Fálase

Persoal dos medios públicos en folga lanza un SOS para o “rescate” da CRTVG. Cuarta xornada de paros na Radio Galega e mais na TVG, onde volveron cortar a emisión en directo do programa ‘O Termómetro’, símbolo das protestas pola externalización de contidos, que “agravan a manipulación informativa”, segundo destaca o Comité Intercentros. 

Nas concentracións deste luns as traballadoras e traballadores recibiron o apoio do secretario xeral do PSdeG, José Ramón Gómez Besteiro, quen sinalou que a nova lei para os medios públicos impulsada pola Xunta supón unha “volta atrás” nun momento “no que todos deberamos estar traballando na transparencia e na democratización das institucións públicas”; e da secretaria nacional do sindicato CCOO en Galicia, Amelia Pérez.

👉🏻A folga na CRTVG volve interromper a emisión ao vivo e o comité acusa a dirección de tentar "rebentala"

👉🏻O comité de folga da CRTVG insta a rachar coa "espiral de silencio que impera no sistema mediático galego"

O 3% dos concellos galegos aínda non cumpren coa obriga de contar cunha web de transparencia. Así o recolle un estudo do Observatorio da Sociedade da Información e Modernización de Galicia, dependente da Xunta. O estudo, que só recolle estatísticas e non identifica os concellos, sinala que o 1,5% carecen aínda de rexistro electrónico e que o 89,4% contan con perfil de Facebook

Retencións de varios quilómetros na AP-9 entre o Salnés e Caldas polas obras no viaduto de Portas que reducen a calzada sentido norte a un só carril.

• Audasa segue batendo récords de beneficios tras pagar 20 veces máis polo IBI

Netanyahu di que os Cascos Azuis actúan como "escudos humanos" de Hezbolá e esixe á ONU que os retire de Líbano. Israel atacou nas últimas xornadas en varias ocasións a tropas das forzas de pacificación da ONU. [Imaxe: ONU]

• "A provocación a Irán serve a Netanyahu, que estaba a perder a batalla do relato e agora vólvese colocar no papel de vítima"
• "A postura americana é aterradora, a europea incoherente. Ensinarase Gaza como o momento clave do declive moral de Occidente"

Pedro Madruga non foi Cristóbal Colón, segundo un polémico documental baseado nunha investigación con ADN das respectivas familias. A reportaxe, emitida este sábado en TVE, relata a investigación impulsada polo forense José Antonio Lorente, da Universidade de Granada, que foi descartando diversas hipóteses para concluír que Colón era xudeu do Mediterráneo occidental. A investigación, da que aínda non se fixeron publicacións científicas e criticada por outros expertos, non puido descartar outra das teorías galegas sobre a súa orixe, que Colón fose de Poio, polo mal estado dos restos analizados no cemiterio histórico dese concello. [Imaxe: TVE]

🏅Premios da Cultura Galega 2024. A Xunta distingue con estes galardóns "a excelencia creativa, a capacidade de intercambio, a experimentación e a proxección do panorama cultural da nosa comunidade, así como o compromiso de proxectos, traxectorias e iniciativas que enriquecen a realidade e identidade cultural de Galicia".  

• Manuel Lourenzo en Letras 
• Joaquín Martínez Silva (Esmerarte) en Música
• Marta Pazos en Artes escénicas 
• Ficción Producións en Audiovisual
• Xosé María Pérez Barro en Artes visuais
• Real Club Celta de Vigo en Proxección exterior
• Julia Díaz en Lingua
• Xosé Manuel González en Patrimonio cultural

Terceiro día de folga e novo corte na emisión do programa 'O Termómetro' da TVG, o programa externalizado que deu orixe a enésima protesta do cadro de persoal dos medios públicos galegos. O comité de folga celebra que "as manobras de presión da empresa non amedrentaron abondo" as traballadoras e traballadores da CRTVG, "fartos" de reclamar, segundo destacan nun comunicado, "a fin das inxerencias que sustentan a manipulación informativa". O seguimento da folga –que coincidiu co 'venres negro' 334 do movemento Defende A Galega– foi similar ao do luns e o mércores, segundo o comité, con "máis da metade" das profesionais en activo no momento do paro (de 11.30 a 13h) que abandonaron o seu posto de traballo. [📸 CUT CRTVG]

• A folga na CRTVG volve interromper a emisión ao vivo e o comité acusa a dirección de tentar "rebentala"
• O comité de folga da CRTVG insta a rachar coa "espiral de silencio que impera no sistema mediático galego"
• O primeiro paro cara á folga indefinida na CRTVG paraliza a emisión da televisión pública

O embaixador de Palestina, Husni Abdel Wahed, impartiu unha conferencia este xoves no Paraninfo da Universidade da Coruña, á que asistiron un gran número de representantes institucionais. Pola mañá, asinou no Libro de Ouro da Universidade e visitou o Concello e a Deputación da Coruña, onde foi recibido polo presidente, Valentín González Formoso, e o vicepresidente, Xosé Regueira. Foto: BNG A Coruña.

• ENTREVISTA | Bichara Khader: "A postura americana é aterradora, a europea incoherente. Ensinarase Gaza como o momento clave do declive moral de Occidente"
• ENTREVISTA | Susana Mangana: "A provocación a Irán serve a Netanyahu, que estaba a perder a batalla do relato e agora vólvese colocar no papel de vítima"

A visita, de Núria Figueras e Anna Font, editado por Kalandraka, incluída na prestixiosa lista The White Ravens 2024, elaborada pola Biblioteca Internacional da Xuventude, con sede en Múnic. Destaca pola "calidez" do texto e das ilustracións para o xurado, que o cualifica como "un libro encantador que che fai comprender o marabilloso e delicioso que pode ser gozar do silencio e, simplemente, escoitar o teu interior". A obra xa gañou o XVI Premio Internacional Compostela de Álbum Ilustrado que convoca o Departamento de Educación do Concello de Santiago e tamén recibiu o Premio Fundación Cuatrogatos 2024. Agora entra nesta listaxe xunto a 216 títulos en 44 idiomas e editados en 62 países. 

Premio Nobel de Literatura 2024 para Han Kang. A escritora surcoreana recibe a distinción, en palabras do xurado, "pola súa intensa prosa poética que confronta traumas históricos e expón a fraxilidade da vida humana". A novela de Kang A vexetariana pode lerse en galego grazas á tradución de Alba Verea Pérez na editorial Rinoceronte.