A UE desbota un peche de fronteiras "indiscriminado" pola terceira vaga da pandemia, pero pide restrinxir todas as viaxes non esenciais. É unha das principais conclusións do Consello Europeo celebrado este xoves por videoconferencia, na que os Estados membros sinalaron a potencial maior capacidade de expansión das novas variantes do SARS-CoV-2. (Imaxe: ©UE)
A área sanitaria de Pontevedra confirma a vacinación contra a COVID-19 de 17 membros do seu persoal que non cumprían os requisitos e aos que lles correspondería recibir a dose máis tarde. O Sergas atribúeo a un "erro" na elaboración das listaxes de persoal ao que si corresponde vacinarse xa, nas que foron incluídos integrantes de departamentos como informática ou administración. Está a contalo Pontevedra Viva
Detectado un foco do coronavirus nunha granxa de visóns americanos da Baña con 3.100 exemplares que serán sacrificados. A Xunta, que vén analizando periodicamente mostras deses animais, di que xa informou do caso ao Ministerio de Agricultura. [Imaxe: Xunta].
Juan Vieites, novo presidente da patronal galega co 89% dos votos. O presidente de Anfaco-Cecopesca ocupará unha cadeira baleira desde hai tres anos nunha Confederación de Empresarios de Galicia protagonista polas súas liortas internas.
As persoas maiores de 80 anos serán o seguinte grupo en ser vacinado contra a COVID-19, unha vez que sexan inmunizadas as persoas usuarias de residencias, persoal sanitario e grandes dependentes. Así o vén de anunciar o Ministerio de Sanidade trala xuntanza do Consello Interterritorial, que non adoptou ningunha decisión para modificar o Estado de Alarma de cara a un posible adianto do toque de queda, como reclaman varias comunidades autónomas
Joe Biden toma posesión como presidente dos Estados Unidos de América. O demócrata e mais a súa vicepresidenta, Kamala Harris, veñen de xurar os seus cargos nun acto inaugural da lexislatura marcado pola COVID e, sobre todo, polas fortísimas medidas de seguridade en Washington, acrecentadas tras o asalto ao Capitolio por grupos de extrema dereita partidarios de Trump o pasado día 6.
O antes e o despois. Rube, o lobo mariño rescatado en Valdoviño en novembro, xa está recuperado e embarcará mañá en Vigo para ser soltado no Gran Sol. Foi atopado con poucas semanas de vida e 11 quilos de peso e agora, tras o seu paso polas instalacións da Coordinadora para o Estudo dos Mamíferos Mariños (Cemma), pesa xa 25 quilos. [Imaxe: Xunta]
Donald Trump vén de deixar a Casa Branca a bordo do helicóptero presidencial. Ás cinco da tarde, hora galega, comeza a toma de posesión do seu sucesor, Joe Biden.
A Xunta corrixe o decreto de restricións pola COVID-19 publicado a pasada noite para volver incluír a Lugo entre os concellos con peche perimetral. Nunha edición extraordinaria do DOG publicada este mesmo mércores, o Goberno galego evidencia que "cómpre emendar o erro padecido pola omisión do concello de Lugo". O conxunto de medidas mantense, deste xeito, sen cambios a respecto do anunciado. Na imaxe, control policial na cidade de Lugo polas restricións da pandemia.
Dende a pasada noite están no DOG as novas restricións aprobadas pola Xunta fronte á COVID-19, en vigor dende a vindeira media noite. Inclúen un novo nivel de medidas reforzadas en Arteixo, Viveiro e Xinzo, peches perimetrais en 55 novos concellos e a suspensión do deporte federado de nivel autonómico en toda Galicia. Podes consultar todas as medidas sobre o mapa nesta ligazón.
