Fálase

Este 1 de abril celébrase o Día das Artes galegas, que este ano está dedicado ao arquitecto Domingo de Andrade. Construíu a Torre do Reloxo da Catedral de Santiago ou a escaleira tripla de caracol do convento de San Domingos de Bonaval, ademais de parte das catedrais de Lugo e Ourense ou a Casa da Parra e a Casa da Conga, en Compostela. A Real Academia Galega de Belas Artes dedicará ao longo do ano unha serie de actos e actividades para enxalzar a súa figura e o Consello da Cultura ofrece un percorrido virtual pola súa obra

A Galipedia anima a aproveitar o confinamento para incrementar os contidos da wikipedia en galego e a súa calidade. A enciclopedia libre lanza a iniciativa #EuTraduzoNaCasa para traducir ao galego artigos de calidade, que acompañan dunha breve guía para que todas as persoas poidan colaborar.

O Goberno central autoriza os concellos e deputacións a celebraren plenos e reunións doutros órganos colexiados por videoconferencia por mor do coronavirus. O Real Decreto-Lei publicado hoxe faculta as alcaldías e presidencias a decidiren facelo deste xeito en "situacións excepcionais de forza maior".

O BOE publica este 1 de abril o Real Decreto-Lei coas axudas aprobadas polo Goberno central para paliar as consecuencias económicas do coronavirus en materias como o pago da luz e da auga, moratorias de alugueiros ou cotas de autónomos. O texto íntegro pódese consultar aquí

A Xunta confirma a apertura de "hospitais de reforzo" no recinto feiral coruñés Expocoruña e no multiusos fontes do Sar de Santiago para atender o coronavirus e "non descarta" facelo no Ifevi de Vigo. Ampliamos a información neste espazo

Xa se pode ver na rede, integramente e de balde, o documental Camilo: o último guerrilleiro de Galicia, unha conversa con Camilo de Dios, o derradeiro guerrilleiro galego que ficaba con vida, finado o pasado mes de decembro. O filme foi realizado por catro antigos estudantes da Facultade de Ciencias de Comunicación da UDC.

O persoal das actividades esenciais que teña que seguir traballando ten dereito a que a súa empresa lle entregue unha declaración responsable que facilite os seus desprazamentos. Esta é, e pode descargarse do BOE aquí.

A Xunta intervén dúas residencias privadas de maiores DomusVi en Vigo e Cangas ao abeiro do estado de alarma polo "elevado número de positivos por coronavirus entre as persoas usuarias e traballadoras". Serán, sinala a Xunta, convertidas temporalmente en "residencias integradas" para persoas anciás residentes e contaxiadas pola covid-19, ao xeito das habilitadas en Santiago e Baños de Molgas.

• HEMEROTECA | As traballadoras e as persoas internas das residencias de maiores, en "situación límite" polo coronavirus

A Organización Mundial da Saúde confirma que o coronavirus covid-19 non se propaga libremente polo aire. GCiencia debulla o informe da OMS ao respecto

Casado avanza que o PP non apoiará no Congreso os reais decretos aprobados polo Goberno central para ampliar o estado de alarma polo coronavirus "se non se modifican". O líder conservador di detectar unha "deriva cara ás teses de Podemos" en materias como a suspensión da actividade económica cun permiso retribuído, que hoxe entrou en vigor. Casado tamén lamenta que os medios de comunicación "poñan o foco no positivo" e non en "entrevistas a persoas afectadas" ou "nas morgues" (Imaxe: PP)