Unha ducia de imaxes de 20 anos de obras do AVE
O 21 de decembro de 2021, dúas décadas e cinco meses despois da primeira pedra, o AVE comezará a circular con pasaxeiros por Galicia. Repasamos unha ducia de imaxes e fitos relevantes da mellora da infraestruturas ferroviarias galegas durante este tempo.
-
01A primeira pedra
No lugar do Barreiro, ao norte de Santiago, no treito entre a estación da capital galega e a de Berdía, os daquela presidentes Fraga e Aznar puxeron o 21 de xullo de 2001 a que denominaron como primeira pedra do AVE galego. Hoxe alí nada máis que a memoria da veciñanza lembra aquel acto. Pola dobre vía electrificada que atravesa a zona circulan a diario unha trintena de trens de pasaxeiros e mercadorías. [CC-BY-SA Praza Pública]
-
02Estacións sen trens
As novas liñas de alta velocidade supuxeron abandonar vellos trazados cheos de curvas que deixaron sen servizos a ducias de estacións por todo o rural galego, como a de Berdía, no treito no que se puxo aquela primeira pedra ao norte de Santiago hai dúas décadas. [CC-BY-SA Praza Pública]
-
03Treitos abandonados
Os vellos trazados substituídos pola alta velocidade quedaron abandonados e nalgúns treitos, unha vez retiradas as vías, é difícil seguir intuíndo por onde circulaban os trens hai non tanto tempo. [CC-BY-SA Praza Pública]
-
04O empurrón do 'Prestige'
Tras uns primeiros anos de obras a baixa velocidade, o afundimento do Prestige fixo que o Goberno de España acelerase algúns treitos, como ocorreu en 2003 coa liña Ourense-Santiago. [CC-BY-SA Praza Pública]
-
05A primeira gran inauguración en 2011
En decembro de 2011 celebrouse a primeira gran inauguración da alta velocidade galega, na liña A Coruña-Santiago-Ourense. [CC-BY-SA Xunta de Galicia]
-
06Angrois
Ano e medio despois da inauguración da liña Santiago-Ourense ocorreu nela o maior accidente da historia da alta velocidade española, con 80 mortes, e en parte relacionado coa decisión de varios anos antes de acelerar ese treito malia non ter continuidade co resto da rede de alta velocidade. [CC-BY-SA Praza Pública]
-
07Vigo-A Coruña nunha hora e vinte minutos en 2015
Tras sucesivas postas en servizo dos subtreitos a medida que se foron terminando, en marzo de 2015 dábase por rematado o Eixo Atlántico entre Vigo e A Coruña que permite unir as dúas cidades nunha hora e vinte minutos. [CC-BY-SA Xunta de Galicia]
-
08Os outros custos do AVE
Rematado o Eixo Atlántico, os esforzos pasaron a centrarse nas obras coa Meseta. Alí se rexistraron dez das cando menos catorce mortes de obreiros que custaron as obras da alta velocidade galega, uns traballos que tamén levaron por diante ríos. [CC-BY-SA Praza Pública]
-
09Madrid-Zamora en 2015
En decembro de 2015 abríase o primeiro gran treito da alta velocidade entre Madrid e Galicia, o Olmedo-Zamora, desde que en 2007 se inaugurara a liña Madrid-Valladolid compartida coa galega ata Olmedo. [© Ministerio de Fomento]
-
10Zamora-Seabra en 2020
En outubro de 2020 a liña de alta velocidade coa Meseta chegou ás portas de Galicia. [© Ministerio de Transportes]
-
11As estacións intermodais
A mellora das liñas ferroviarias galegas tamén supuxo unha aposta por mellorar a intermodalidade trasladando estacións de autobús a carón das estacións de tren, como xa se fixo en Ourense, Santiago ou Vigo e está en proxecto facer na Coruña e Lugo, mentres que Pontevedra e Ferrol xa contaban con esa proximidade física entre terminais. [CC-BY-SA Xunta de Galicia]
-
12Seabra-Ourense en 2021
A entrada en servizo do AVE entre Galicia e a Meseta está anunciada para o 21 de decembro, pero o ano próximo aínda haberá novos recortes de tempo cando empecen a funcionar novos trens e a medio prazo aínda haberá que executar un novo treito de entrada na cidade de Ourense que hoxe obriga aos trens a circular máis despacio ao longo duns 17 quilómetros. [CC-BY-SA Praza Pública]