Seleccionamos algunhas das principais pezas que publicamos en Praza nos últimos dez días para que, se queres, poidas poñerlles un ollo agora, sen présa
Máis que unha semana, a Semana Santa son case dez días nos que, se traballe ou non, a cabeza desconecta un chisco da actualidade máis inmediata e os ritmos mudan. Pero o mundo seguiu a xirar e en Praza.gal seguimos a publicar novas e reportaxes que, se cadra, che gustaría recuperar devagar tras estes días. Son dez informacións que seguirán dando que falar no futuro e que che agrupamos aquí para que sexa máis doado chegar a elas.
Un xulgado abre dilixencias por prevaricación contra o director de Mobilidade da Xunta pola súa xestión dos autobuses
Nesta exclusiva de Praza.gal contamos como unha xuíza de Santiago, tras unha denuncia de Galibus, asociación de empresas do sector que se sente prexudicada por Monbus, reclama á Xunta os contratos cos que en 2019 e 2020 reorganizou as liñas de transporte público de Galicia. Seguir lendo
A espera por unha consulta especializada no Sergas dispárase a 66 días, como no peor da pandemia
As cirurxías estáncanse en Galicia nos 75 días de espera media segundo os datos oficiais da Xunta, que o Goberno galego aínda non desvelara e que agora se coñecen a través do balance estatal do Ministerio de Sanidade. Seguir lendo
Vigo e A Coruña superan a Santiago e convértense nas cidades con máis pisos turísticos
Nos últimos tres anos o número de vivendas de uso turístico rexistradas legalmente disparouse en Vigo (pasou de 379 a 1.055) e na Coruña (de 365 a 793), superando con claridade os datos de Compostela, que dende hai tempo aplica controis e restricións, especialmente nos barrios con máis concentración. Tamén Pontevedra comezou a aplicar restricións a esta actividade económica. Seguir lendo
Besteiro toma posesión comprometendo "xustiza social, económica e ecolóxica": "Claro que veño facer política"
Nun acto institucional rodeado de expectación, o novo delegado gobernamental apela á xustiza, "un valor cun significado moi especial para min" e lamenta que "se empregue a expresión 'facer política' como algo negativo". "Fagamos política de verdade porque temos unha oportunidade histórica", sinala a Rueda, que lle reclama ser "avogado dos intereses" de Galicia ante o Goberno de España. Seguir lendo
Galicia acada os mellores datos de emprego e paro nun mes de marzo desde a crise de 2008
As inscricións nas oficinas de emprego diminuíron en 2.245 ata quedar nas 141.847 ea afiliación media á Seguridade Social alcanzou os 1,044 millóns de cotizantes. Máis do 38% das contratacións no mesmo período foron indefinidas. Seguir lendo
Os beneficios da AP-9 medran tres veces máis que o tráfico en 2022 e xa rozan o seu récord histórico de 68 millóns
Durante o ano pasado Audasa logrou 67,64 millóns de euros en beneficios despois de impostos, case 16 millóns máis que en 2021. Case o 70% dos tránsitos xa son abonados mediante telepeaxe, un sistema á alza no seu uso por ser preciso para acceder ás peaxes subvencionadas polo Estado, vía que supuxo case 35 millóns de euros en ingresos nese exercicio. Seguir lendo
Montes no rural, propietarios nas cidades: residentes na Coruña, Lugo e Santiago encabezan as solicitudes de cortas de madeira
En 2021 solicitáronse 111 mil permisos para realizar aproveitamentos forestais, nos que se obtiveron dez millóns de metros cúbicos de madeira, máis da metade eucalipto. Aínda que en Ortigueira e A Fonsagrada houbo máis cortas, os concellos de residencia máis habituais dos solicitantes foron urbanos. En todo caso, o 67% das solicitudes foron realizadas por persoas que vivían nos mesmos lugares dos traballos. Seguir lendo
Expertos piden actualizar os plans para recuperar o oso e a Xunta supedita o seu, de 1992, a pactos entre autonomías
O último censo da especie detectou a presenza en Galicia de 11 exemplares dos 370 contabilizados en toda a cordilleira cantábrica. "A área delimitada polos plans de recuperación cubre soamente a metade da área de presenza" do oso, din tres investigadores do CSIC nun recente artigo científico. Seguir lendo
O PP atribúese o aumento de lobos en Galicia tanto en exemplares como en distribución no territorio
A conselleira de Medio Ambiente salienta nun acto dos populares no Senado que desde 2009 as mandas pasaron de 68 a 93. Seguir lendo
Picasso regresa á Coruña: "a cidade na que espertaron os meus sentidos"
Ata o vindeiro 25 de xuño o Museo de Belas Artes acolle a exposición Picasso branco no recordo azul. Debuxando o futuro, unha das citas culturais imprescindibles neste ano en Galicia. A mostra reúne un cento de pezas que reflicten os diferentes períodos artísticos do pintor e o seu vínculo coa cidade, que ata decembro acollerá unha trintena de actividades ao redor do artista. Seguir lendo
