Fálase

Un milleiro de bombeiros forestais volven ao paro tras traballaren seis meses para a Xunta e reiteran a súa petición de traballaren todo o ano para dedicaren o inverno a labores de prevención. "Defendemos un servizo público de calidade que reverta e inverta as súas funcións e na que a prevención e a atención ás emerxencias no rural sexan a pedra angular das nosas actuacións", sinala o persoal, que pon o foco na dura vaga de incendios sufrida por Galicia o pasado verán. En datas recentes, Medio Rural subliñaba que en 2023 "dous terzos" do dispositivo "traballará todo o ano, xa que todos os postos de traballo de nove meses vanse pasar a doce meses. Na imaxe [Praza.gal / Cedida] , concentración do persoal mobilizado, este venres no Porriño.

• HEMEROTECA | Mil bombeiros forestais volven ao paro tras seis meses e piden traballar todo o ano pola ameaza de graves incendios

Un xulgado de Madrid levanta a suspensión da emisión do selo de Correos que conmemora o centenario do Partido Comunista de España, acordada de maneira cautelarísima reclamada pola asociación denominada Abogados Cristianos. Unha vez atendidas as alegacións da empresa pública, a xuíza conclúe nun auto ao que  tivo acceso Praza.gal que o selo foi emitido seguindo as vías legais mediante unha resolución que non foi obxecto de recurso e que as reclamacións do devandito colectivo ultracatólico "motivadas en razóns de orde política", non "desmenten" que así fose. Por iso deixa "expedita a vía para a emisión do selo", que Correos decidiu emitir para conmemorar os cen anos dun partido ao que sinala como "motor das forzas que loitaron pola democracia" durante o franquismo.

Triunfa a moción de censura contra o alcalde de Sada, Benito Portela (Sadamaioría), e os votos dos edís electos polo PP (5), PSdeG (2) e Alternativa dos Veciños (2), desautorizados por cadansúas formacións, fan alcaldesa a María Nogareda, concelleira do grupo menos votado da corporación, quen fora edil de Educación no goberno de Portela, do que tamén participaba o BNG. Portela confirma a súa intención de volver optar á alcaldía nas eleccións do vindeiro maio tras este "golpe antidemocrático", manifestou durante un tenso pleno no que os edís tránsfugas foron fortemente increpados. [Foto: FeC]

• Sadamaioría cualifica de "golpe á democracia" a moción de censura lanzada por edís "tránsfugas" de PP, PSdeG e AV

Aluvión de renuncias entre o persoal de Twitter tras o ultimato do seu novo propietario, o multimillonario Elon Musk, que continúa a mofarse da situación dende o seu perfil na rede social. Musk instara o persoal a aceptar condicións de traballo moito máis duras ou marchar.

O Estado oficializa a achega de 2 millóns de euros dos fondos europeos para o proxecto Nós de incorporación do galego á intelixencia artificial tras a súa aprobación no último Consello de Ministros. O secretario xeral de Política Lingüística da Xunta, Valentín García, "agradece ao Goberno de España a súa achega  crucial ao que, ata o momento, é o proxecto máis ambicioso da historia no ámbito da dixitalización da nosa lingua, para o que prevemos destinar 15,5 millóns de euros ao abeiro dos fondos europeos Next Generation".

• HEMEROTECA | O galego na intelixencia artificial, alén de Siri: "Trátase de que o noso ecosistema económico tamén medre con esta tecnoloxía"
• HEMEROTECA | Chegan as voces para que a intelixencia artificial fale galego

A Xunta publicita a sinatura do seu primeiro “préstamo sustentable” co Banco Santander co que se endebeda ata 2034 por 230 millóns de euros. O Goberno galego non divulga máis condicións do préstamo á marxe de que os cartos irán destinados a “investimentos sociais e ambientais vinculados tamén á Axenda 2030”. Sen ter en conta este préstamo, a débeda pública da Xunta achégase xa aos 12.000 millóns de euros.

A Xunta dará ata tres horas para reparar os equipos de videconferencias e gravación de declaracións nos xulgados. O Goberno galego licita o servizo técnico dos equipos multimedia dos xulgados galegos, que adoitan rexistrar múltiples incidencias que demoran trámites procesuais. As condicións do contrato, de medio millón de euros por dous anos, obrigan á empresa a que as incidencias que deixen fóra de servizo un sistema se resolvan en menos de tres horas se non implican substituír materiais e de sete se hai que facelo. Outro tipo de incidencias deberán resolverse en sete horas se non hai que substituír materiais ou 24 horas se hai que facelo.

A OTAN atribúe os dous mísiles caídos en Polonia ás defensas aéreas da Ucraína. O secretario xeral da organización, Jens Stoltenberg, sinala que esa é a conclusión das súas "análises preliminares" e agrega que non se trata dun ataque premeditado. O Goberno dos EUA tamén apunta a Ucraína e non a Rusia como orixe dos mísiles, que mataron dúas persoas. [Imaxe: © OTAN]

Continúan as pescudas sobre a orixe de dous mísiles caídos nunha aldea fronteiriza coa Ucraína en territorio de Polonia, membro da UE e da OTAN, onde mataron dúas persoas O presidente dos EUA, Joe Biden, apunta a que pode tratarse de foguetes antiaéreos ucraínos e ve "pouco probable", pola súa traxectoria que fosen lanzados por Rusia. Líderes de gobernos do G20 abordaron a situación durante a cimeira que se desenvolve en Bali (na imaxe, difundida nos perfís oficiais de Pedro Sánchez nas redes sociais, durante unha conversa informal con Biden, Scholz, Sunak e Macron).

A plataforma de transportistas que convocara un novo paro indefinido suspéndeo ao segundo día polo seu escaso seguimento e tras non lograr que o secundase ningunha das organizacións representativas do sector. Esta organización ten a sede social nunha área de servizo de Baamonde e existe hai máis dunha década, pero foi case descoñecida para a opinión pública ata principios deste ano, baixo a denominación Plataforma Nacional. Na imaxe, de arquivo, unha protesta do sector do transporte.

• HEMEROTECA | O heteroxéneo paro no transporte recrúa: das peticións de axuda á esixencia de dimisión de Sánchez con raíces en Galicia
• HEMEROTECA | "A suba do gasóleo non é só un problema do transporte, senón de todos os sectores. Necesitamos medidas de fondo"