As Celtas acompaña o filial do Deportivo no ascenso á Segunda Federación Feminina de fútbol. O conxunto vigués venceu no partido decisivo ao Valladolid e obtén a segunda praza tras o Dépor B, que se proclamou campión a pasada xornada. En fútbol masculino, o Compostela descende a Terceira Federación.
⛈Galicia activa desde este mediodía a alerta amarela por fortes chuvias e tormentas na provincia da Coruña, na Mariña e no interior de Pontevedra. Prevense chuvias de máis de 15 litros/m2 nunha hora a partir das 15 horas e durante toda a tarde e posibilidade de saraiba.
O presidente de Alcoa advirte que "é moi difícil ter un negocio electrointensivo nun lugar que non pode garantir a electricidade". William Oplinger alerta do impacto do apagamento do pasado luns nas instalacións da Mariña e cre que se tardará "días en avaliar os riscos asociados a novas perdas de potencia".
A Xunta permite a Feijóo facer un acto do PP no centro de emerxencias do 112 na Estrada para cargar contra Sánchez pola xestión do apagamento. O líder popular estivo acompañado de Alfonso Rueda, quen tras as críticas polos "caos" nos colexios asegura que a Xunta xestionou a crise "dunha forma aceptable e moi profesional".
Amancio Ortega, dono de Inditex, convértese no primeiro accionista privado de Red Eléctrica Española logo de que o fondo de investimento BlackRock vendese parte das súas accións tras o apagamento do pasado luns. O fundador do xigante téxtil posúe o 5% a través da sociedade investidora Pontegadea. Foto: Inditex.
A Xunta perdoa as débedas que fosen inferiores a 3 euros a 31 de decembro pasado. O Diario Oficial de Galicia (DOG) establece a "anulación e baixa en contabilidade de todas aquelas liquidacións que se atopen en período executivo das que resulte unha débeda pendente de recadar inferior a tres euros".
A 'flotilla' da Liberdade de Gaza, bombardeada con drons en augas internacionais, preto de Malta. A organización sinala Israel como responsable do ataque contra un dos seus barcos. Trinta persoas estaban a bordo da embarcación atacada na pasada noite.
Denuncian que oito refuxiados malienses foron obrigados a baixar do autobús de Monbus da liña de Ourense a Allariz. "Estamos ante un caso de racismo, é a única explicación que atopamos para un acto tan vergoñento", sinalan ao xornal La Región, que desvela o sucedido, dende a Fundación Laboral de la Construcción, entidade na que estes mozos están a formarse en Vilamarín. Na imaxe, de arquivo, un autobús da compañía na estación de Ourense.
Competencia autoriza que o BBVA merque o Banco Sabadell, pero con condicións que deixan o visto e prace definitivo á operación nas mans do Goberno de España. Entre os compromisos que o BBVA di asumir está crear unha conta para "clientes vulnerables" ou "non abandonar ningún municipio no que, como consecuencia da operación, estea presente algunha das partes cunha soa oficina competidora". BBVA e Sabadell suman 180 sucursais en Galicia e operan á vez en 43 concellos. Onde máis coinciden é nas cidades da Coruña e Vigo e nunha trintena de concellos máis teñen cadansúa oficina
A Xunta propón converter a cheminea de 75 metros de Altri nunha "icona" a través da súa cor e de elementos decorativos. Así o aclara o informe de Patrimonio Cultural, segundo conta Europa Press.
