As persoas maiores de 80 anos serán o seguinte grupo en ser vacinado contra a COVID-19, unha vez que sexan inmunizadas as persoas usuarias de residencias, persoal sanitario e grandes dependentes. Así o vén de anunciar o Ministerio de Sanidade trala xuntanza do Consello Interterritorial, que non adoptou ningunha decisión para modificar o Estado de Alarma de cara a un posible adianto do toque de queda, como reclaman varias comunidades autónomas
Joe Biden toma posesión como presidente dos Estados Unidos de América. O demócrata e mais a súa vicepresidenta, Kamala Harris, veñen de xurar os seus cargos nun acto inaugural da lexislatura marcado pola COVID e, sobre todo, polas fortísimas medidas de seguridade en Washington, acrecentadas tras o asalto ao Capitolio por grupos de extrema dereita partidarios de Trump o pasado día 6.
O antes e o despois. Rube, o lobo mariño rescatado en Valdoviño en novembro, xa está recuperado e embarcará mañá en Vigo para ser soltado no Gran Sol. Foi atopado con poucas semanas de vida e 11 quilos de peso e agora, tras o seu paso polas instalacións da Coordinadora para o Estudo dos Mamíferos Mariños (Cemma), pesa xa 25 quilos. [Imaxe: Xunta]
Donald Trump vén de deixar a Casa Branca a bordo do helicóptero presidencial. Ás cinco da tarde, hora galega, comeza a toma de posesión do seu sucesor, Joe Biden.
A Xunta corrixe o decreto de restricións pola COVID-19 publicado a pasada noite para volver incluír a Lugo entre os concellos con peche perimetral. Nunha edición extraordinaria do DOG publicada este mesmo mércores, o Goberno galego evidencia que "cómpre emendar o erro padecido pola omisión do concello de Lugo". O conxunto de medidas mantense, deste xeito, sen cambios a respecto do anunciado. Na imaxe, control policial na cidade de Lugo polas restricións da pandemia.
Dende a pasada noite están no DOG as novas restricións aprobadas pola Xunta fronte á COVID-19, en vigor dende a vindeira media noite. Inclúen un novo nivel de medidas reforzadas en Arteixo, Viveiro e Xinzo, peches perimetrais en 55 novos concellos e a suspensión do deporte federado de nivel autonómico en toda Galicia. Podes consultar todas as medidas sobre o mapa nesta ligazón.
Endesa anuncia o peche definitivo da central térmica das Pontes tras fracasar as probas con biocombustibles. A empresa atribúe a decisión a un "cúmulo de razóns, especialmente de carácter medioambiental".
A Avogacía do Estado pide ao Tribunal de Estrasburgo que rexeite o recurso da familia do cámara galego José Couso, asasinado por disparos de militares dos EUA en Iraq. Faino apelando á reforma da xustiza universal de 2014, que xa obrigou a pechar o caso.
Os colexios Saco e Arce, Marcos da Portela e Fernández Latorre, de Ourense, A Coruña e Pontevedra, gañan o concurso ‘Contádenos o voso Día das Letras de Ricardo Carvalho Calero’. Parte dos seus traballos poden verse nos vídeos enlazados no nome de cada centro.
A xustiza suspende o adiamento das eleccións catalás, que volven ser o vindeiro 14 de febreiro. O Superior catalán bota abaixo a intención do Govern de celebrar os comicios o 30 de maio. En Galicia, os comicios previstos para o 5 de abril foron aprazados ao mes de xullo.
