Fálase

A Secretaría Xeral de Igualdade constata un incremento do 35% nas chamadas ao Teléfono de Información á Muller no primeiro semestre do ano. Producíronse 1.842 consultas nestes seis meses, 477 máis que no mesmo período de 2019. A maioría tivo relación coa atención psicolóxica seguida das preguntas sobre recursos e cuestións xurídicas. Os 82 centros de Información á Muller galegos recibiron 5.465 consultas neste semestre, 779 máis que no mesmo período do ano anterior (un 16,6% máis). Porén, os datos ata marzo indican que as denuncias descenderon un 19,5% e ata as 1.397, a maioría concentradas nas provincias da Coruña e Pontevedra. 

O Sergas confirma que está a facer probas PCR a xornaleiros que traballan en invernadoiros de Cospeito tras detectarse un positivo por coronavirus nun destes traballadores. Segundo salienta Radio Lugo, Sanidade resalta que polo momento non considera que se trate dun brote, ao existir un só caso confirmado de positivo pola doenza. Na imaxe, o hospital de Lugo, dende onde están a ser coordinadas as probas.

O Goberno de España ten xa dispoñible para a súa descarga a aplicación móbil Radar COVID para a detección e rastrexo de contactos de persoas que poidan contraer o coronavirus. A app aínda está en desenvolvemento en probas, pero xa se pode obter tanto para móbiles Android como para iPhone. O Ministerio subliña que o seu despregamento depende, en última instancia, das comunidades autónomas.

• Galicia inicia as probas dunha app móbil que dende setembro axudará a rastrexar contactos de casos de Covid19

A Fiscalía da Audiencia Nacional tramita unha denuncia dunha asociación monárquica contra a portavoz nacional do BNG, Ana Pontón. O colectivo Concordia Real Española, que tamén denunciou a Pere Aragonés (ERC) e Teresa Rodríguez (Adelante Andalucía) acusa a líder do Bloque de "inxurias" á Coroa ante o Ministerio Público por afirmar, por exemplo, que "queremos que xulguen os Borbóns por ladróns", publicou o ABC. A asociación denunciante foi creada o pasado xullo e ten como voceiro a Alfredo Urdaci, xefe de informativos de TVE na etapa de Aznar.

O incendio de Lobios no que morreu o piloto dun hidroavión contra incendios de Portugal queimou xa unhas 400 hectáreas. O incendio atinxe ao parque natural do Xurés igual que o que afecta ao municipio veciño de Muíños, onde arderon polo momento unhas 50 hectáreas, segundo Medio Rural. Máis información, hoxe en Praza.gal (Imaxe: Brif Laza)

Nas fins de semana de agosto, Praza.gal non se actualiza por descanso do persoal. Pero deixamos moito para ler e o luns estamos de volta :)

O Concello da Coruña confirma a suspensión do Festival Noroeste e de "todos os espectáculos incluídos dentro das Festas
de María Pita" por mor das restricións para frear os brotes de coronavirus na comarca, que entrarán en vigor dende esta media noite. 

A Xunta pecha os locais de lecer nocturno e prohibe festas e verbenas nos nove concellos da comarca da Coruña para "frear a expansión" dos brotes de coronavirus por "risco de transmisión comunitaria" na zona. Ademais, suspende visitas e saídas nas residencias de maiores e pecha os centros de día na área sanitaria da Coruña-Cee A área sanitaria coruñesa ten este venres 177 casos "activos" da COVID-19 e suma 18 dos 44 novos positivos rexistrados en Galicia nas últimas vinte e catro horas. Estamos a ampliar a información neste espazo

Miguel Santalices, reelixido presidente do Parlamento cos votos do PP. As votacións ratifican que a vicepresidencia primeira volve ser para Diego Calvo (PP) e a vicepresidencia segunda corresponde a Montse Prado (BNG). A Mesa completouse coas secretarías noutra votación: a primeira é para Corina Porro (PP) e a segunda, para Marina Ortega (PSdeG). Neste espazo de Praza.gal, o máis destacado da sesión constitutiva da XI Lexislatura

Miguel Santalices recunca esta mañá como presidente do Parlamento na undécima lexislatura. O PP vén de confirmar que volve optar polo veterano parlamentario ourensán, que exerce o cargo dende 2016 e manteñen na Mesa a Diego Calvo como vicepresidente, agora secundado por Corina Porro como secretaria primeira. Os conservadores continuarán tendo a Pedro Puy como voceiro e outorgan á lucense Elena Candia unha terceira viceportavocía xunto ás de Miguel Tellado e Paula Prado.