Fálase

Os principais incendios forestais que atinxen este domingo aos montes galegos afectaron xa a algo máis de 740 hectáreas, unhas 665 delas na provincia de Ourense. O maior dos comunicados pola Consellería do Medio Rural é o que afecta Rebordechau (Vilar de Barrio), unhas 350 hectáreas ardidas, seguido de Pentes (A Gudiña), con 120 e Sabuguido (Vilariño de Conso), con 80. Outro dos focos afecta ao parque do Xurés en Lobios (75 hectáreas) e en Laza arderon xa unhas 40. Fóra de Ourense, un incendio en Hospital (Quiroga) queimou unhas 53 hectáreas ata agora e outro en Cuntis, unhas 25. Na imaxe, do Exército do Aire, o incendio en Vilariño de Conso. Ampliamos a información neste espazo

Meteogalicia rexistra temperaturas próximas aos 40 graos en varios puntos da metade sur de Galicia, con ata 39 en Redondela ou 38,6 en Leiro. O servizo meteorolóxico galego destaca tamén o "alto contraste" co norte, con máximas de apenas 20 graos en puntos da Mariña ou da Costa da Morte. "Mañá a calor estenderase cara o norte", sinala Meteogalicia, que mantén o aviso amarelo por calor durante o domingo en puntos do Baixo Miño e varios concellos ourensáns.

A Comisión Europea propón dedicar 2 millóns de euros á formación, reciclaxe profesional e busca de emprego para persoal do naval galego e da industria auxiliar que perdese o seu posto de traballo. A proposta do comisario de Emprego vén de ser enviada ao Parlamento e ao Consello para ser aprobada. Nesta ligazón, o comunicado oficial en inglés e nestoutra, unha tradución automática ao galego. 

O pleno de Ourense aproba a moción do BNG a prol da dimisión do alcalde, Gonzalo Pérez Jácome, con 24 votos a prol (PSdeG, PP, C's, o propio BNG e os edís díscolos de Democracia Ourensana) e 2 en contra (o do propio Jácome e o seu tenente de alcalde, Armando Ojea). A corporación ten 27 membros, pero aínda non tomou posesión o restante edil de DO. Na imaxe, do Concello de Ourense, a sesión plenaria -celebrada no salón de plenos da Deputación-. 

• Jácome opta por resistir na alcaldía de Ourense fronte ao "golpe de Estado" do PP e dos "traidores" de DO

A Xunta amplía as restricións polo coronavirus a Laxe, Lalín, A Guarda, O Rosal, Vilaboa e Poio. Así o vén de comunicar a Consellería de Sanidade, que especifica que as restricións relativas ao 50% de capacidade en comercio e hostalaría e en diversas reunións serán publicadas nunha edición extraordinaria do DOG, esta tarde. Ampliamos a información neste espazo

A Xunta adía unha semana o inicio do curso para Secundaria. O alumnado da ESO, Bacharelato e Formación Profesional volverá ás aulas o 23 de setembro, segundo acaba de anunciar o conselleiro de Cultura, Educación e Universidade, Román Rodríguez. Sindicatos e Anpas foron convocados esta mañá polo novo secretario xeral técnico da Consellería, Manuel Vila, para unha reunión de última hora. Ampliamos a información neste espazo

O BOE publica a derrogación do Real Decreto sobre o uso dos aforros dos concellos, consecuencia do seu rexeitamento polo pleno do Congreso dos Deputados. É o segundo Real Decreto que é tombado pola Cámara Baixa dende que Pedro Sánchez preside o Goberno de España. 

O Consello da Xunta aproba definitivamente os festivos de ámbito galego do calendario laboral de 2021 tras consultalo co Consello de Relacións Laborais. Entre os habituais non figura o Día Nacional de Galicia por cadrar en domingo. Ademais destes festivos, cada concello pode elixir outros dous.

O pleno da Coruña pide por unanimidade a dimisión da presidenta do Consello Superior de Deportes, Irene Lozano, e a inhabilitación do presidente da Liga de Fútbol, Javier Tebas, polo caso Fuenlabrada. Fíxoo cunha declaración institucional na que reitera o apoio a "todas as accións legais que se impulsen para esixir responsabilidades" neste caso, que supuxo a importación dun brote de coronavirus coa expedición do equipo madrileño. O texto completo da declaración, nesta ligazón.

• HEMEROTECA | A xuíza ve “sorprendente” a acusación policial de corrupción ao capitán do Dépor polo partido co Fuenlabrada e arquívaa

O Goberno central non logrará o apoio do Congreso para convalidar o decreto sobre os aforros dos concellos. Así vén de ficar constatado no debate previo á votación, que se celebrará hoxe mesmo. É a primeira derrota parlamentaria relevante do Executivo do PSOE e Unidas Podemos. (Na imaxe, do Congreso, a ministra de Facenda defendendo o texto ante o pleno)

• HEMEROTECA | Da 'lei Montoro' ao 'plan Montero': un "préstamo" dos concellos ao Estado para poderen gastar os aforros