A destitución do xeneral da Garda Civil Pérez de los Cobos profunda a fenda entre o Ministerio do Interior e o alto mando do Instituto Armado. Segundo transcendeu, a orixe do cesamento é a negativa do destituído a informar o Goberno central dun informe que, remitíndose a novas dalgúns medios, informacións incompletas e testemuños dubidosos, pretende sinalar a manifestación feminista do 8M en Madrid como clave da expansión do coronavirus.
Quince medios de comunicación editados en diversos puntos do Estado, entre eles Praza.gal, piden ao Goberno central unha nova lei de publicidade institucional rexida por "criterios de respecto á igualdade e á diversidade para fomentar a pluralidade informativa". A proposta íntegra pode consultarse nesta ligazón.
O val do Miño estará en aviso amarelo este mércores en Ourense e Pontevedra por temperaturas superiores aos 34º por unha entrada de aire africano.
O Tribunal Supremo avala que Concello e Xunta limitaron correctamente en 2016 aos barrios históricos de Vigo e Bouzas a liberdade horaria por motivos turísticos, fronte á Asociación Nacional de Grandes Empresas de Distribución (Anged) que reclamaba máis liberdade.
12X | Ciudadanos volve reclamar a confluencia co PP para as eleccións galegas. Segundo a súa voceira, Beatriz Pino, faino para frear a "ameaza real" de que en Galicia gobernen as formacións da actual oposición, ás que define como "nacionalistas e populistas". "Xa vemos quen son os aliados do BNG no Congreso", engade.
O xuíz instrutor do accidente de Angrois volve aprazar a comparecencia de catro testemuñas sobre o posible borrado de datos do tren ao 10 de xullo, dúas semanas antes do sétimo aniversario do sinistro. Será nove meses despois de que un ex-mecánico de Talgo denunciase eivas no Alvia e se producisen sucesivos aprazamentos das comparecencias, os dous últimos polas restricións obrigadas polo coronavirus.
A Policía Local de Lugo rescata do tráfico unha cría de bufo incapaz de voar e trasládaa ao centro de recuperación de fauna do Veral.
12X | Unha enquisa de NC Report para La Razón sitúa o PP entre 1 e 2 escanos por riba dos 38 da maioría absoluta, con 39 ou 40 -agora ten 41-. O PSdeG sería segunda forza con entre 18 e 19 -hai catro anos quedou en 14- e o BNG, como terceira forza e grupo que máis medraría, con 11 -agora ten 6-. A cuarta forza do Parlamento sería Galicia en Común con 6 escanos, segundo este inquérito. A esquerda precisaría tres escanos máis para formar un Executivo alternativo.
O BNG pide á Xunta Electoral que interveña para evitar que Feijóo "utilice" a TVG e a Radio Galega "na súa precampaña". A portavoz do Bloque, Ana Pontón, esixe "garantías sanitarias e democráticas" de cara ao 12X. O persoal da CRTVG xa advertiu da "manipulación informativa" en favor do PP durante a pandemia.
Feijóo pide ao Goberno central que non haxa máis prórrogas do estado de alarma en Galicia porque "as cousas van indo ben". Sánchez pediulle "cautela", segundo informa eldiario.es.
