Dende a entrada en vigor da lei estatal de vivenda, o Goberno galego criticouna con contundencia no seu conxunto. Sobre un dos seus preceptos máis novidosos e criticados polo PP e o sector inmobiliario, a declaración de zonas tensionadas como vía para poder intervir no mercado do alugueiro, a Xunta insistiu en que non o aplicaría "de oficio", pero que accedería a permitilo se os concellos que desexen activalas formulan solicitudes "debidamente argumentadas".
Os gobernos da Coruña e Santiago manifestaran o seu interese en poder activar as declaracións de zonas tensionadas no mercado de alugueiro. A Xunta afirmara estar disposta a aceptalas se estaban "debidamente argumentadas"
Ata o momento foron dous gobernos municipais, os da Coruña e Santiago, os que manifestaron en público o seu interese nesta figura. No caso coruñés, como informa este xoves La Opinión, a primeira petición do goberno do PSdeG remóntase a hai un ano, pero está paralizada de facto pola esixencia de documentación e datos entre ambas partes. Para o concello compostelán, o gabinete de BNG e CA amosouse disposto a presentar toda a documentación e datos que a Xunta reclame, se ben a alcaldesa, Goretti Sanmartín, non oculta o seu temor a que a resposta sexa "non" con independencia dos informes municipais.
Con este pano de fondo, xa o pasado marzo a dirección estatal do PP advertía de que os seus gobernos non ían aplicar as declaracións de zonas tensionadas para limitar os alugueiros. E agora esa negativa é anunciada formal e conxuntamente polos once Executivos autonómicos -máis os gobernos de Ceuta e Melilla- que ostentan os populares. Fixérono nun comunicado asinado poucas horas antes de reunírense en Conferencia Sectorial coa ministra de Vivenda, Isabel Rodríguez.
Nun texto encabezado polo logotipo oficial da Xunta e dos demais gobernos do PP, os conservadores cargan contra a ministra por advertir da retirada de fondos se non aplican integramente as medidas da lei estatal de vivenda concibidas para frear os prezos
O documento, encabezado polos logotipos oficiais destes gobernos -co da Xunta en primeiro termo, atendendo á precedencia constitucional-, é presentado polos conservadores como resposta ás advertencias da ministra sobre unha eventual retirada de fondos estatais para vivenda ás autonomías onde non se aplique a lei no seu conxunto. Na súa redacción foi clave o secretario de Vivienda y Ocupación da dirección estatal do PP, o senador murciano José Ramón Díez de Revenga, se ben no propio texto é atribuído aos "conselleiros competentes en materia de vivenda" en cada territorio, no caso galego, María Martínez Allegue.
A respecto das declaracións de zonas tensionadas, os gobernos do PP "reafirman" que esta é "unha decisión potestativa" e, polo tanto, é "legal non declarar zonas de mercado tensionado e, polo tanto, non intervir nos prezos dos alugueiros". "Esas medidas -abondan- só serven para provocar menor oferta de vivenda e suba dos prezos", conclúen, avanzando así o destino das peticións da Coruña e Santiago. A conselleira Allegue, non obstante, respondía aos medios pouco despois da divulgación do comunicado que a Xunta si tramitará solicitudes municipais ao respecto se cumpren cos requisitos fixados na lei.
Neste sentido, afirman, "non toleramos a ameaza e a chantaxe da ministra" de "retirar os fondos ás comunidades autonómicas (sic) por non aplicar voluntariamente unha medida contemplada na súa lei polo dereito á vivenda". Aínda que só se aplica en Catalunya -Euskadi aprobou esta mesma semana a súa primeira declaración nun concello-, aseguran que as declaracións de mercado tensionado "demostráronse prexudiciais para os cidadáns" e o conxunto da lei, como unha política "fracasada".
No comunicado, no que interviu a dirección central do partido, atribúen en exclusiva á "nefasta política" de Pedro Sánchez as subas dos prezos da vivenda e axitan o medo á ocupación e ao que denominan "inquiocupación" que, afirman sen datos, "medrou de maneira alarmante nos últimos meses"
Xunto ás súas advertencias sobre a "obriga" do Estado para "repartir de forma equitativa os recursos públicos", a carta asinada pola Xunta e o resto de gobernos do PP atribúe en exclusiva á "nefasta política do Goberno" de Pedro Sánchez as subas dos prezos da vivenda. Á xestión do socialista atribúen tamén o que definen como "outro dos grandes problemas", a "chamada ocupación" que cifran en "78.800 vivendas" e ao que aseguran que "se engade" o que definen com "fenómeno da inquiocupación, que medrou de maneira alarmante nos últimos meses", afirman sen definir o suposto problema nin achegar dato ningún. [Os desafiuzamentos multiplicaron por 19 os novos casos de ocupacións en Galicia no inicio de 2024]
Os conselleiros e conselleiras do PP admiten que existe un "enorme reto social de acceso á vivenda", "tanto en compravenda como en alugueiro", con datos que "evidencian" que "está acadando magnitudes de drama social". Ao seu xuízo, o primeiro paso para solucionalo é que o Goberno de España abandone o que consideran "formulacións extremistas" e "imposición ideolóxica".
