Fálase

Pedro Madruga non foi Cristóbal Colón, segundo un polémico documental baseado nunha investigación con ADN das respectivas familias. A reportaxe, emitida este sábado en TVE, relata a investigación impulsada polo forense José Antonio Lorente, da Universidade de Granada, que foi descartando diversas hipóteses para concluír que Colón era xudeu do Mediterráneo occidental. A investigación, da que aínda non se fixeron publicacións científicas e criticada por outros expertos, non puido descartar outra das teorías galegas sobre a súa orixe, que Colón fose de Poio, polo mal estado dos restos analizados no cemiterio histórico dese concello. [Imaxe: TVE]

🏅Premios da Cultura Galega 2024. A Xunta distingue con estes galardóns "a excelencia creativa, a capacidade de intercambio, a experimentación e a proxección do panorama cultural da nosa comunidade, así como o compromiso de proxectos, traxectorias e iniciativas que enriquecen a realidade e identidade cultural de Galicia".  

• Manuel Lourenzo en Letras 
• Joaquín Martínez Silva (Esmerarte) en Música
• Marta Pazos en Artes escénicas 
• Ficción Producións en Audiovisual
• Xosé María Pérez Barro en Artes visuais
• Real Club Celta de Vigo en Proxección exterior
• Julia Díaz en Lingua
• Xosé Manuel González en Patrimonio cultural

Terceiro día de folga e novo corte na emisión do programa 'O Termómetro' da TVG, o programa externalizado que deu orixe a enésima protesta do cadro de persoal dos medios públicos galegos. O comité de folga celebra que "as manobras de presión da empresa non amedrentaron abondo" as traballadoras e traballadores da CRTVG, "fartos" de reclamar, segundo destacan nun comunicado, "a fin das inxerencias que sustentan a manipulación informativa". O seguimento da folga –que coincidiu co 'venres negro' 334 do movemento Defende A Galega– foi similar ao do luns e o mércores, segundo o comité, con "máis da metade" das profesionais en activo no momento do paro (de 11.30 a 13h) que abandonaron o seu posto de traballo. [📸 CUT CRTVG]

• A folga na CRTVG volve interromper a emisión ao vivo e o comité acusa a dirección de tentar "rebentala"
• O comité de folga da CRTVG insta a rachar coa "espiral de silencio que impera no sistema mediático galego"
• O primeiro paro cara á folga indefinida na CRTVG paraliza a emisión da televisión pública

O embaixador de Palestina, Husni Abdel Wahed, impartiu unha conferencia este xoves no Paraninfo da Universidade da Coruña, á que asistiron un gran número de representantes institucionais. Pola mañá, asinou no Libro de Ouro da Universidade e visitou o Concello e a Deputación da Coruña, onde foi recibido polo presidente, Valentín González Formoso, e o vicepresidente, Xosé Regueira. Foto: BNG A Coruña.

• ENTREVISTA | Bichara Khader: "A postura americana é aterradora, a europea incoherente. Ensinarase Gaza como o momento clave do declive moral de Occidente"
• ENTREVISTA | Susana Mangana: "A provocación a Irán serve a Netanyahu, que estaba a perder a batalla do relato e agora vólvese colocar no papel de vítima"

A visita, de Núria Figueras e Anna Font, editado por Kalandraka, incluída na prestixiosa lista The White Ravens 2024, elaborada pola Biblioteca Internacional da Xuventude, con sede en Múnic. Destaca pola "calidez" do texto e das ilustracións para o xurado, que o cualifica como "un libro encantador que che fai comprender o marabilloso e delicioso que pode ser gozar do silencio e, simplemente, escoitar o teu interior". A obra xa gañou o XVI Premio Internacional Compostela de Álbum Ilustrado que convoca o Departamento de Educación do Concello de Santiago e tamén recibiu o Premio Fundación Cuatrogatos 2024. Agora entra nesta listaxe xunto a 216 títulos en 44 idiomas e editados en 62 países. 

Premio Nobel de Literatura 2024 para Han Kang. A escritora surcoreana recibe a distinción, en palabras do xurado, "pola súa intensa prosa poética que confronta traumas históricos e expón a fraxilidade da vida humana". A novela de Kang A vexetariana pode lerse en galego grazas á tradución de Alba Verea Pérez na editorial Rinoceronte. 

Aprobada por unanimidade a lei ELA no Congreso. Os grupos celebraron aplaudindo en pé o acordo acadado con esta Lei para mellorar a calidade de vida de persoas con Esclerose Lateral Amiotrófica (ELA) e outras enfermidades ou procesos de alta complexidade e curso irreversible. O texto expón unha serie de cambios lexislativos "orientados a garantir a mellor calidade de vida, a través da axilización dos trámites administrativos para o recoñecemento da discapacidade e a dependencia, nunha mellor atención integrada entre os sistemas de coidados sociais e sanitarios, das persoas afectadas con procesos neurolóxicos severos" que cumpran unha serie de criterios. Parte dunha proposta do colectivo de persoas afectadas pola ELA.

A xornalista canguesa Lara Graña, redactora xefa do Faro de Vigo, premiada pola Asociación de Xornalistas de Investigación polos seus traballos sobre o caso Hiperxel. O galardón, na categoría de xornalismo local, destaca "o valor da fontes empregadas e a valentía da reporteira". [Imaxe: © Faro de Vigo]

• HEMEROTECA | Informacións de Lara Graña en Praza.gal

O ministro de Transportes anuncia novas reducións na peaxe da AP-9, que chegarán por procedemento de urxencia ao Consello de Ministros do martes que vén "para contar canto antes" cos descontos. O pacto de investidura de Pedro Sánchez asinado entre PSOE e BNG incluía un desconto de ata o 75% para quen faga viaxes de ida e volta a diario desde os mesmos puntos de entrada e saída e sume 20 viaxes ao mes. Óscar Puente avanzou que o Goberno do Estado aumentará en 27,6 millóns de euros o orzamento para estas rebaixas nas peaxes da autoestrada, incrementando a partida comprometida nos orzamentos ata os 82 millóns de euros. [📸Cabinas de peaxe da AP-9 © Audasa]

• AMPLIAMOS 👉 Vía urxente para as subvencións adicionais á peaxe da AP-9 pactadas polo PSOE co BNG
• HEMEROTECA | BNG e PSOE pactan tren de proximidade e condonación da débeda "análoga" ao resto de comunidades
• HEMEROTECA | Rescatar a AP-9 custaría 904 millóns e aforraría 953: os resultados do estudo encargado polo BNG
• HEMEROTECA | Audasa segue batendo récords de beneficios tras pagar 20 veces máis polo IBI

A segunda xornada de folga nos medios públicos galegos volve interromper a emisión en directo da TVG. O comité intercentros, representante do persoal da CRTVG, convoca paros parciais, de 11.30 a 13 horas, os luns, mércores e venres contra "manipulación informativa", o anteproxecto da nova lei de medios que impulsa a Xunta ou a "externalización de contidos" como o programa O Termómetro, que volveu verse afectado pola folga. 

• AMPLIAMOS 👉 A folga na CRTVG volve interromper a emisión ao vivo e o comité acusa a dirección de tentar "rebentala"
• O comité de folga da CRTVG insta a rachar coa "espiral de silencio que impera no sistema mediático galego"
• O primeiro paro cara á folga indefinida na CRTVG paraliza a emisión da televisión pública
• "Máxima tensión" nunha CRTVG con persoal a camiñar cara á folga indefinida