O pasado febreiro o PP reafirmou, co rexeitamento dunha proposición promovida polo BNG no Parlamento, a súa negativa a cumprir a Lei de Policía de Galicia (2007). Os populares frearon, concretamente, a lei coa que o Bloque pretendía reactivar a petición do traspaso á Xunta das competencias de tráfico e seguridade, exercidas polo Goberno de España a través da Garda Civil A mesma solicitude de transferencia que en 2008 a Cámara galega aprobou pola unanimidade dos votos do PSdeG e do BNG, na altura socios no Executivo galego de coalición, e do propio PP.
Un dos argumentos que expuñan os populares tanto na tramitación da Lei de Polícia como na solicitude do traspaso das competencias de tráfico é que a iniciativa non era, en rigor, un avance exclusivo do Goberno de socialistas e nacionalistas. A derradeira Xunta presidida por Manuel Fraga xa a impulsara, lembraban. Dun e doutro en impulso veñen de renegar os populares galegos neste 2025 apoiándose nunha iniciativa de Vox no Congreso.
Efectivamente, en febreiro de 2005 o gabinete Fraga -vicepresidido por Alberto Núñez Feijóo- enviou ao Parlamento o seu proxecto de Lei de Policía, que non acabou de tramitarse polo adianto das eleccións galegas daquel mesmo ano. As súas liñas mestras, entre elas a armazón xurídica para asumir as competencias de tráfico, quedaron plasmadas en gran medida na norma que si foi aprobada, ao do bipartito en 2007.
"Xamais imos permitir que se bote á Garda Civil de Galicia", clama a deputada ourensá do PP Ana Vázquez, responsable de Interior na dirección estatal do partido, ante unha resposta na que o Ministerio do Interior evidencia que o traspaso das competencias de tráfico encaixa na Constitución se o ampara o Estatuto, como no caso galego
Como tantos outros traspasos, o do tráfico -e con el, o desenvolvemento da Lei de Polícia- foron arrombados polos sucesivos gobernos do PP de Feijóo. Máis aínda dende que en 2010 a unánime petición galega aprobada en 2008 naufragou no Congreso -o PSOE opuxérase e o PP, que cos seus votos podía desequilibrar a votación a prol do "si", abstívose-.
Anos despois, en 2019 e 2021, o PP accedeu, pola vía da abstención en Galicia, a iniciar unha posible nova petición cando o pediron o PSdeG e o BNG. Pero nesta segunda ocasión a porta aberta pechouse aos poucos días, cando a abstención virou en veto atendendo ás protestas de colectivos de gardas civís e diversas descualificacións da extrema dereita. O veto reeditouse en febreiro deste ano, mesmo botando man de mencións á disolvida banda terrorista ETA, e volve agora en clave de discurso público aproveitando unha pregunta de Vox ao Ministerio do Interior.
En febreiro, ao fío dunha noticia en El Debate sobre a devandita petición do Bloque, a formación de extrema dereita preguntou no Congreso ao departamento de Fernando Grande-Marlaska pola súa "posición" a respecto da "proposta do BNG de substituír a Garda Civil por unha policía autonómica en Galicia". A comezos de abril o trasladou a súa resposta, da que se fixo eco Ok Diario este 18 de maio.
Tanto a Lei de Policía promovida polo Goberno de Fraga en 2005 como a aprobada en 2007 por impulso do Executivo de PSdeG e BNG apelaban ao desenvolvemento do Estatuto para despregar o novo corpo policial e asumir as competencias de tráfico
Aproveitando esa publicación do pasado domingo, a deputada do PP de Ourense Ana Vázquez Blanco, responsable de Interior na dirección estatal do partido, compartiuna nas redes sociais para advertir de que "xamais imos permitir que se bote á Garda Civil de Galicia". "Teranos en contra do desmantelamento da Garda Civil nas nosas vilas", advertiu nunha publicación compartida pola conta oficial do PPde Galicia na que reproducía o titular El Gobierno abre la puerta a echar a la Guardia Civil de Galicia: «La Constitución ampara ese derecho».
E, que di a resposta de Interior? Evidencia que como Ministerio "non pode valorar a vontade política da despregadura dun corpo policial autonómico en Galicia", pero tamén ten "en conta que a Constitución española ampara ese dereito sempre que así o recolla o seu Estatuto de Autonomía". Ao desenvolvemento da previsión estatutaria -concretamente, do artigo 27- apelaba precisamente o Goberno de Fraga en 2005 para lanzar a súa Lei de Policía, cuxa aplicación sería "un feito histórico" para a autonomía.
En desenvolver o Estatuto apoiouse tamén a lei de 2007, que segue en vigor. E o mesmo as sucesivas peticións de socialistas e nacionalistas, que veñen batendo coa negativa dos populares a aplicala. Porque, en liña co discurso agora reiterado con Vázquez Blanco, o que para o Goberno de Fraga -no que o actual presidente, Alfonso Rueda, era alto cargo- era dotar a Galicia dun "modelo de policía integral" que aumentaría o "benestar social" do país, para a actual cúpula do PPdeG é parte dun plan para "botar á Policía Nacional e á Garda Civil da nosa terra" e, en última instancia, "avanzar cara á independencia".
Quixo a casualidade que estas consideracións do PP contra o incremento do autogoberno pola vía da vixente Lei de Policía chegasen na véspera de que, este luns, BOG e DOG fixesen oficial o traspaso das competencias sobre a xestión do litoral. Trátase, como é sabido, da primeira transferencia lograda en 17 anos, tamén a primeira dende a fin do Goberno de PSdeG e BNG.
