto do Barroco, a institución celebrará un acto na Catedral de Santiago para lembrar "a súa figura e o esplendor da súa obra". Domingo de Andrade construíu a Torre do Reloxo da Catedral de Santiago ou a escaleira tripla de caracol do convento de San Domingos de Bonaval, ademais de parte das catedrais de Lugo e Ourense ou a Casa da Parra e a Casa da Conga, en Compostela

A CRTVG asegura ser "allea á filtración" da gravación de imaxes previas a unha entrevista da ETB coa ministra Irene Montero, publicadas por ABC e posteriormente pola propia TVG. Advirte nun comunicado con "accións legais a quen" a "acuse de ser a fonte da filtración" e di "rexeitar o uso" desas imaxes que emitiu no Telexornal. O colectivo Defende a Galega pediu este martes á corporación pública que "abra unha investigación independente para saber se a TVG filtrou o off the record" previo a esa entrevista coa canle vasca, que anunciou o luns que valora trasladar o acontecido á Xustiza.

A Deputación Permanente do Parlamento debaterá o xoves a petición de comparecencia de Feijóo formulada por toda a oposición conxuntamente  para que expoña "as medidas que ten previsto adoptar para evitar o peche da fábrica de Alcoa en San Cibrao". Aceptala ou rexeitala depende dos votos do PP. Na mesma sesión si comparecerá sobre o mesmo asunto o conselleiro de Industria, Francisco Conde. (Na imaxe, protestas contra o peche, o pasado domingo en Ribadeo -Praza Pública/Cedida-)

A galeguista Daría González xa dá nome a un colexio en Pontevedra, ata agora denominado CEIP Príncipe Felipe. A súa biografía pódese consultar no portal Do gris ao violeta do Concello pontevedrés.

• HEMEROTECA | Lentes violetas para facer visibles as mulleres esquecidas pola historia en Pontevedra

PARO REXISTRADO | As inscricións nas oficinas de emprego descenderon en Galicia en 547 persoas durante o mes de maio, ata as 191.082, pero son 30.277 máis que un ano antes. No mesmo mes, a afiliación á Seguridade Social  aumentou en 1.603 persoas, aínda que o total, 976.374, supón 42.032 menos que no mesmo mes de 2019 por efecto da crise do coronavirus. Ampliamos a información neste espazo

A concelleira da Coruña Mónica Martínez dase de baixa en Ciudadanos, pero seguirá como edil "sen pertencer a ningún partido".

A Xunta publicita “unha nova cuneta” na Autovía Ferrol-Vilalba. O Goberno galego divulga a renovación 1.400 metros da drenaxe da estrada nas proximidades das Pontes por 583.000 euros. Na primeira semana de prohibición de actos electoralistas antes do 12X a Xunta xa publicitara unha ducia de asfaltados.

A Xunta fai oficial este luns, unha semana despois de permitilo o Goberno central, a súa decisión de ampliar do 40% ao 50% a capacidade da hostalaría na actual Fase 2 do desconfinamento. O DOG tamén establece que o persoal de loita contra o lume se centre agora nesa tarefa e só interveña na prevención do coronavirus a petición expresa de Sanidade. [Imaxe: Turismo de Galicia]

Nova xornada de mobilizacións na Mariña contra o peche dunha das dúas factorías de Alcoa en San Cibrao. O persoal trasladouse este domingo a Ribadeo nunha mobilización que incluíu o corte da ponte dos Santos, que marca o límite entre Galicia e Asturias. A esixencia de implicación dos gobernos galego e central para frear o peche e da aprobación do estatuto electrointensivo por parte do Ministerio de Industria seguen no centro das reivindicacións.

• A enésima ameaza de peche de Alcoa dende a fin do colchón de cartos públicos fai tremer o corazón industrial da Mariña

Avistadas varias crías de píllara das dunas en praias da contorna de Ferrol. Medio Ambiente lembra á poboación "a importancia de manter a distancia coas zonas de cría e cos bordes das zonas dunares" para protexer esta especie ameazada, elixida ave do ano por SEO/Birdlife no pasado 2019. (Imaxe tomada por Felipe Ogando Martínez e cedida á Xunta)