A Fiscalía mexicana sinala o ex-directivo de Pemex que negociou coa Xunta como "símbolo" da corrupción

Emilio Lozoya, no medio, xunto a dirixentes do antigo consello de administración de Pemex © Pemex

O fiscal xeral de México, Alejandro Gertz Manero, sinala a Emilio Lozoya como "un símbolo" da corrupción que operou no país latinoamericano durante o goberno de Enrique Peña Nieto. A Fiscalía, a través do seu máximo responsable, define o ex-director xeral de Pemex durante a época na que a Xunta consumou varios negocios coa petroleira como "a expresión de toda unha forma de conducirse dunha administración e dun executivo". 

O fiscal xeral de México sinala a Lozoya como "símbolo" da corrupción do goberno de Peña Nieto: "A expresión de toda unha forma de conducirse dunha administración"

En declaracións a The Associated Press, Alejandro Gertz valora o feito de que a investigación sobre a trama de corrupción do caso Odebrecht, que salpica a Lozoya e outros ex-cargos públicos de México, non avanzase antes naquel país tras xurdir escándalos en varios Estados de toda Latinoamérica. "Evidentemente, porque había unha fórmula para encubrir toda esa situación", dixo. 

Mentres, o presidente da Xunta e candidato á reelección polo PP esfórzase en desligar a Lozoya dos negocios de Pemex en Galicia que, non obstante, segundo indicou o propio Executivo galego en 2013 e 2014, Feijóo en persoa tratou directamente con el.

Feijóo, con Emilio Lozoya en instalacións de Pemex en Ciudad de México en marzo de 2014 CC-BY-SA Xunta

Foi a principios de decembro de 2013 cando Emilio Lozoya, detido en España a pasada semana, tomou posesión como novo director xeral de Pemex. Ás poucas semanas, a empresa advertía de que os encargos de dous floteis a Galicia aínda non eran seguros. A Xunta, pola súa banda, teimaba na existencia dos famosos contratos, pero matizaba que non podía amosalos porque "non os tiña".

A Fiscalía de México considera que Lozoya defraudou, como mínimo, 280 millóns de dólares a Pemex

En abril do mesmo ano, poucas semanas despois dunha viaxe de Feijóo a México, Praza.gal adiantaba que Pemex se dispuña a mercar o 51% das accións do estaleiro vigués Barreras, operación que era tornou en oficial o 3 de maio, cando Lozoya levaba seis meses na dirección xeral de Pemex, e foi asinada no correspondente contrato en novembro do mesmo ano en presenza do conselleiro de Economía, Francisco Conde, do devandito Carrera Panizzo e mais de Carlos Roa, xefe de asesores de Lozoya, que pasaría a ser vicepresidente de Barreras ata 2016. Roa tamén está actualmente investigado por presuntas irregularidades na compra de plantas de fertilizantes, no coñecido como caso Fertinal.

O propio fiscal xeral de México sinala o anterior goberno de Peña Nieto pola súa corrupción e considera que Lozoya defraudou, como mínimo, 280 millóns de dólares a Pemex. A prensa daquel país insiste en sinalar as relacións de Mariano Rajoy co ex-presidente mexicano como claves nos posteriores negocios de Pemex en Galicia. Núñez Feijóo acompañara o ex-xefe do Executivo español a México en 2012 nunha xira que foi criticada pola oposición galega pola súa opacidade. Un ano despois, un escándalo electoral sacudía o plan gobernamental do país azteca ao que o presidente da Xunta fiara os investimentos en Galicia. 

Agora, Institucións Penitenciarias decidiu que Emilio Lozoya sexa trasladado dun cárcere de Málaga a outro de Madrid por cuestións administrativas. A data do traslado aínda non se pechou pero a decisión adoptouse por cuestións de proximidade á Audiencia Nacional, o órgano xudicial competente para decidir sobre a orde de extradición emitida polas autoridades mexicanas. 

O xuíz da Audiencia Nacional Ismael Moreno decretou o pasado 13 de febreiro o ingreso en prisión provisional incondicional e comunicada para o ex-director xeral de Pemex por entender que existe risco de fuga. 

Feijóo e o conselleiro Francisco Conde, visitando unha plataforma petrolífera de Pemex con Carrera Panizzo en 2014 CC-BY-SA Xunta

Lozoya foi arrestado en Málaga por unha orde internacional de detención emitida polas autoridades mexicanas, que o buscaban por "un delito de operacións con recursos de procedencia ilícita", equivalente a branqueo de capitais en España e que comprende unha pena máxima prevista de 15 anos de prisión.

A compra de Barreras por parte de Pemex é investigada polo Goberno, a Fiscalía, o Tribunal de Contas e a propioa petroleira estatal

Ademais doutros casos, a Fiscalía mexicana tamén investiga a Lozoya pola compra de Barreras por parte de Pemex, que foi tamén investigada polo Tribunal de Contas de México, o Goberno daquel país e a propia petroleira. 

A investigación impulsada por México é a secuencia lóxica, logo das denuncias feitas por López Obrador sobre os negocios da petroleira. Nunha rolda de prensa xunto aos novos xestores de Pemex puxo o foco no acordo coa Xunta e na participación da petroleira no estaleiro vigués, que foi denunciada ante a Fiscalía

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.