Rueda presenta as municipais como "antesala" da campaña de Feijóo, que se atribúe a caída de Pedro Sánchez en 2016

Rueda e Feijóo, na presentación das candidaturas do PP ás municipais, este 25 de febreiro en Santiago CC-BY-SA PPdeG

Hemeroteca

O PP de Galicia recuperou este sábado a escenografía das súas grandes ocasións para, na presentación das súas cabezas de lista ás eleccións municipais nos 313 concellos galegos, facer ver que conserva intacta a capacidade de organizar mitins de gran asistencia. Foron unhas catro mil persoas, segundo o partido, as que xuntou no compostelán Multiusos Fontes do Sar nun acto con alcaldables, membros das listas e outros cargos no que o agora presidente dos populares en Galicia e da Xunta, Alfonso Rueda, volveu quedar en segundo plano fronte ao seu xefe de filas, o ex-presidente e líder do PP estatal, Alberto Núñez Feijóo.

O PP recupera a escenografía das súas grandes ocasións para presentar as cabezas de lista ás municipais en Galicia facendo ver que conserva a capacidade de organizar mitins de gran asistencia

O mitin comezou coa intervención do candidato compostelán, Borja Verea, das aspirantes conservadoras ás alcaldías de Cambados e Pol, Sabela Fole e Nicole Grueira, e mais do alcalde de Xunqueira de Ambía e candidato á reelección, o veterano José Luis Gavilanes -un por provincia-. Seguiu, en orde crecente de xerarquía, coa intervención de Rueda, que deu en presentar as municipais do 28M como unha "antesala" da campaña das xerais para un Feijóo que se presentou a si mesmo como responsable da caída de Pedro Sánchez en 2016, cando o agora presidente do Goberno de España perdeu o liderado do PSOE como froito dunha conxura interna dos favorables á abstención na investidura de Mariano Rajoy.

Rueda e Feijóo, con aspirantes do PP ás alcaldías, outros cargos e asistentes ao mitin do PP deste sábado en Santiago CC-BY-SA PPdeG

"É certo que son eleccións municipais", evidenciou Rueda, pero para o PP son "antesala de moitas cousas, de cambiar" o Goberno de España porque "así non podemos seguir, xa está ben, xa estamos fartos", enfatizou despois de censurar que ministros do PSOE critiquen a Feijóo pola súa xestión na Xunta. "Veñen dicirnos, manda carallo, que non vales porque es galego e xestionaches Galicia", afirmou. "A todos eses do PSOE e do Bloque", retou, que "se vaian preparando, porque o PP de Galicia coa súa vitoria nas municipais será parte fundamental de axudar a Feijóo a ser presidente" de España, augurou.

O ex-presidente asegura que vai facer "no conxunto da nación" o que "fixemos en Galicia durante tanto tempo". "A suma de minorías radicais non poderá impoñerse ás maiorías democráticas", apelou

Segundo Rueda, a disxuntiva que se abre neste ciclo electoral é entre "gobernos que decepcionan" ou gobernos "como o da Xunta" e a esa diferenza apelou tamén Feijóo. Entre lembranzas á súa marcha de hai un ano -iniciada precisamente cun acto no mesmo Fontes do Sar-, o ex-presidente asegurou que vai facer "no conxunto da nación" o que "fixemos en Galicia durante tanto tempo", para o que precisa "gañar cunha gran maioría" como as que o levaron á presidencia da Xunta. 

Unha desas maiorías, evocou, foi a que conseguiu nas eleccións de setembro de 2016. E o PSOE, mofouse, "botou a Sánchez á semana seguinte". Polo tanto, veu razoar, "xa sabemos o que lle espera", toda vez que "volverei ser candidato e volveremos gañar". "Non sei o que lle pasará a Sánchez, pero empeza o cambio en España", proclamou entre fortes aplausos. Oito meses despois da súa caída interna en 2016, Pedro Sánchez recuperou o liderado do PSOE cunha ampla vitoria nas primarias de maio de 2017 e un ano despois xa era presidente do Goberno de España tras o triunfo da moción de censura contra Rajoy.

Feijóo, no mitin do PP deste 25 de febreiro en Santiago © David Mudarra / PP

Os discursos de Rueda e Feijóo estiveron salferidos tamén de apelacións aos Gobernos de coalicións sen participación do PP. Se el goberna no Estado, dixo o ex-presidente, "a suma de minorías radicais non poderá impoñerse ás maiorías democráticas". 

E se o PP goberna nos concellos, advertiu o seu sucesor en Galicia, nos gobernos locais non haberá "división", "contradicións", "imposicións ideolóxicas" nin "fallos de xestión". Porque "xa sabemos de que van os bipartitos", advirte ante uns comicios nos que, admite, un dos seus retos é obter poder nas cidades tras un mandato no que o PP só gobernou temporalmente en Ourense, como socio minoritario do bipartito encabezado por Gonzalo Pérez Jácome.

Despece

  • O PP recorta unha declaración do tenente da Alcaldía de Lugo, do BNG, para simular que "ameaza" a candidata do PP

    Visita preelectoral do PP a Lugo, con Tellado e Prado e o anterior candidato, Ramón Carballo, acompañando á súa candidata, Elena Candia, o 25 de febreiro de 2023 CC-BY-SA PPdeG

    D.L.

    Na véspera do mitin con Alberto Núñez Feijóo en Santiago, a dirección estatal do PP enviou a Galicia a dous dos seus membros, o tamén senador por Galicia Miguel Tellado -secretario xeral do PPdeG ata o ano pasado- e o agora voceiro de campaña da formación, Borja Sémper, para acompañar os seus aspirantes ás alcaldías de Lugo, Compostela e Pontevedra en senllos paseos polas cidades. Nas comitivas dos tres paseos preelectorais estivo presente a sucesora de Tellado como 'número dous' do PPdeG, Paula Prado.

    No caso lucense, os conservadores instalaron un posto de propaganda nunha rúa peonalizada polo goberno local, (PSdeG-BNG) e visitaron a Praza de Abastos. Alí Tellado asegurou que cun goberno do PP, fóra da alcaldía lucense dende 1999, Lugo superaría o que denomina "illamento histórico". A súa candidata, ex-alcaldesa de Mondoñedo e aínda tenente da Alcaldía nesa vila, Elena Candia, puxo o foco na necesidade de máis "seguridade", con reclamacións como máis axentes da Policía Nacional.

    Tras os actos a pé de rúa, a acción preelectoral continuou nas redes sociais. Foi a cargo de Prado, que mediante o recorte dunha declaración do tenente da Alcaldía lucense, Rubén Arroxo (BNG), simulou nas redes sociais que o tamén candidato do BNG para o vindeiro 28M "ameaza" á candidata popular.

    Declaracións de Arroxo (BNG) en resposta ao PP sobre a Rolda Leste de Lugo

    A candidata do PP considerou que o goberno de Lugo se "asaña" con ela por destacar que aínda é concelleira en Mondoñedo e supoñer que "non coñece" o impacto dunha autovía proxectada pola Xunta no río Rato. Arroxo (BNG) animouna a "que o tome con máis tranquilidade, porque senón o vai pasar realmente mal" ata as eleccións

    Ao fío do debate no último pleno municipal sobre o a Rolda Leste, un proxecto de autovía urbana que a Xunta recuperou agora tras máis de dez anos paralizado e que atinxe a un espazo natural protexido na contorna do río Rato, Arroxo considerou que "o PP está a quedar só" na defensa do trazado "porque está liderado por unha persoa que non coñece Lugo". "Continúa a ser a Tenente Alcalde de Mondoñedo e é probable que nunca pasease polo Rato", agregou.

    Candia respondeu a estas consideracións afirmando que o goberno lucense se "asaña" con ela e que esas críticas son un ataque persoal. Arroxo, pola súa banda, viu "sorprendente" que Candia "se ofenda tanto" por lle dicir "o que hoxe é verdade", que é concelleira en Mondoñedo, que vive en Lugo hai "tres meses" e que se "coñecese" o parque afectado polo proxecto da Xunta, "seguramente" non o defendería. "Se se ofende por estas cuestións vain ter moi difícil a campaña, por iso a animamos a que o tome con máis tranquilidade, porque senón o vai pasar realmente mal", ironizou.

    Recorte da declaración de Arroxo realizada polo PP e parágrafos completos da mesma información do xornal 'El Progreso' CC-BY-NC-SA Praza.gal

    Estas declaración de Arroxo foron recollidas e contextualizadas polo xornal El Progreso do que Prado recortou un único destaque, "Candia vaino pasar realmente mal", para compartilo nas redes sociais e consideralo "unha ameaza" contra a tamén presidenta provincial do seu partido e vicepresidenta da Mesa do Parlamento. Outros cargos e afíns aos populares compartiron tamén o mesmo recorte.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza