Marcos Pérez Pena

Remata o curso parlamentario e facemos balance cunha das debutantes, Yolanda Díaz, debutante ademais nunha posición de gran responsabilidade: viceportavoz de AGE nunha cámara na que a maioría absoluta (e exercida absolutamente) do PP fai máis difícil ca nunca o labor da oposición.

Falamos con organizadores e voluntarias destes festexos composteláns, exemplo de celebración popular, participativa, "de barrio", e realizadas sen apoio económico ningún das administracións. Comezaron este martes e durarán até o domingo, co sábado como día grande.

O Hidria Segundo, antigo barco alxibe do porto de Vigo, foi restaurado entre 1997 e 2006 e, ante a falta de actividade en Galicia, trasladouse a Algeciras. Agora os seus propietarios buscan apoios para traelo de novo ás nosas rías e conformar unha asociación que lle dea uso.

Juan Freire e Antoni Gutiérrez-Rubí publicaron hai uns meses Manifiesto Crowd, unha obra aberta que busca explorar como as transformacións radicais que está a experimentar a nosa sociedade afectan as estratexias empresariais. Defenden que o éxito está do lado das empresas permeables, abertas e interconectadas coa comunidade que as rodea.

O ex director xeral da Unesco ofreceu unha conferencia ante unhas 200 persoas no Ateneo de Santiago. Destaca o poder dunha nacente "cidadanía mundial" ao abeiro das novas tecnoloxías e no marco da fin da hexemonía de Occidente. Reclama que aqueles que poidan mudar o actual estado de cousas "que se atrevan".

Unha manifestación plural e diversa na súa composición e mensaxes demanda “o dereito ao aborto libre, sen máis causas que a vontade da muller nas primeiras semanas" e destaca que as mulleres "non queremos que se nos titorice. Somos capaces, sabemos o que decidimos”. Galería de imaxes e audio no interior.

Despois da aprobación onte pola ICANN e dun periodo transitorio, o dominio será realidade no inicio de 2014. Manuel González, presidente da asociación puntoGAL, salienta a "importancia histórica desta nova" e afirma que "é unha conquista de toda a sociedade e un exemplo de que todos xuntos podemos". Audios no interior.

Un grupo de profesionais, entre os que destacan Manuel Martín -voceiro de SOS Sanidade Pública- ou Pablo Vaamonde, lanzan un manifesto para defender "o eixo vertebrador do sistema asistencial". Manterán xuntanzas con organizacións profesionais, grupos políticos e sindicatos para solicitar o seu apoio ao texto.

CC.OO. presenta un informe que eleva a 104 os trens de media distancia eliminados polo Goberno. Reclaman a implantación das Cercanias en Galicia e denuncia que a diminución de frecuencias é unha forma de "expulsar" os usuarios e de xustificar novos recortes nos vindeiros meses.

Galaxia presenta A cociña dos Cunqueiro, unha obra que recolle oitenta receitas orixinais de Elvira González-Seco, dona do escritor. O seu fillo, César Cunqueiro prologa o libro, editado por Miguel Vila, Colineta.

Ray Krone pasou dous anos no corredor da morte, acusado dun asasinato do que finalmente se demostrou que era inocente. Dende entón converteuse nun activista do colectivo Witness to Innocence, que axuda os condenados e as súas familias e loita pola fin das execucións nos Estados Unidos. Está en Galicia da man de Amnistía Internacional.

A reixa de Navantia, en Ferrol, encheuse de pezas de roupa este domingo nunha acción artística organizada por Radio Buguina. O obxectivo: sinalar a grave crise económica que vive a comarca e, en especial, a do sector naval. Galería de imaxes e vídeo no interior.