Ecoloxistas en Acción poñen o caso de Moaña como exemplo de "apropiación do espazo público marítimo-terrestre" no informe co que cada ano avalían o litoral de todo o Estado
Todos os anos, xunto coas Bandeiras Azuis a praias ou portos que entega en todo o continente a Federación para a Educación Ambiental en Europa (FEEE), outra asociación, Ecoloxistas en Acción, outorga as súas Bandeiras Negras, coas que sinala as principais ameazas para o litoral de todo o Estado. Este ano o seu informe anual céntrase na ocupación do espazo público marítimo-terrestre "por parte de particulares adiñeirados e pola sobreexplotación turística". E como gran exemplo dese tipo de "apropiación" do litoral a asociación vén de galardoar a ocupación por parte da parella de Alberto Núñez Feijóo dunha franxa de terreo público en Moaña, desvelada en exclusiva por Praza.gal o pasado novembro.
Terreo público marítimo-terrestre que dá acceso á praia desde a casa de Eva Cárdenas en Moaña
-
Terreo que forma parte do dominio público marítimo-terrestre malia estar pechado de xeito conxunto coa propiedade de Eva Cárdenas -
Terreo público marítimo-terrestre que dá acceso á praia desde a casa de Eva Cárdenas en Moaña -
Porta de acceso á praia desde o terreo que Costas quere recuperar e que foi renovada cos mesmos materiais que o resto de portas e fiestras da casa -
Imaxe do Catastro, á esquerda, coa liña azul que delimita o dominio público marítimo-terrestre, e á dereita delimitación da parcela pública de 210 metros cadrados situada entre a propiedade privada de Eva Cárdenas e a praia -
Terreo que Costas quere recuperar para uso público e que serve de acceso directo á praia do chalé de Eva Cárdenas en Moaña
Tras facer público este diario que a Dirección Xeral da Costa quería recuperar o uso público duns 210 metros cadrados pechados de xeito conxunto co chalé que a parella de Feijóo adquiriu en 2019, Eva Cárdenas pediu unha concesión dese terreo que lle vén de ser denegada. Porén, ten posibilidade de recurso e o caso podería demorarse anos nos tribunais ata que Costas poida facilitar o acceso público á parcela. Segundo Ecoloxistas en Acción, aínda que "a superficie ocupada non representa unha gran extensión como noutros casos, si é moi relevante que o infractor consorte sexa o ex-presidente da Xunta e actual presidente do Partido Popular de España".
As Bandeiras Negras deste ano tamén van para Altri, Alcoa, o porto de Suevos e as illas de Toralla, en Vigo, e Pancha, en Ribadeo
Xunto co caso de Feijóo e Cárdenas en Moaña, o informe deste ano de Ecoloxistas en Acción recolle outras cinco bandeiras negras en todo o litoral galego. Na mesma provincia de Pontevedra tamén se pon o foco na "mala xestión" da illa de Toralla, en Vigo. Na Coruña o informe sinala a Altri "pola ameaza de destrución dos recursos hídricos e biodiversidade na ría de Arousa" e o porto de Suevos "polos vertidos da depuradora". E en Lugo as bandeiras negras son para Alcoa pola ampliación da balsa de residuos que ten en Cervo e para o hotel habilitado no faro da illa Pancha de Ribadeo, espazo natural protexido.
Ademais destas seis bandeiras negras, Ecoloxistas en Acción fan mención especial á factoría de Ence en Pontevedra, "cuxa legalidade está en entredito trás admitir o Tribunal Constitucional o recurso de amparo presentado polo Concello de Pontevedra". "É un dos exemplos de ocupación e uso industrial indebido do espazo público marítimo terrestre e de como algunhas administracións amparan as ilegalidades dunha minoría adiñeirada, mentres que aplican a lei sen miramientos ao cidadán común", di a organización ecoloxista, lembrando que Ence ten "o récord" de bandeiras negras en Galicia en anteriores edicións destes galardóns.
