Feijóo á procura dunha neveira

Feijóo escenifica a sinatura dos seus 'contratos' en 2009 e 2023 CC-BY-SA Fotos: PP | Montaxe: Praza.gal

Hemeroteca

O pasado novembro o presidente do Goberno de España ironizou no Senado para expoñer o método co que, dixo, é posible saber que é o que vai facer Alberto Núñez Feijóo como líder do PP. Abonda con observar as portadas "da prensa conservadora" e agardar ata que siga a liña marcada, chanceou para caricaturizar a ruptura do pacto para renovar o Consello Xeral do Poder Xudicial por parte do ex-presidente da Xunta tras posturas editoriais claramente contrarias en varios medios de liña editorial dereitista.

Sánchez afirma que abonda con ollar á "prensa conservadora" para saber o que vai facer Feijóo. Ten tamén a opción de botar man doutro guieiro: o sucedido en Galicia de 2006 a 2009

Alén da sincronía entre eses titulares e as decisións de Feijóo á fronte do seu partido, Pedro Sánchez tería tamén a opción de botar man doutro guieiro para prever os seguintes movementos do presidente dos conservadores: ollar cara ao sucedido en Galicia de 2006 a 2009. Tras máis de medio ano no cargo, o antigo xefe do Goberno galego e o seu equipo asesor de confianza veñen acreditando reiteradamente a reciclaxe de múltiples elementos que xa empregaran na súa etapa de oposición ao Executivo do PSdeG e do BNG en Galicia (dende 2006, cando remudaron o equipo de Fraga, ata 2009, cando lograron a presidencia da Xunta), cuxo nacemento o propio Sánchez viviu de primeira man. Tamén nos seus primeiros pasos no retorno ao poder.

Feijóo asina o seu 'Contrato con Galicia' o 11 de febreiro de 2009 en Santiago

O manual de asedio estreado en Galicia hai década e media desprégase agora dende a madrileña rúa de Génova dende a primavera de 2022. Faino con elementos clave como presentar a situación política ao xeito dunha emerxencia permanente, caricaturizar o Executivo da esquerda como amante do luxo e do desbalde mentres está preso de minorías extremistas ou esixir dimisión no socio minoritario da coalición gobernante. 

As semellanzas son obvias entre o plan de 2009 e o 'remake' de 2023, pero cunha excepción. Daquela Feijóo aínda non tiña o control orgánico completo no PPdeG, pero tampouco tiña que temer que ningún contrapoder interno fixese sombra á súa estratexia de proxección como líder

Nesta liña, esta semana o equipo asesor encabezado por Mar Sánchez Sierra puxo en escena o que fora outro dos seus fitos de oposición no PPdeG. Como en febreiro de 2009, escasos días despois de enviar -sen Feijóo- unha ampla delegación do partido a unha manifestación impulsada pola extrema dereita, os populares artellaron unha escenografía pretendidamente institucional na que dar a Feijóo fasquía presidencial e, nese marco, asinar un "contrato" redactado polo propio PP con diversas esixencias de "rexeneración democrática". Daquela dixo aspirar a cumprilo cunha nota non inferior a "sobresaliente" no seu primeiro mandato na Xunta.

As semellanzas son obvias entre o plan de 2009 e o remake de 2023, pero cunha excepción. Naquela altura, aínda que Feijóo e o seu equipo aínda non contaban cun control orgánico completo no PPdeG -sobre todo en Ourense-, tampouco tiñan que temer ningún contrapoder interno que fixese sombra á súa estratexia de proxección do líder. Agora o panorama é outro e, apenas vinte e catro horas despois da sinatura do reciclado "contrato", a madrileña Isabel Díaz Ayuso volveu ocupar o centro do escenario da dereita co amplísimo balbordo xerado en torno ao seu nomeamento como ex-alumna ilustre na Universidad Complutense de Madrid, as manifestacións en contra e a prol e as súas propias declaracións ao respecto.

O presidente Rueda, o ex-presidente Feijóo, o presidente do Parlamento, Santalices; a vicepresidenta Díaz e o alcalde de Santiago, Bugallo, o pasado 25 de xullo de 2022 CC-BY-SA Xunta

Malia este atranco non semella, en todo caso, que a estratexia da reciclaxe na estratexia de Feijóo vaia cesar. Deste xeito, ante a proximidade das citas electorais cabe agardar que medren, por exemplo, as acusacións de desbalde que ata agora o PP centra no uso por parte de Pedro Sánchez dos transportes oficiais propios da presidencia do Goberno de España. Cabería agardar, por exemplo, episodios semellantes á denuncia pública lanzada polos populares en 2008 sobre a suposta existencia "dun mini-bar" dun "coche oficial de súper-luxo" no vehículo que utilizaba Anxo Quintana (BNG) como vicepresidente da Xunta. 

Aplicando o manual, as 'candidatas' para seren destinatarias de acusacións de "desbalde" e "súper-luxo" como as de 2009 por parte do equipo de Feijóo ben poden ser, por exemplo, Yolanda Díaz ou Irene Montero

Aplicando o manual, as candidatas para seren destinatarias de acusacións semellantes ben poderían ser Yolanda Díaz, vicepresidenta segunda e ministra de Traballo, ou Irene Montero, ministra de Igualdade. Os seus postos no Goberno e roles partidarios sitúanas en posicións políticas parecidas ás de Quintana no Goberno que presidía Emilio Pérez Touriño e, polo tanto, en susceptibles de seren albo de acusacións semellantes. 

Tamén de campañas negativas en segundo plano, como acusacións e insinuacións sobre as súas vidas privadas, envíos de correos anónimos aos medios de comunicación e outras accións como as vividas en Galicia en vésperas das eleccións de 2009. Os populares negaran ser autores de todo aquilo.

Despece

  • O Goberno do PP vira os focos cara a Ana Pontón

    Alfonso Rueda amosa unha copia dos documentos da Asemblea Nacional do BNG de 2021, durante a sesión de control do 25 de xaneiro de 2023 no Parlamento CC-BY-SA David Cabezón / Xunta

    A presenza do círculo asesor máis próximo ao ex-presidente Feijóo na cúpula estatal do PP implica dende mediados do pasado ano a súa ausencia no PP galego e mais na Xunta, onde imperaran dende 2009. Como é sabido, ao chegar á presidencia Alfonso Rueda tivo que compoñer un novo núcleo duro en áreas clave do asesoramento político e da comunicación. Tanto é así que Rueda deu en crear unha "Oficina de Asesoramento Especial e Apoio" ao presidente da Xunta que Feijóo non tiña.

    Dende o inicio do mandato de Rueda, ese equipo vén tendo que combinar a dinámica diaria do goberno coa construción dunha imaxe máis presidencial de quen foi número dous durante década e media. Dar a coñecer o novo líder antes do transcendental ciclo electoral e achegalo ao territorio é observado como clave, de aí a súa intensa axenda en todo tipo de actos, dende os máis protocolarios e oficiais ata numerosas visitas e inauguracións. Non en van, por primeira vez en máis de tres décadas deuse a circunstancia de que o presidente da Xunta partiu dunha posición de menor coñecemento cidadán que a líder do primeiro grupo da oposición, Ana Pontón, portavoz nacional do BNG.

    Rueda e Pontón son, agás monumental sorpresa, dous carteis electorais seguros nas vindeiras eleccións galegas, previstas para 2024 agás no caso dun adianto que o xefe do Executivo teima en negar. E con Pontón, precisamente, é con quen o popular vén polarizando o debate político dende o pasado ano e tamén no inicio deste 2023, un tirapuxa acrecentado polo feito de que o secretario xeral do PSdeG, Valentín González Formoso, non ten asento no Parlamento e ademais, a candidatura socialista á Xunta aínda está por definir.

    Ana Pontón e Olalla Rodil, no inicio do pleno do Parlamento do pasado 25 de xaneiro CC-BY-NC-SA BNG

    Algunhas análises observan que o PP esvara poñendo os focos sinalando cara a Pontón, porque acrecentan o seu perfil como alternativa de Goberno. Outras agregan que tamén contribúen a restar visibilidade ao PSdeG en vésperas dunhas municipais nas que os votos socialistas son clave para que diversos gobernos non caian cara á dereita

    Ese xogo a dous non incomoda -todo o contrario- na contorna do BNG, onde se observa que o feito de que os focos do PP apunten a Pontón acrecentan o seu perfil como alternativa de goberno. Neste contexto encádranse episodios como o vivido esta semana na sesión de control, na que Rueda deu en amosar a capa das teses políticas da última asemblea nacional do Bloque -para afear parte do seu contido-, dando lugar á curiosa imaxe do líder popular exhibindo algo semellante a un cartaz co lema Gañar unha nova Galiza. 

    "Di Rueda que vaias descargando e lendo o programa de goberno do BNG. El tamén o ten claro, comeza o cambio galego", ironizou o Bloque nas redes sociais nunha mensaxe que o PP respondeu en clave de humor horas despois. A imaxe xerada e a súa distribución foi observado nalgúns ámbitos como un esvarón do equipo do presidente.

    Dáse a circunstancia de que nese mesmo pleno outro membro do Goberno, o conselleiro de Sanidade, puxo o foco directamente tamén en Pontón. Julio García Comesaña, no seu caso, fíxoo para afirmar que a manifestación unitaria de SOS Sanidade Pública -plataforma na que se integran múltiples colectivos e tamén o PSdeG e o BNG- responde a "ordes" da portavoz nacional do Bloque. Algunhas análises coidan que afirmacións e accións coma estas contribúen a dar unha maior visibilidade a Pontón e tamén a que a cidadanía comece a observar como posible que sexa a vindeira presidenta. Outras, non obstante, agregan a esa tese a consideración de que a polarización co Bloque tamén contribúe a afastar os focos do PSdeG en vésperas dunhas eleccións municipais nas que os votos aos socialistas son clave para que diversos gobernos locais non caian na banda dereita.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza