Fálase

A Xunta aproba recorrer o imposto do Goberno de España ás grandes fortunas ante o Tribunal Constitucional. Faino, esgrime o presidente Rueda, para preservar descontos tributarios da Xunta ás rendas altas como as aprobadas recentemente no imposto de patrimonio. Na imaxe, reunión do Consello da Xunta deste xoves [CC BY-SA David Cabezón / Xunta]

• AMPLIAMOS 👉 A Xunta recorre o imposto estatal ás grandes fortunas na defensa da súa rebaixa tributaria ás rendas máis altas
• HEMEROTECA | Menos impostos aos soldos baixos fronte a rebaixas con extra para ricos: colisión tributaria entre Estado e Xunta
• HEMEROTECA | Os beneficiarios da nova rebaixa de impostos da Xunta dispararon un 55% o investimento en coches, xoias e peles na pandemia 

O Ministerio do Interior do PP espiou xornalistas sen orde xudicial para buscar filtracións, segundo revela este xoves a Cadena SER. A información tírase do sumario do caso Kitchen, no que está investigado o ex-ministro Jorge Fernández Díaz e o seu secretario de Estado de Seguridade, Francisco Martínez, entre outros, por presuntamente artellaren unha operación policial ilegal para buscar e destruír probas que inculpasen o PP no caso Gürtel.

A Comisión pola Recuperación da Memoria Histórica (CRMH) da Coruña denuncia ante a Fiscalía o Concello por incumprimento da Lei de Memoria Democrática ao manter unha rúa e un cadro de honra no Consistorio en homenaxe a Peñamaría de Llano, ex-alcalde e líder da represión fascista en Valdeorras. O seu nome figura como un dos que se debería eliminar segundo o informe encargado polo goberno local ao instituto José Cornide. 

• Valdeorras non quere honras para o alcalde franquista da Coruña que liderou a represión na comarca

O Congreso rexeita a moción de censura de Vox por ampla maioría absoluta, con 201 votos en contra, 52 a prol (os da formación de extrema dereita e os dun tránsfuga ex-membro de C's) e 91 abstencións do PP -e dos seus aliados-, que na anterior ocasión, aínda con Pablo Casado, votara en contra. Na imaxe, un intre do debate. [Imaxe: © Congreso]

• 📺 Sánchez e Díaz aproveitan a censura da extrema dereita para enxalzar a coalición ante o ciclo electoral

Arde un buque que transporta combustible a uns 18 quilómetros da Foz do Douro, fronte ás costas do Porto. O Greta K, de bandeira maltesa, dirixíase ao porto de Leixões con gasóleo e combustible para avións, segundo confirma a Mariña de Portugal, e 12 dos seus 19 tripulantes foron evacuados. As autoridades portuguesas remolcaron o buque para afastalo da costa e, informa a RTP, traballan na zona para tentar arrefrialo mentres non se desbotan consecuencias medioambientais. Segundo informa Porto Canal, os medios despregados na zona valoran levar o buque a Leixões ou Sines se é posible facelo en condicions de seguridade. [Imaxe: Mariña de Portugal]

Este mércores continúa no Congreso o debate da moción de censura formulada por Vox con Ramón Tamames como candidato. Tras a quenda dos grupos parlamentarios será o momento da votación. Previsiblemente, a moción será rexeitada por ampla marxe, aínda que menor que na anterior censura de Vox (2020), porque daquela o PP votou en contra -aínda con Pablo Casado- e desta volta os de Feijóo anunciaron a súa intención de abstérense.

• Sánchez e Díaz aproveitan a censura da extrema dereita para enxalzar a coalición ante o ciclo electoral
• 📺 Accede aquí á retransmisión en directo co vídeo en maior tamaño

Dende as 9 da mañá deste martes o Congreso debate a moción de censura formulada por Vox con Ramón Tamames como candidato. A sesión comeza coa intervención da formación da extrema dereita para presentar a moción e a candidatura de quen fora membro do PCE e do CDS e continúa co discurso do propio Tamames. A continuación, interveñen os grupos e tamén pode facelo o presidente do Goberno de España, Pedro Sánchez, e as ministras e ministros que o Executivo considere. A anterior moción de censura de Vox foi a máis rexeitada de todas as formuladas dende a Constitución de 1978: 298 votos en contra e só 52 a prol, os da propia formación de extrema dereita. Previsiblemente, esta terá menos votos en contra porque o PP de Feijóo, ao contrario do sucedido con Casado, prevé absterse e non votar en contra

• AMPLIAMOS 👉 Sánchez e Díaz aproveitan a censura da extrema dereita para enxalzar a coalición ante o ciclo electoral
• 📺 Nesta ligazón podes seguir a retransmisión co vídeo en maior tamaño.

Detida unha veciña de Tui como presunta autora da queima dunha vintena de vehículos a pasada noite na localidade. O goberno local convocou para este serán (20h) unha xuntanza coas persoas propietarias dos coches e vivendas afectados polo lume. [Imaxe: Concello de Tui]

Casado admite ante o xuíz que dixo que en Catalunya hai "profesores con instrucións" de impedir que o alumnado vaia ao lavabo se non fala catalán sen comprobar se era certo. O ex-presidente do PP afirmouno durante un acto de partido con Feijóo en Abegondo en 2021 (na imaxe) e agregou que "volvería" dicir o mesmo porque "sacou" a acusación de "medios de comunicación". Está investigado por inxurias a instancias do Goberno catalán.

• HEMEROTECA (2021) | Feijóo critica “o peor Goberno da historia de España” e que se faga política “ata coa lingua”
• HEMEROTECA (2019) | O PP mantén no programa para o 10N o recorte ao rango legal das linguas oficiais diferentes do castelán

Yolanda Díaz anunciará o 2 de abril nun acto político en Madrid a súa decisión sobre concorrer ás eleccións xerais como candidata á presidencia do Goberno de España á fronte de Sumar. A confluencia coas actuais forzas integradas en Unidas Podemos e outras formacións segue sendo unha das claves deste proceso e das expectativas electorais do proxecto da actual vicepresidenta segunda e ministra de Traballo.