Pontón reprocha a escaseza de vivenda protexida a Rueda, que retruca co congreso da UPG

Alfonso Rueda e o conselleiro Diego Calvo, no inicio da sesión de control deste 10 de xullo de 2024 CC-BY-SA David Cabezón / Xunta

Hemeroteca

O pasado 2023 finalizou en Galicia con 14 novas vivendas protexidas rematadas. É, segundo os datos oficiais recompilados polo Instituto Galego de Estatística no Ministerio de Vivenda, a cifra máis baixa en catro anos. O anterior mínimo rexistrárase en 2019, son só 4. O balance deste último cuatrienio fica así en 917 vivendas protexidas iniciadas e 585 rematadas, o que así e todo supón unha mellora a respecto dos catro anos previos, con 76 iniciadas e 163 finalizadas.

Galicia finalizou 2023 con 14 novas vivendas protexidas, segundo os datos oficiais. O presidente subliña que a Xunta xa "iniciou a execución" de 400 e mantén a promesa de chegar a 4.000 na fin do mandato

Estes e outros datos e a súa interpretación estiveron no centro do debate da derradeira sesión de control ao presidente da Xunta neste primeiro período de sesións da lexislatura iniciada tras as eleccións do pasado febreiro. Foi a través da pregunta da portavoz nacional do BNG, Ana Pontón, quen reprochou a Alfonso Rueda a escaseza de vivenda protexida. Enfronte, o presidente reiterou as súas promesas ao respecto para os vindeiros catro anos pero, sobre todo, reprochou á líder do Bloque as materias abordadas a pasada fin de semana no congreso da Unión do Povo Galego (UPG).

"Por anuncios que non sexan; en 2023 dicían que ían construír 1.900 vivendas" e en xaneiro "veuse arriba" e xa eran 4.000, ironizou Pontón, quen dubida que o PP "vaia facer nunha lexislatura o que non fixeron en 15 anos". "As mentiras -dí a líder do prinicipal grupo da oposición- enchen o Telexornal, pero non axudan as familias a ter unha vivenda" nun contexto no que insta a non limitarse a "nomear a Constitución" senón "cumprila empezando polo recoñecemento efectivo do dereito á vivenda".

Para iniciar a súa resposta, o titular do Goberno optou por un argumento que, avanzou, "lle vai fastidiar moito" a Pontón. Pero é que, ao seu xuízo, as "prioridades" do BNG non pasan polo acceso á vivenda, senón as "cousas do nacionalismo, o independentismo, o monolingüismo e a ideoloxización" porque iso foi do que "falaron" no "congreso que tiveron esta fin de semana", dixo en referencia ao conclave da UPG. "Estamos a iniciar a execución de 400 vivendas", afirmou -son parte dos 780 pisos de alugueiro proxectados en oito concellos ao abeiro de dous convenios asinados pola Xunta co Estado- e o obxectivo é "chegar a 4.000" no novo mandato.

Retirada de pisos turísticos irregulares do rexistro da Xunta

O titular da Xunta evita garantir a baixa de todos os pisos turísticos ilegais do rexistro turístico galego, como marca a norma e esixe a líder do BNG

Alén do tirapuxa a respecto da escaseza de vivenda protexida, no que Rueda se atribúe "2.403 executadas; construídas ou rehabilitadas con cartos da Xunta" e "case 5.000 adxudicacións" e Pontón advirte que inclúe no cómputo as impulsadas "no bipartito cunha consellería de Vivenda dirixida polo BNG", o debate entre ambos xirou tamén en torno aos pisos turísticos. Concretamente, en torno ao cuestionamento de Pontón sobre se Rueda "vai facer algo para que a Xunta deixe de amparar ilegalidades" e "retirar do rexistro" turístico as que non cumpren coa normativa municipal, esixiu co foco posto especialmente en Santiago.

Ana Pontón diríxese a Rueda durante a sesión de control deste mércores en presenza de Olalla Rodil CC-BY-NC-SA BNG

"Faremos o que diga a lei", sinalou o popular, para acto seguido reducir a cuestión a unha "recomendación que me fai" Pontón a respecto dos arredor de 700 pisos irregulares en Compostela que seguen constando no rexistro de Turismo de Galicia. Figuran nel malia ao decreto de 2017 que obriga a dalos de baixa por non encaixar na regulación municipal. 

Se acaso, agrega, "sería necesario" borralas do rexistro para "deixarlles sitio ás 8.000" que, di agoirar, pasarán a exercer este negocio abeirándose na posibilidade de dedicárense ao turismo 60 días ao ano que abre a mesma norma local. Porque, agrega o presidente, a Pontón "non lle gustan os pisos turísticos" pero "iso de levantar muros e prohibicións non constrúe vivendas".

Despece

  • Besteiro censura que a Xunta "quite aos pobres para eximir os ricos" dos impostos: "Teima en ser o sheriff de Nottingham"

    José Ramón Gómez Besteiro, con Lara Méndez en segundo termo, na sesión de control deste 10 de xullo CC-BY-NC-SA PSdeG

    A sesión de control previa á fin do período de sesións iniciouna o secretario xeral do PSdeG, José Ramón Gómez Besteiro, que puxo no albo a política da Xunta en materia de impostos e a súa repercusión nas arcas dos concellos e por extensión, na veciñanza. Porque, di o socialista, o Goberno do PP segue centrado en "quitar aos pobres para eximir os ricos" de pagar impostos. 

    Rueda insiste en culpar os tributos estatais da suba do recibo de Sogama e o líder do PSdeG advírteo de que "podería establecer exencións" como fai "para as rendas máis altas" no imposto de patrimonio. Pero neste caso "non ten inconveniente en aplicalo a través dos concellos"

    "Cando todos queremos ser Robin Hood, vostede teima en ser o sheriff de Nottingham", ironizou o lucense. Para explicar, por exemplo, como "van pagar os galegos e galegas" decisións do Goberno galego como "enterrar e queimar" o lixo en Sogama. 

    Mentres a Xunta ultima a suba do recibo que cobra ás administracións locais e Rueda insiste en culpar os impostos estatais que "ao final van o recibo das persoas", Besteiro matiza que na repercusión dese tributo "podería establecer exencións", como fai "para as rendas máis altas" no imposto de patrimonio. Pero neste caso "non ten inconveniente en aplicar a través dos concellos" un imposto que o estado cedeu á Xunta. 

    "Aí si que non andou recorrendo" ante o Tribunal Constitucional como co imposto ás grandes fortunas, compra o socialista. "A súa loita contra a constitucionalidade vai en función do que le apetece e mentres, seguimos facendo cargas" a uns concellos que, di, tamén agardan por máis recursos da Xunta para afrontar competencias coma o Servizo de Axuda no Fogar (SAF)

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza